¿Woli baʼ locʼsʌben i wenlel jiñi folleto Laʼ lac tsajin jiñi Biblia ti jujumpʼejl qʼuin?

¿Ñʌmʌl baʼ pejcan ti jujumpʼejl qʼuin jiñi texto yicʼot chuqui muʼ bʌ i yʌl jiñi folleto Laʼ lac tsajin jiñi Biblia ti jujumpʼejl qʼuin? Pero mi mach cheʼiqui, ¿muʼ ba i mejlel a tech a mel? Cabʌl ñʌmʌl bʌ i pejcañob jiñi texto cheʼ ti sʌcʼan, chaʼan cheʼ bʌ miʼ melob majlel i yeʼtel miʼ mejlel i chʌn cʼajtesañob (Jos. 1:8, TNM; Sal. 119:97). ¿Bajcheʼ miʼ mejlel a ñumen locʼsʌben i wenlel jiñi texto chajpʌbil bʌ chaʼan jiñi qʼuin? Pejcan ti tsʼʌcʌl jiñi capítulo am bʌ ti Biblia chaʼan maʼ ñumen chʼʌmben i sujm. Ñaʼtan jumpʼejl relato am ti Biblia muʼ bʌ i taj i bʌ yicʼot jiñi texto tsaʼ bʌ a pejca. Cheʼ jiñi, cʼʌñʌ jiñi principio ti a cuxtʌlel. Cheʼ bʌ mi lac chuc lac bʌ tiʼ Tʼan Dios cheʼ bʌ an chuqui woli lac ñaʼtan lac mel, mi caj i tojʼesañonla majlel yicʼot miʼ coltañonla (Sal. 119:105).

Jiñi añoʼ bʌ ti Betel tiʼ petol pañimil miʼ tech i tsajiñob jiñi folleto Laʼ lac tsajin jiñi Biblia ti jujumpʼejl qʼuin cheʼ miʼ chaʼleñob uchʼel ti sʌcʼan. Ti jiñi jabil ñumen bʌ tilel, an chʼujutesaya ti sʌcʼan muqʼuix bʌ i mejlel lac taj yaʼ ti JW Broadcasting^® baqui miʼ yʌl CɅNTESA TIʼ CHAʼAN BɅ DIOS. ¿Jalixqui tsaʼ qʼuele jatet jiñi chʼujutesaya ti sʌcʼan? Tajol jiñʌch muʼ bʌ i mejlel i coltañet ti jimbʌ ora. Jumpʼejl ejemplo, ¿bajcheʼ miʼ mejlel i coltañonla chuqui tsaʼ bʌ ujti tiʼ tojlel Lot?

CHEʼ BɅ TSAʼIX LAʼ QʼUELE JIÑI VIDEO MACH LAJ CʼUXBIN CHUQUI AM BɅ TI PAÑIMIL (1 JN. 2:15), JACʼɅ ILI CʼAJTIYA TAC:

• ¿Baqui bʌ jiñi principio tsaʼ cʼʌjñi ti ili chʼujutesaya ti sʌcʼan?

• ¿Bajcheʼ miʼ cʌntesañonla jiñi tsaʼ bʌ ujti tiʼ tojlel Lot chaʼan mach weñic cheʼ mi laj cʼuxbin pañimil o jiñi am bʌ ti jiñi pañimil? (Gn. 13:12; 14:12; 19:3, 12, 13, 24-26).

• ¿Bajcheʼ mi lac pʌs chaʼan mucʼʌch laj cʼuxbin Jehová i mach jiñic ili pañimil mi jiñic am bʌ ila ti pañimil?