«Yomob tsiʼ yʌlʌ chaʼan joñon mic bajñel taj jiñi i sujmlel»

BAJCHEʼ QUILAL TI WAJALI:

Ti chʼocʼayon ti Santo Domingo, i capital República Dominicana. Añon lon chʌntiquil queran bʌ lon c bʌ, i joñon jiñi ascuñʌl. Jiñi c tatob yomob chaʼan mi lon c taj wem bʌ cʌntesʌntel i chaʼan mi lon c sujtel ti wem bʌ quixtañu. Cheʼ bʌ anto yom chʌmpʼejl jab mic chʼocʼan, tsiʼ cʌñʌyob jiñi ochemoʼ bʌ ti mormón. Tsiʼ wen mulayob cheʼ utsob, sʌcob yicʼot wen qʼuextʌbilob i pislel. Mach cabʌl ora tsaʼ ñumi, jiñi c familia tsaʼ ochiyob ti jiñi Iglesia de Jesucristo de los Santos de los últimos días, i jiñʌch tsaʼ bʌ ñaxan ochiyob ti jiñi ñopbalʌl yaʼ ti República Dominicana, ili ñopbalʌl cʌmbil jaʼel bajcheʼ Iglesia Mormona.

Cheʼ bʌ an chuqui miʼ mejlel ti jiñi Iglesia mic wen chaʼlen coltaya, pero tsaʼ bʌ c wen mulaj jiñʌch cheʼ miʼ yʌcʼob ti ñuc jiñi familia yicʼot chaʼan yom wen lac melbal. Wen tsaʼ cubi c bʌ cheʼ bʌ ochemon bajcheʼ mormón i tsaʼ c chaʼle wersa chaʼan mic sujtel ti misionero chaʼan mormón.

Cheʼ bʌ añix 18 c jabilel, jiñi c familia tsaʼ majli ti chumtʌl ti Estados Unidos chaʼan mi cochel ti jumpʼejl wem bʌ universidad. Cheʼ ñumeñix jumpʼejl jab, jiñi c tíojob i testigojoʼ bʌ Jehová, tsiʼ julaʼtayon lojon yaʼ ti Florida i tsiʼ pʌyʌyon lojon majlel ti jumpʼejl colem tempa bʌ. Tsaʼ bʌ c mulaj jiñʌch cheʼ tiʼ pejtelel jiñi yaʼ bʌ añob ti jiñi tempa bʌ miʼ sʌclañob jiñi texto tac yaʼ ti Biblia yicʼot miʼ tsʼijbuñob chuqui tac muʼ bʌ i yʌjlel, jin chaʼan joñon jaʼel tsaʼ j cʼajti jun yicʼot lápiz i tsaʼ caji c tsʼijbun majlel muʼ bʌ i yʌjlel tac.

Cheʼ bʌ tsaʼ ujti jiñi colem tempa bʌ, jiñi c tíojob tiʼ subeyoñob chaʼan yom i coltañoñob c ñumen cʌn jiñi Biblia, come com ochel bajcheʼ misionero. Wen tsaʼ cubi, come cojach ñumen cʌmbil c chaʼan jiñi libro chaʼan mormón i mach jiñic jiñi Biblia.

BAJCHEʼQUI JIÑI BIBLIA TSIʼ QUEXTɅBEYON C PENSAR:

Cheʼ bʌ tsaʼix chaʼ majliyob, tsaʼ c bej chaʼle lon tʼan ti teléfono chaʼan miʼ bej subeñoñob chaʼan bʌ Biblia. Tiʼ subeyoñob chaʼan mic lajeʼ muʼ bʌ c ñop yicʼot muʼ bʌ i yʌl jiñi Biblia. Yomob chaʼan tic bajñel mij cʌn jiñi i sujmlel.

Cabʌl muʼ bʌ i pʌs jiñi c ñopbal muʼ bʌ c ñaʼtan chaʼan i sujmʌch, pero tiʼ sujm mach ñoj cujilic mi lajalʌch bajcheʼ miʼ yʌl jiñi Biblia. Jiñi c tía tsiʼ chocbeyon tilel jiñi revista ¡Despertad! 8 chaʼan noviembre, 1995, i miʼ tilel chaʼpʼejl tema baqui miʼ taj ti tʼan chaʼan bʌ mormón. Toj sajtel c pusicʼal cheʼ tij qʼuele chaʼan añʌch cabʌl mach bʌ cujilic muʼ bʌ i ñop jiñi c Iglesia. Jin chaʼan, tsaʼ caji c sʌclan ti lon c página chaʼan internet chaʼan mij qʼuel miʼ sujmʌch muʼ bʌ i yʌl jiñi revista tsaʼ bʌ c pejca, i tsaʼ cʼoti j cʌn chaʼan i sujmʌch. Cheʼ jaʼel, anto chuqui tsaʼ cʼoti c ñumen cʌn cheʼ bʌ tsajñon ti jiñi museo i chaʼan mormoñob am bʌ ti Utah.

Cheʼ bʌ ochemonto ti mormón, tic ñopo tiʼ pejtelel ora chaʼan jiñi Libro de Mormón yicʼot jiñi Biblia lajalʌch chuqui miʼ yʌl. Pero cheʼ bʌ tsaʼ c teche c pejcan ti wen jiñi Biblia, tsaʼ cʼoti j qʼuel chaʼan mach lajalic. Jumpʼejl ejemplo, yaʼ ti Biblia, ti Ezequiel 18:4 miʼ yʌl chaʼan juntiquil lac piʼʌl miʼ chʌmel. Pero jiñi Libro de Mormón, ti Alma 42:9, miʼ yʌl chaʼan maʼan baʼ ora mi lac chʌmel.

Cabʌl muʼ bʌ i ñopob jiñi mormón maʼan bʌ mic wen ñaʼtan, jumpʼejl ejemplo jiñʌch chaʼan jiñi nacionalismo, yambʌ jiñʌch cheʼ jiñi pʌcʼʌbʌl Edén ti wajali yaʼan ti Condado de Jackson, ti Missouri, Estados Unidos. I jiñi añoʼ bʌ i yeʼtel ti jiñi ñopbalʌl miʼ pʌsob chaʼan Dios mi caj i cʼʌn jiñi yumʌl ti Estados Unidos chaʼan miʼ chaʼlen yumʌntel tiʼ pejtelel pañimil.

Tij cʼajtibe c bʌ chuqui mi caj i yujtel tiʼ tojlel jiñi c tejclum yicʼot yan tac bʌ cheʼ miʼ yujtel jiñi. Ti jumpʼejl bʌ icʼan tsiʼ pejcayon ti teléfono juntiquil j cʌñʌ bʌ i choncol bʌ ti clase chaʼan miʼ sujtel bajcheʼ misionero chaʼan mormón i tsaʼ caji c tajben ti tʼan ili tema. Tsaʼ j cʼajtibe: «Cheʼ ochemic ti guerra jiñi a país yicʼot yambʌ país, ¿muʼ ba caj a contrajin jiñi yambʌ mormoñob añoʼ bʌ ti jiñi yambʌ país?». Toj sajtel c pusicʼal ti cubi cheʼ tsiʼ yʌlʌ chaʼan mucʼʌch caj i contrajin. Tsaʼ caji c bej sʌclan majlel chaʼan jiñi c ñopbal, cheʼ jaʼel tsaʼ c melbeyob cʼajtiya jiñi ñucoʼ bʌ i yeʼtel ti jiñi Iglesia, pero tiʼ subeyoñob chaʼan jiñi j cʼajtiya maxto añic i jacʼbal i xucʼu xucʼulto mi caj i jajqʼuel majlel.

Tsaʼ jach i yʌqʼueyon c chʼijyemlel tsaʼ bʌ i subeyoñob. Tsaʼ bʌ caji c mel, tsaʼ caji j cʼajtiben c bʌ chucoch com sujtel bajcheʼ misionero, i tsaʼ cʼoti j cʌn chaʼan com jach j coltan añoʼ bʌ ti wocol, i cheʼ jaʼel tsaʼ j qʼuele chaʼan com jach chaʼan ñuc mij qʼuejlel ti yambʌlob. Pero tiʼ sujm mach wen j cʌñʌyic Dios. Anquese añʌch c pejca cabʌl versículo yaʼ ti Biblia, maʼan tic wen acʼʌ ti ñuc muʼ bʌ i yʌl yaʼi. Mi cujilic jaʼel chaʼan Dios an chuqui mi caj i mel ila ti Lum yicʼot tiʼ tojlel jiñi quixtañujob.

CHUQUI BɅ WENLEL TAJBIL C CHAʼAN:

Cheʼ bʌ tic chaʼle estudio yicʼot jiñi i testigojob Jehová cabʌl chuqui tij cʌñʌ: ¿Chuqui i cʼabaʼ jiñi Dios? ¿Chuqui mi lac chaʼlen cheʼ mi lac chʌmel? ¿Chuqui mi caj i mel Jesús chaʼan miʼ tsʼʌctiyel jiñi ñaʼtʌbil bʌ i chaʼan Dios?... Tsaʼix cʼoti i yorajlel chaʼan mij cʌn majlel muʼ bʌ i yʌl jiñi Biblia, i mic wen mulan c suben yambʌlob jiñi i sujmlel choncol bʌ j cʌn majlel. Cujilʌch chaʼan añʌch Dios, pero wʌle miʼ mejlel c pejcan ti oración lajal bajcheʼ mic pejcan juntiquil wem bʌ camigo. Ti 12 chaʼan julio ti 2004 tic chʼʌmʌ jaʼ i tsaʼ sujtiyon tiʼ testigo Jehová, i tsaʼ ñumi 6 uw, tsaʼ ochiyon bajcheʼ precursor.

Joʼpʼejl jab tsaʼ c chaʼle eʼtel yaʼ ti sucursal chaʼan i testigojob Jehová am bʌ ti Brooklyn (Nueva York). Tijicña tsaʼ cubi cheʼ bʌ tsaʼ mejli c tsʼitaʼ chaʼlen coltaya chaʼan miʼ mejlel jiñi Biblia yicʼot yan tac bʌ jun chaʼan miʼ coltʌntel jiñi quixtañujob tiʼ petol pañimil. Ili jabil ñumen bʌ tilel an c wen ubi c tijicñʌyel come an j colta yambʌlob chaʼan miʼ cʌñob Dios.