«Ñaxan mele a bʌ a wicʼot a piʼʌl»

Ñaʼtancu chaʼan tiʼ yorajlel Jesús yaʼ chumulet ti Galilea. Tsaʼ majliyet ti Jerusalén chaʼan maʼ mel jiñi qʼuiñijel chaʼan Lejchempat. Jiñi lajaloʼ bʌ laʼ ñopbal laʼ wicʼot loqʼuemoʼ bʌ ti yan tac bʌ país tsaʼ cʼotiyob jaʼel, i Jerusalén butʼulix ti quixtañujob. A wom a wʌqʼuen i majtan Jehová. Wocol jax maʼ ñumel majlel tiʼ bijlel jiñi templo a wicʼot jiñi chivo. Cheʼ bʌ maʼ cʼotel yaʼ ti templo mi jumpʼejlic acuxan miʼ yochel, cʌlʌxix yomoʼ bʌ i pulbeñob jaʼel i majtan Dios. Tsaʼ cʼoti i yorajlel chaʼan maʼ wʌqʼueñob jiñi motomaj jiñi chivo. Pero cheʼ muqʼuix caj a mel jiñi, miʼ cʼajtiyel a chaʼan chaʼan an a wocol a wicʼot juntiquil hermano i tajol yaʼan jaʼel chaʼan miʼ pulben i majtan Dios. Jesús miʼ tsictesan chuqui yom bʌ maʼ mel mi añet ti wocol bajcheʼ jiñi (pejcan Mateo 5:24). ¿Chuqui yom maʼ mel jatet yicʼot jiñi hermano tsaʼ bʌ a wʌqʼue i chʼijiyemlel chaʼan mi laʼ jacʼ jiñi mandar tsaʼ bʌ i yʌcʼʌ Jesús yicʼot jiñi ñʌchʼtʌlel? Ti jujumpʼejl lista miʼ mejl a bon baqui bʌ i jacʼbal jiñi cʼajtiya.

YOM BɅ MAʼ MEL JATET

• Maʼ pejcan jiñi hermano mi jatet maʼ ñaʼtan chaʼan añʌch chucoch cheʼ tsaʼ yubi i bʌ bajcheʼ jiñi.

• Suben chaʼan mach weñic bajcheʼ tsiʼ mele mi maʼ qʼuel chaʼan orajach cʼux miʼ yubin tʼan o añʌch i mul jaʼel.

• Yom wen jach maʼ ñʌchʼtan chuqui miʼ subeñet jiñi hermano anquese maʼañic maʼ luʼ chʼʌmben isujm, i suben chaʼan laʼ i ñusan a mul tiʼ pejtelel i pusicʼal.

YOM BɅ MIʼ MEL JIÑI HERMANO

• Miʼ majlel i suben yambʌ hermanojob ti congregación chuqui tsaʼ melbe chaʼan jin miʼ coltʌntel.

• Miʼ jamʌ subeñet jiñi tsaʼ bʌ ujti, miʼ chaʼ cʼajtesʌbeñet yicʼot miʼ wersa subeñet chaʼan maʼ wʌl a mulʌch.

• Miʼ qʼuel a pecʼlel yicʼot a chʼejlel cheʼ tsaʼ tili a pejcan yicʼot miʼ ñusan a mul tiʼ pejtelel i pusicʼal.

Anquese ili ora maʼañic mi lac pulben i majtan Dios chaʼan mi lac chʼujutesan, ¿bajcheʼ qui miʼ taj i bʌ tsiʼ yʌlʌ Jesús cheʼ ñʌchʼʌl añonla la quicʼot la quermañojob yicʼot cheʼ mi lac chʼujutesan Dios bajcheʼ miʼ mulan?