¿Bajcheʼ yilal mic mel lojon jini tempa bʌ?

Jini ñaxam bʌ xñoptʼañob cheʼ bʌ tsiʼ meleyob i tempa bʌ miʼ chaʼleñob cʼay, miʼ melob oración, miʼ pejcañob jini tsʼijbujel yicʼot miʼ chajpañob yaʼ bʌ an ti tsʼijbujel (1 Corintios 14:​26). Mi tsaʼ tiliyet tic tempa bʌ lojon mi caj a qʼuel chaʼan lʌcʼʌl lajalʌch mic mel lojon jaʼel.

Loqʼuen ti Biblia yicʼot mach wocolic muʼ bʌ i mejlel. Ti sábado o ti domingo, yaʼ ti congregación miʼ ñusʌntel jumpʼejl discurso loqʼuem bʌ ti Biblia muʼ bʌ i jalʼan 30 minuto mic pʌsbentel lojon chaʼan ti jini tsʼijbujel miʼ pʌs chuqui i sujmlel tac woli bʌ ti ujtel ili ora. Mi lac subentel chaʼan mi lac sajcan ti lac Biblia woli bʌ ti pejcʌntel. Cheʼ miʼ yujtel jini discurso, miʼ ñusʌntel jini Cʌntesʌntel loqʼuem bʌ ti Lac Tsictesʌbentel, muʼ bʌ i jalʼan jumpʼejl ora, jini yaʼ bʌ tempʌbilob miʼ mejlel i jacʼob jini cʼajtiya tac muʼ bʌ caj i mejlel loqʼuem bʌ ti Lac Tsictesʌbentel. Cheʼ mi lac mel bajcheʼ jini, jini ticʼojel tac loqʼuem bʌ ti Biblia mi caj i coltañonla ti laj cuxtʌlel. Tiʼ pejtelel pañimil an ñumen ti 110,000 congregación tac, luʼ cheʼʌch woli yujtel jini cʌntesa yaʼ ti tempa bʌ tac.

Miʼ ñumen coltañon lojon bajcheʼ yom mic chaʼlen lojon ­cʌntesa. Ti jujumpʼejl semana mic tempan lojon c bʌ chaʼan miʼ mejlel jini chajpʌbil bʌ. Jiñi tempa bʌ I Subtʼan yicʼot i Melbal jiñi xÑoptʼan miʼ mejlel ti uxpʼejl sección, i yaʼ chucul ti jiñi Jun chaʼan lac tempa bʌ muʼ bʌ i yʌjqʼuel ti jujumpʼejl uw. Jiñi ñaxam bʌ sección jiñʌch: Ñuc tac bʌ i cʼʌjñibal ti Biblia, ili miʼ coltañonla chaʼan mi lac chʼʌmben isujm jiñi capítulo tac tsaʼ bʌ lac wʌn pejca. Jiñi yambʌ sección jiñʌch: Sujten ti wem bʌ xCʌntesa, ti ili sección miʼ ñusʌntel demostración tac chaʼan miʼ tsajintel jiñi Biblia ­yicʼot yambʌlob. Juntiquil xticʼojel miʼ subeñonla bajcheʼ miʼ mejlel lac weñʼesan cheʼ mi lac pejcan jiñi jun yicʼot cheʼ mi lac chaʼlen cʌntesa (1 Timoteo 4:​13). Jiñi cojix bʌ sección jiñʌch: I Melbal jiñi xÑoptʼan, ila miʼ tsajintel bajcheʼ miʼ mejlel laj cʼʌn jiñi principio tac am bʌ ti Biblia. Miʼ qʼuejlel temaj tac muʼ bʌ i coltañonla chaʼan mi lac ñumen chʼʌmben isujm jiñi Biblia i miʼ mejlel ti cʼajtiya tac yicʼot i jacʼbal.

Cheʼ maʼ majlel yaʼ tic tempa bʌ lojon mi caj a mulan bajcheʼ yilal mi yujtel jini cʌntesa (Isaías 54:​13).

• ¿Chuqui mi caj a cʌn cheʼ maʼ majlel yaʼ ti tempa bʌ i chaʼan i testigojob Jehová?

• ¿Baqui bʌ c tempa bʌ lojon maʼ ñaxan mulan majlel ili semana?