Cʌntesʌntel 7

Juntiquil chʼejl bʌ winic

CHEʼ bʌ tsaʼ cajiyob ti ñumen pʼojlel winicob xʼixicob ila ti Pañimil, yonlel tsaʼ bʌ i meleyob jontolil cheʼ bajcheʼ Caín. Pero an juntiquil winic qʼuexel bʌ tsaʼ ajni. I cʼabaʼ jiñʌch Enoc. Jiñʌch wen chʼejl bʌ winic. Jini winicob xʼixicob chumuloʼ bʌ tiʼ joytilel wen jontolob jax, pero jini Enoc tsaʼ chʌn caji i melben i yeʼtel Dios.

¿Awujil ba chucoch jini winicob xʼixicob miʼ melob cabʌl jontolil? Ñaʼtan iliyi: ¿Majqui tsiʼ mele chaʼan jini Adán yicʼot Eva miʼ ñusʌbeñob i tʼan Dios yicʼot chaʼan miʼ cʼuxbeñob i wut jini teʼ tsaʼ bʌ i yʌlʌ Dios chaʼan maʼanic miʼ cʼuxob? Juntiquil jontol bʌ ángel. Jini Biblia miʼ suben Satanás. Yicʼot jaʼel yom chaʼan mi lac mel jini mach bʌ wenic.

Jumpʼejl bʌ qʼuin Jioba Dios tsiʼ sube Enoc chaʼan miʼ suben winicob xʼixicob mach bʌ yomic i yubiñob. Jiñʌch iliyi: ‹Tal i yorajlel cheʼ mi caj i jisan Dios jini jontoloʼ bʌ›. Tajol iliyi tsiʼ wen michʼesayob jini winicob xʼixicob. Tajol tsiʼ ñopo i tsʌnsañob jini Enoc. Jini chaʼan, Enoc yom wen chʼejl chaʼan miʼ suben jini winicob xʼixicob muʼ bʌ caj i mel Dios.

Dios maʼanic tsiʼ yʌcʼʌ ti jal bʌ chumtʌl Enoc yaʼ baqui añob jini jontoloʼ bʌ. Tsaʼ jach chumle joʼpʼejl i chʌncʼal (365) jab. ¿Chucoch mi la cʌl chaʼan «cojach joʼpʼejl i chʌncʼal (365)»? Come cheʼ bʌ ora jini, jini winicob ñumen pʼʌtʌlob bajcheʼ wʌle yicʼot ñumen jal miʼ chumtʌlob. ¡Cheʼʌchi; Matusalén i yalobil Enoc tsaʼ chumle joʼcʼal i yuxbajcʼ yicʼot bolompʼejl i chʌncʼal (969) jab!

Ti wiʼil, cheʼ chʌmenix jini Enoc, jini winicob xʼixicob ñumen leco jax tsaʼ caji i melob. Jini Biblia mi yʌl chaʼan ‹jontol jax ti pejtelel ora chuqui miʼ ñaʼtañob› yicʼot ‹cabʌl tsaʼ pʼojli jontolil ti Pañimil›.

¿Awujil ba chucoch wen cabʌl tsaʼ pʼojli wocol cheʼ bʌ ora jini? Chaʼañʌch tsiʼ taja jini Satanás yambʌ bajcheʼ mi yʌqʼuen i mel jontolil jini winicob xʼixicob. Laʼ laj qʼuel chuqui jini.

Génesis 5:21-24, 27; 6:5; Hebreos 11:5, TNM; Judas 14, 15.