Ñumen weñʼesan a subtʼan: Yaʼ baqui an xchoñoñelob

Chucoch ñuc i cʼʌjñibal. Jiñi quixtañujob cabʌl ora miʼ chaʼleñob eʼtel ti jujumpʼejl qʼuin, jin chaʼan ñumen wen cheʼ mi lac subeñob jiñi wen tʼan yaʼ baqui mucʼob ti eʼtel. Wen utsʼatax i cabʌl chuqui miʼ mejlel lac taj cheʼ mi lac chaʼlen subtʼan yaʼ baqui an xchoñoñelob. Tiʼ pejtelel ora mi lac tajob i wen miʼ pejcañob jiñi muʼ bʌ i cʼotelob yaʼi come woliʼ pijtañob xmʌñoñelob. Chaʼan wen miʼ sujbel jiñi wen tʼan yaʼi, jiñi xsubtʼañob yom wen tsajilob, yom wen jach i pislelob yicʼot miʼ chʼʌlob i bʌ (2 Co. 6:3). Jiñi am bʌ tiʼ wenta jiñi subtʼan yom miʼ qʼuel jaysujtel yicʼot majqui miʼ chaʼlen subtʼan yaʼi.

Bajcheʼ yom miʼ mejlel:

Chajpan chuqui miʼ mejlel a wʌl mach bʌ tamic. Mi maʼ cʌlʌx chaʼlen tʼan a wicʼot jiñi xʼeʼtelob, tajol ti yambʌ ora maʼañix mi caj i ñʌchʼtañetob.
Julaʼtan jiñi choñoñibʌl tac cheʼ maʼañic cabʌl xmʌñoñelob, tajol cheʼ bʌ woli to i techob eʼtel.
Ñaxan ñopo a pejcan jiñi am bʌ tiʼ wenta choñoñibʌl i yom utset. Miʼ mejlel a wʌl: «Woli lon c julaʼtan jiñi wʌʼ bʌ mucʼob ti eʼtel ilayi come cheʼʌch bajcheʼ jiñi miʼ mejlel lon c chaʼlen tʼan yicʼotob». Ti tsʼitaʼ jach minuto, pʌsʌ jumpʼejl tratado, revista o yambʌ jun. Mach a wʌl chaʼan jiñi la queʼtel miʼ coltʌntel ti taqʼuin loqʼuem bʌ tiʼ pusicʼal quixtañujob, cojach mi jin tsiʼ cʼajtiyob, tajol miʼ ñaʼtañob chaʼan xchoñoñelonla.
Mi uts jiñi am bʌ tiʼ wenta choñoñibʌl, suben chaʼan a wom a pejcan jumucʼ jiñi yambʌ xʼeʼtelob. Ti yan tac bʌ baʼ miʼ yujtel eʼtel, miʼ mejlel a cʼajtin mi mucʼʌch i mejlel a cʌy jun tac yaʼ baqui miʼ cʼajob i yo.
Yom tsajilet, i yom a wujil i chʼʌmbentel isujm. Jumpʼejl ejemplo, mi an chuqui woliʼ mel o woliʼ pejcan juntiquil xmʌñoñel, pijtan cheʼ jocholix chaʼan maʼ pejcan.

Ñopo a mel iliyi ti ili uw:

Yaʼ ti Chʼujutesaya ti familia ñopo chuqui miʼ mejlel a wʌl mi maʼ chaʼlen subtʼan baqui an choñoñibʌl tac.