Miʼ cʼuxbiñob i bʌ
«Mi cʌqʼueñetla jumpʼejl tsijiʼ bʌ mandar: Chaʼan mi laʼ cʼuxbin laʼ bʌ. Cheʼ bajcheʼ tsaʼ j cʼuxbiyetla, cheʼʌch yom mi laʼ cʼuxbin laʼ bʌ ti jujuntiquil. Cheʼ bajcheʼ iliyi tiʼ pejtelelob mi caj i ñaʼtañob chaʼan xcʌntʼañetla c chaʼan: Mi mucʼʌch laʼ cʼuxbin laʼ bʌ» (JUAN 13:34, 35).
¿Chuqui yom i yʌl Jesús? Jesús tiʼ sube jiñi xcʌntʼañob i chaʼan chaʼan yom miʼ cʼuxbiñob i bʌ cheʼ bajcheʼ tsiʼ cʼuxbiyob. Pero ¿bajcheʼ tsiʼ pʌsʌ Jesús chaʼan miʼ cʼuxbiñob? Jesús mach cheʼic tsiʼ mele bajcheʼ jiñi yambʌ lac piʼʌlob ti jiñi bʌ ora, muʼ bʌ i tsʼaʼleñob i bʌ yicʼot mach bʌ muqʼuic i qʼuelob ti ñuc jiñi xʼixicob (Juan 4:7-10). Cheʼ jaʼel, tsiʼ yʌqʼue i yorajlel yicʼot tsiʼ cʼʌñʌ i pʼʌtʌlel chaʼan miʼ coltan jiñi yambʌlob (Marcos 6:30-34). Pero jiñi wen ñuc bʌ i cʼuxbiya tsiʼ pʌsʌ jiñʌch cheʼ tsiʼ yʌcʼʌ i bʌ ti chʌmel. Jesús tsiʼ yʌlʌ: «Joñoñʌch jiñi wem bʌ xcʌnta tiñʌmeʼ, jiñi wem bʌ xcʌnta tiñʌmeʼ miʼ yʌcʼ i cuxtʌlel tiʼ tojlel i tiñʌmeʼ tac» (Juan 10:11).
Jiñi ñaxam bʌ xñoptʼañob tsiʼ pʌsʌyob cʼuxbiya. Ili xñoptʼañob miʼ subeñob i bʌ tiʼ yermañu (Filemón 1, 2). Yaʼ ti congregación junlajal miʼ qʼuelob i bʌ anquese mach junlajalic baqui tilemob. Maʼañic miʼ ñaʼtañob chaʼan jiñi judíojob yicʼot griegojob qʼuexelob, come juntiquilob jach i Yum (Romanos 10:11, 12). Cheʼ bʌ tsaʼ ujti jiñi qʼuiñijel chaʼan Pentecostés ti jabil 33, jiñi xñoptʼañob ti Jerusalén tsiʼ choñoyob i lum yicʼot chuqui tac añob i chaʼan chaʼan miʼ coltañob jiñi i cʼʌjñibal bʌ i chaʼañob. Cheʼ bajcheʼ jiñi, jiñi tsaʼ jaxto bʌ i chʼʌmʌyob jaʼ miʼ mejlelob ti cʌytʌl yaʼ ti Jerusalén i miʼ bej ñʌchʼtʌbeñob i cʌntesa tac jiñi apóstolob (Hechos 2:41-45). Cheʼ bʌ añix lʌcʼʌ 200 jab i chʌmelob jiñi apóstolob, Tertuliano tsiʼ yʌlʌ baqui chucul jiñi i yutslelob jiñi apóstolob: «Qʼuele [...] bajcheʼ miʼ wen cʼuxbiñob i bʌ [...] i ti jumpʼejlob i pusicʼal miʼ yʌcʼob i bʌ ti chʌmel tiʼ caj jiñi yambʌ».
¿Majqui miʼ pʌsob jaʼel jiñi cʼuxbiya ili ora? Jiñi libro Historia de la decadencia y ruina del Imperio romano tsiʼ yʌlʌ chaʼan jiñi muʼ bʌ i yʌlob i bʌ ti xñoptʼan jiñobʌch am bʌ i ñumen ticʼlayob i bʌ bajcheʼ jiñi mach bʌ xñoptʼañobic. Jumpʼejl estudio tsaʼ bʌ mejli ti Estados Unidos tsiʼ pʌsʌ chaʼan cabʌl ñopbalʌl miʼ tsʼaʼleñob jiñi yambʌ lac piʼʌlob qʼuexeloʼ bʌ i colorlel i pʌchʌlelob. Anquese lajalob i ñopbal, maʼañic miʼ wen ñochtañob i bʌ yicʼotob jiñi añoʼ bʌ ti yambʌ tejclum. Jin chaʼan, mach yomobic i coltañob i bʌ o maʼañic miʼ tilelob tiʼ pusicʼal chaʼan miʼ coltañob i bʌ cheʼ bʌ i cʼʌjñibal.
Ti 2004, ti Florida (Estados Unidos) tsaʼ ñumi chʌmpʼejl tsʌts bʌ icʼ jaʼal ti chaʼpʼejl uw. Ti wiʼil, jiñi am bʌ tiʼ wenta chaʼan miʼ qʼuel jiñi coltʌntel muʼ bʌ i yʌjqʼuel, tsaʼ majli i qʼuel bajcheʼ woliʼ mejlel jiñi eʼtel. I tsiʼ qʼuele chaʼan cojach jiñi i testigojob Jehová wen chajpʌbil bajcheʼ woliʼ chaʼleñob coltaya, i tsiʼ yʌlʌ chaʼan mi caj i yʌqʼueñob chuqui i cʼʌjñibal i chaʼañob. Ti 1997, junmojt i testigojob Jehová tsaʼ majliyob ti República Democrática del Congo chaʼan miʼ yʌqʼueñob tsʼac, bʌlñʌcʼʌl yicʼot i pislel jiñi i yermañujob i cʼʌjñibal bʌ i chaʼañob. I tojol pejtelel iliyi tsaʼ cʼoti ti un millón ti dólar, i tsiʼ yʌcʼʌyob jiñi Testigojob añoʼ bʌ ti Europa.