Jehová miʼ pʼʌtʼesan Elías

Jezabel tsiʼ ñaʼta chuqui tsaʼ ujti tiʼ tojlel jiñi xʼaltʼañob i chaʼan Baal i tsaʼ wen michʼa. Tsiʼ choco majlel tiʼ subentel Elías ili tʼan: «Ijcʼʌl miʼ caj a chʌmel cheʼ bajcheʼ jiñi xʼaltʼan i chaʼan Baal». Elías tsiʼ wen bʌcʼña i tsaʼ putsʼi majlel yaʼ tiʼ tiquiñal lum. Tsiʼ pejca Dios: «Jehová, mach mejloñix. Comix chʌmel». Elías wen lujbeñix i tsaʼ wʌyi tiʼ yebal juntejc teʼ.

Pero tsaʼ tili juntiquil ángel chaʼan miʼ chʼojyesan i tiʼ sube ti cʼun bʌ tʼan: «Tejchen, cʼuxu a waj». Elías tsiʼ yila waj yicʼot jumpʼejl tsima jaʼ. Tsiʼ cʼuxu yicʼot tsiʼ japʌ, i tsaʼ chaʼ wʌyi. Jiñi ángel tsaʼ chaʼ tili i chʼojyesan i tiʼ sube: «Cʼuxu a waj come wen ñajt baqui mi caj a majlel». Elías tsaʼʌch i chaʼ cʼuxu. Tsiʼ chaʼle xʌmbal 40 qʼuin yicʼot 40 acʼʌlel cʼʌlʌl tsaʼ cʼoti yaʼ ti wits Horeb. Cheʼ bʌ tsaʼ cʼoti yaʼi, tsaʼ wʌyi ti jumpʼejl chʼen. Jehová tsiʼ pejca Elías: «¿Chuqui woli a mel ilayi?». Elías tsiʼ jacʼʌ: «Jiñi israelob maʼañic woli i tsʼʌctesañob jiñi tʼan tsaʼ bʌ i yʌqʼueyetob. Tsiʼ jemeyob a pulʌntib yicʼot tiʼ tsʌnsayob jiñi xʼaltʼañob a chaʼan. Yom i tsʌnsañoñob jaʼel».

Jehová tiʼ sube Elías: «Loqʼuen i waʼlen yaʼ ti wits». Tsaʼ tili wen tsʌts bʌ icʼ yicʼot yujquel lum i tsaʼ jubi tilel cʼajc. Cheʼ jiñi, Elías tsaʼ yubi wen cʼun bʌ tʼan. Tsiʼ mʌcʌ i wut tiʼ pislel i waʼal tsaʼ cʌyle yaʼ tiʼ pat jiñi chʼen. Jehová tsiʼ cʼajtibe chucoch tsaʼ putsʼi. Elías tsiʼ jacʼʌ: «C bajñel jachix cʌylemon bajcheʼ xʼaltʼan». Pero Jehová tiʼ sube: «Mach a bajñelic. Cʌylem to 7 mil ti Israel muʼ bʌ i chʼujutesañoñob. Cucu suben Eliseo chaʼan miʼ caj i yochel ti a qʼuexol bajcheʼ xʼaltʼan». Ti orajach tsiʼ jacʼʌ tsaʼ bʌ i sube Jehová. ¿Muʼ ba caj i coltañet Jehová miʼ mucʼʌch a jacʼben i tʼan jaʼel? Mucʼʌch. Wʌle laʼ laj qʼuel chuqui tsaʼ ujti cheʼ tiʼ yorajlel i jajmeñal pañimil.