2 ¿Majqui yom mi lac pejcan ti oración?

CABɅL lac piʼʌlob ili ora miʼ ñaʼtañob chaʼan mach yʌlʌyic majqui miʼ pejcañob ti oración, come yaʼʌch miʼ luʼ cʼotel ti Dios. Cabʌlob miʼ ñaʼtañob chaʼan pejtelel jiñi ñopbalʌl tac luʼ wen jach, i jin chaʼan maʼañic i wocolel majqui bʌ Dios mi lac pejcan ti oración. Pero ¿i sujmʌch ba?

Tiʼ sujm, jiñi i Tʼan Dios miʼ pʌs chaʼan cabʌl muʼ bʌ i melob oración mach jiñic miʼ melbeñob majlel jiñi yom bʌ miʼ melbentel. Ti wajali, cheʼ bʌ tsaʼ tsʼijbunti jiñi Biblia, jiñi lac piʼʌlob ñʌmʌl i melbeñob oración jiñi dios tac melbil jach bʌ. Pero Dios mach junsujtelic jach tiʼ sube i tejclum chaʼan mach cheʼic miʼ mel bajcheʼ jiñi. Ti Salmo 115:4-6 miʼ yʌl chaʼan jiñi dios tac «an i chiquin, pero maʼanic miʼ yubin tʼan». ¿Mach ba jamʌ tsiquilic muʼ bʌ i yʌl? ¿Am ba i cʼʌjñibal mi lac melben oración jiñi dios tac maʼañic bʌ miʼ yubin tʼan?

Chaʼan mi lac ñumen chʼʌmben i sujm, laʼ laj qʼuel jiñi utsʼatax bʌ relato chaʼan jiñi xʼaltʼan Elías. Tiʼ sube jiñi sacerdotejob chaʼan miʼ pejcañob jiñi i dios Baal, i Elías mi caj i pejcan i Dios, i jiñi muʼ bʌ i jacʼ mi caj i tsictiyel chaʼan jiñʌch jiñi i sujm bʌ Dios. Jiñi xʼaltʼañob i chaʼan Baal tsaʼʌch i jacʼʌyob i tsaʼ caji i wen melob oración. Cabʌl hora tsiʼ pejcayob jiñi dios Baal, pero «maʼanic tsiʼ jacʼʌ» (1 Reyes 18:29). ¿Cheʼ ba tsaʼ ujti jaʼel jiñi Elías?

Mach cheʼiqui. Jin jach cheʼ bʌ tsaʼ ujti i mel jiñi oración, Dios tsiʼ choco jubel cʼajc chaʼan miʼ pul jiñi majtan tsaʼ bʌ i mele Elías. ¿Chucoch? Jiñi i jacʼbal mi lac taj yaʼ ti oración tsaʼ bʌ i mele Elías, am bʌ ti 1 Reyes 18:36, 37. Ti ili oración am bʌ i chaʼan 30 tʼan ti hebreo, Elías tsiʼ yʌlbe i cʼabaʼ Dios uxyajl: Jehová.

¿Chucoch wen ñuc i cʼʌjñibal iliyi? Yom mi laj cʼajtesan chaʼan Baal (yom bʌ i yʌl «yum») jiñʌch i cʼabaʼ i dios jiñi cananeojob i chaʼan cabʌl bajcheʼ miʼ subentel. Pero jiñi i cʼabaʼ Jehová juntiquil jach majqui woliʼ taj ti tʼan, jiñi Cojach bʌ ti panchan yicʼot ti Pañimil. Jiñʌch tsiʼ yʌlʌ: «Joñon Jehová. Jiñʌch j cʼabaʼ, i maʼañic mi cʌqʼuen c bajñel ñuclel yambʌ» (Isaías 42:8, Traducción del Nuevo Mundo [TNM]).

Laʼcu lac ñaʼtan, ¿muʼ ba mejlel la cʌl chaʼan jin jach bʌ Dios tsiʼ ñʌchʼtʌbe jiñi i yoración Elías yicʼot jiñi oración tsaʼ bʌ i meleyob jiñi xʼaltʼañob i chaʼan Baal? Maʼañic. Jiñi muʼ bʌ i chʼujutesañob Baal miʼ tsʌnsañob lac piʼʌlob chaʼan miʼ yʌqʼueñob tiʼ majtan yicʼot miʼ melob tsʼiʼlel, i jiñi miʼ jisʌben i cʼʌjñibal lac piʼʌlob yicʼot miʼ yʌsibeñob i pensar. Pero jiñi muʼ bʌ i chʼujutesañob Jehová wen qʼuexelob, maʼañic miʼ melob jiñi biʼiltic jax bʌ melbal tac. Jin chaʼan, jiñi oración tac muʼ bʌ i melbentel Jehová mach yaʼic miʼ cʼotel baʼan Baal. Jumpʼejl ejemplo, mi tsaʼ lac chocbe majlel carta juntiquil la camigo muʼ bʌ lac wen qʼuel ti ñuc, ¿muʼ ba caj lac pijtan chaʼan miʼ cʼotel tiʼ cʼʌb yambʌ mach bʌ weñic i melbal?

Cheʼ mi lac melben oración Jehová woli lac pejcan jiñi tsaʼ bʌ i meleyonla, jiñi lac Tat.a Jiñi xʼaltʼan Isaías tsiʼ yʌlʌ ti jumpʼejl oración: «Jehová, jatetʌch jiñi lon c Tat» (Isaías 63:16, TNM). Jiñʌch tsaʼ bʌ i taja ti tʼan Jesús cheʼ bʌ tiʼ sube jiñi xcʌntʼañob i chaʼan: «Mi caj c letsel majlel baqui an jiñi c Tat i laʼ Tat jaʼel, jiñi c Dios i laʼ Dios jaʼel» (Juan 20:17). Mi Jehová jiñʌch i Tat Jesús, jiñʌch jaʼel jiñi Dios tsaʼ bʌ i pejca ti oración yicʼot jiñi yom bʌ miʼ melbeñob oración jiñi xcʌntʼañob i chaʼan (Mateo 6:9).

Pero ¿muʼ ba i yʌl jiñi Biblia chaʼan yom mi lac melben oración Jesús, María, jiñi santo tac o jiñi ángelob? Maʼañic, cojach yom mi lac melben oración Jehová. Laʼ laj qʼuel chaʼchajp chucoch. Ñaxam bʌ, come cheʼ mi lac mel oración woli lac chʼujutesan Dios, i jiñi Biblia miʼ yʌl chaʼan cojach yom mi lac chʼujutesan Jehová (Éxodo 20:5). I chaʼpʼejlel, come jiñʌch muʼ bʌ i ñʌchʼtan jiñi oración (Salmo 65:2). I sujmʌch, Jehová tsiʼ yʌqʼue tiʼ wenta jiñi yambʌlob chaʼan miʼ melob cabʌl eʼtel tac, pero jin jach Jehová miʼ ñʌchʼtan la coración, maʼañic majqui tsiʼ yʌqʼue tiʼ wenta.

Chaʼan Jehová miʼ ñʌchʼtan jiñi la coración, jin jach yom mi lac pejcan. Jiñi Biblia miʼ yʌl: «I majqui jach miʼ cʼajtin coltaya tiʼ cʼabaʼ Jehová mi caj i coltʌntel» (Hechos 2:21). ¿Yom ba i yʌl chaʼan miʼ ñʌchʼtan tiʼ pejtelel jiñi oración tac? ¿O chuqui yambʌ yom mi lac mel?