¿Chuqui mi caj i yujtel cheʼ bʌ woliʼ Qʼuiñilel meloñel?

1. ¿Chuqui jiñi i Qʼuiñilel meloñel?

Ti jumpʼejl dibujo tsaʼ bʌ i mele Gustave Doré miʼ pʌstʌl muʼ bʌ i ñaʼtan cabʌl lac piʼʌlob chaʼan muʼ bʌ caj i yujtel tiʼ Qʼuiñilel meloñel. Miʼ ñaʼtañob chaʼan yaʼ waʼalob tiʼ tojel i buchlib Dios i mi caj i yujtel meloñel: An muʼ bʌ caj i majlelob ti panchan i an muʼ bʌ caj i majlelob ti toj mulil. Pero jiñi Biblia jamʌ tsiquil miʼ tsictesan chaʼan jiñi i Qʼuiñilel meloñel jiñʌch chaʼan miʼ jisʌntel jiñi jontolil am bʌ ila ti pañimil (Salmo 96:13). Jesús jiñʌch tsaʼ bʌ waʼchoconti chaʼan miʼ tojʼesan jiñi wocol tac (pejcan Isaías 11:1-5 yicʼot Hechos 17:31).

2. ¿Bajcheʼ mi caj i mejlel chuqui toj cheʼ tiʼ Qʼuiñilel meloñel?

Jiñi ñaxam bʌ wiñic, Adán, maʼañic tsiʼ jacʼbe i tʼan Dios. Jin chaʼan pejtelel i pʼolbal xmulilob, miʼ ñusañob wocol yicʼot miʼ chʌmelob (Romanos 5:12). Jesús mi caj i tojʼesan iliyi cheʼ bʌ miʼ chʼojyesan jiñi yonlel lac piʼʌlob chʌmeñoʼ bʌ. Ti jiñi libro chaʼan Apocalipsis miʼ yʌl chaʼan iliyi mi caj i yujtel ti jiñi Mil jab i yumʌntel Jesucristo (pejcan Apocalipsis 20:4, 11, 12).

Chaʼan miʼ yujtel meloñel tiʼ tojlelob jiñʌch mi caj i chʼʌjmel ti ñuc chuqui miʼ melob cheʼ bʌ tsaʼix jajmi jiñi bʌlbil bʌ jun muʼ bʌ i yʌjlel ti Apocalipsis capítulo 20, i mach jiñic chuqui tsiʼ meleyob cheʼ bʌ cuxulobto (Romanos 6:7). Jiñi apóstol Pablo tsiʼ taja ti tʼan «jiñi tojoʼ bʌ yicʼot jiñi mach bʌ tojobic» chaʼan miʼ yʌcʼ ti ñaʼtʌntel chaʼan jiñʌch muʼ bʌ caj i chaʼ chʼojyelob i mi caj i mejlel i cʌñob Dios (pejcan Hechos 24:15).

3. ¿Chuqui yambʌ mi caj i yujtel tiʼ Qʼuiñilel meloñel?

Jiñi lac piʼʌlob tsaʼ bʌ chʌmiyob i maʼañic tsaʼ mejli i cʌñob yicʼot i melbeñob i yeʼtel Jehová, mucʼʌch caj i mejlel i melob. I mi mucʼʌch i jacʼbeñob i tʼan Dios mi caj i tajob i cuxtʌlel pero miʼ maʼañic miʼ melob mi caj i chʼojyelob chaʼan meloñel (pejcan Juan 5:28, 29 yicʼot Isaías 26:10; 65:20.)

Pejtelel lac piʼʌlob toj mi caj i yajñelob cheʼ bʌ miʼ yujtel jiñi Mil jab muʼ bʌ caj i jalʼan jiñi i Qʼuiñilel meloñel (1 Corintios 15:24-28). ¡Wen utsʼatax bʌ majtañʌl! Cheʼ jiñi, jiñi Diablo, ñupʼul bʌ mil jab tsaʼ ajñi ti jiñi abismo, mi caj i chaʼ ajqʼuel ti loqʼuel chaʼan miʼ qʼuelben i pusicʼal jiñi lac piʼʌlob. Satanás mi caj i chaʼlen wersa i tʌtsʼ jiñi lac piʼʌlob ti Jehová, pero jiñi muʼ bʌ i lʌtʼob mi caj i mejlelob ti chumtʌl pejtelel ora ila ti Pañimil (pejcan Isaías 25:8 yicʼot Apocalipsis 20:1, 7-9).

4. ¿Baqui bʌ yambʌ i qʼuiñilel meloñel mi caj i chʼʌm tilel bendición?

Jiñi Biblia miʼ taj ti tʼan yambʌ i qʼuiñilel meloñel. Jiñʌch cheʼ bʌ mi caj i jisʌntel pejtelel chuqui an ila ti pañimil. Cheʼʌch mi caj i waʼ tilel cheʼ bajcheʼ tiʼ yorajlel Noé, cheʼ bʌ tsaʼ laj jisʌntiyob lac jiñi piʼʌlob ti jiñi ñuc bʌ butʼjaʼ. Tsʼitaʼ jax yom chaʼan jiñi «jontoloʼ bʌ» lac piʼʌlob miʼ jisʌntelob i cheʼ jiñi cojach mi caj i cʌytʌl toj bʌ lac piʼʌlob (pejcan 2 Pedro 3:6, 7, 13.)