Ñumen weñʼesan a subtʼan: Bajcheʼ yom mi lac jacʼben i tʼan michʼ bʌ i yum otot

Chucoch ñuc i cʼʌjñibal. Anquese añʌch cabʌl quixtañujob ñuc bʌ miʼ qʼueloñobla yaʼ ti lac subtʼan, pero Jesús tsiʼ wʌn alʌ chaʼan an muʼ bʌ caj i tsʼaʼleñoñobla (Juan 17:14). Jin chaʼan, mach yomic toj sajtel lac pusicʼal cheʼ bʌ mi lac taj michʼ bʌ quixtañujob. Cheʼ bʌ mi lac taj michʼ bʌ quixtañujob, mi lac mulan lac jacʼ cheʼ bajcheʼ miʼ mulan Jehová, come jiñʌch jiñi woli bʌ la cʌcʼ ti cʌñol (Ro. 12:17-21; 1 P. 3:15). Mi cheʼʌch mi lac mel bajcheʼ miʼ mulan Jehová, tajol jiñi wocol maʼañix mi caj i ñucʼan . Cheʼ jaʼel, jiñi i yum otot mi caj i qʼuel wem bʌ lac melbal yicʼot majqui jach woli bʌ i qʼuelonla ti jiñi bʌ ora. Tajol ti yambʌ qʼuin cheʼ bʌ miʼ julaʼtan juntiquil i testigo Jehová mi caj i ñʌchʼtʌben i tʼan (2 Co. 6:3).

Bajcheʼ yom miʼ mejlel:

Mach a chaʼlen tʼan ti ora yicʼot yom uts maʼ pʌs a bʌ. Ili mi caj i coltañet chaʼan maʼañic miʼ ñucʼan jiñi wocol. Mach a ñaʼtan chaʼan michʼ come tsaʼ cʼoti a julaʼtan (Ec. 7:9). Tajol michʼ come an i wocol o tajol mach weñic chuqui woli bʌ i ñusan cheʼ bʌ tsaʼ jatsʼbe i puertajlel i yotot. Tajol miʼ michʼan ti caj jiñi lac subtʼan, come tajol an ubibil i chaʼan lotiya tac (2 Co. 4:4).
Jacʼʌ ti uts yicʼot ti wen jach bʌ tʼan (Pr. 15:1). Tajol tsaʼ pʼixtesa o tsaʼ mʌcta tiʼ yeʼtel. Anquese maʼañic mi lac suben chaʼan miʼ ñusʌbeñonla cheʼ tsaʼ cʼotiyonla ti subtʼan ti yotot, pero miʼ mejlel lac suben chaʼan miʼ ñusʌbeñonla cheʼ tsaʼ cʼotiyonla cheʼ bʌ mach weñic chuqui woli bʌ i ñusan. ¿Michʼ ba tiʼ caj chaʼan tsaʼ yubi toʼol tʼan mach bʌ isujmic ti lac tojlel? Mi cheʼʌch bajcheʼ jiñi, mi mejlel a jacʼ cheʼ bajcheʼ iliyi: «Mic ñaʼtan chucoch miʼ yʌqʼuet ti michʼan jiñi. Pero jiñi ubibil bʌ a chaʼan mach isujmic. ¿Muʼ ba mejlel c tsictesʌbeñet chucoch?» ¿Añet ba ti i contra jiñi muʼ bʌ lon c ñop, chaʼan chucoch maʼañic mi lon j chʼʌm jiñi chʼichʼ o chucoch cheʼ an muʼ bʌ i chaʼlentel ti expulsar? Miʼ mejlel a jacʼ cheʼi: «Mic chʼʌmben isujm, an yambʌ quixtañujob muʼ bʌ i cʼojoʼtañob jaʼel jiñi. ¿Muʼ ba mejlel c pʌsbeñet yicʼot jiñi Biblia baqui chucul jiñi cʌntesʌntel?»
Mi wen michʼ jiñi i yum otot, tajol yom mi lac sujtel yicʼot mach wersajic mi lac jacʼben i tʼan. Mi jiñi quixtañu mi yʌl chaʼan maʼañix miʼ mulan chaʼan miʼ ñumelob jiñi i testigojob Jehová ti i yotot, miʼ mejlel a suben chaʼan mi caj a jacʼ chuqui mi yʌl.

Ñopo a mel iliyi ti ili uw:

Cheʼ bʌ mi laʼ mel jiñi chʼujutesaya ti familia, yom mi la ñop bajcheʼ miʼ mejlel laʼ jacʼben i tʼan juntiquil michʼ bʌ i yum otot.
Cheʼ bʌ tsaʼix a ñajtʼesa a bʌ ti tojlel jiñi michʼ bʌ i yum otot, alʌ a wicʼot jiñi a piʼʌl ti subtʼan bajcheʼ miʼ mejlel a jacʼben ti ñumen wen.