Jiñi Diablo miʼ yilʌben i pusicʼal Jesús

Cheʼ bʌ tsaʼix i chʼʌmʌ jaʼ Jesús, jiñi chʼujul bʌ espíritu tsiʼ pʌyʌ majlel yaʼ ti tiquin bʌ lum. 40 qʼuin maʼañic chuqui tsiʼ cʼuxu, jin chaʼan wen an i wiʼñal. Cheʼ jiñi tsaʼ cʼoti Diablo i yilʌben i pusicʼal. Ti ñaxan sube: «Mi i yalobilet Dios, suben ili xajlel tac chaʼan miʼ pʌntʌyel ti waj». Pero Jesús tsiʼ jacʼbe yicʼot tʼan tac am bʌ yaʼ ti Chʼujul bʌ Tsʼijbujel: «Tsʼijbubil chaʼan mach cojach ti waj cuxul wiñicob xʼixicob. Yom miʼ ñʌchʼtañob jaʼel chuqui miʼ yʌl Jehová».

Jiñi Diablo tsiʼ chaʼ jopʼo i yilʌben i pusicʼal Jesús: «Miʼ tiʼ sujm i yalobilet Dios, choco jubel a bʌ ila ti templo. Tsʼijbubil chaʼan Dios mi caj i choc tilel i yángelob chaʼan miʼ coltañet». Pero Jesús tsiʼ chaʼ jacʼbe yicʼot tʼan tac am bʌ yaʼ ti Chʼujul bʌ Tsʼijbujel: «Tsʼijbubil chaʼan mach yom maʼ wilʌben i pusicʼal a Dios Jehová».

Tiʼ yujtibal, Satanás ti pʌsbe tiʼ pejtelel i yumʌntel pañimil yicʼot i ñuclel, i tiʼ sube: «Mi caj cʌqʼueñet tiʼ pejtelel ili yumʌntel yicʼot i ñuclel cheʼ muqʼuic a chʼujutesañon». Pero Jesús tsiʼ jacʼbe: «¡Cucux Satanás! Tsʼijbubil chaʼan cojach Jehová yom maʼ chʼujutesan».

Jin chaʼan jiñi Diablo tsaʼ majli, i tsaʼ tili ángelob tsaʼ bʌ i yʌqʼueyob i bʌl i ñʌcʼ Jesús. Cheʼ bʌ tsaʼ ujti jiñi, Jesús tsaʼ caji i sub jiñi wen tʼan chaʼan bʌ i Yumʌntel Dios. Jiñʌch jiñi eʼtel tsaʼ bʌ i sube Jehová chaʼan miʼ mel (chaʼlen) wʌʼ ti lum. Tsiʼ wen mulayob i cʌntesa Jesús i tiʼ tsajcayob ñumel.