I MELBAL JIÑI XÑOPTʼAN
Ti jiñi uxpʼejl bʌ qʼuin colem tempa bʌ miʼ mejlel lac pʌsben lac bʌ cʼuxbiya
¿Chucoch mi lac wen mulan jiñi uxpʼejl bʌ qʼuin colem tempa bʌ? Come miʼ mejlel lac chʼujutesan Jehová ti temel yicʼot la quermañujob, cheʼ bajcheʼ tsiʼ mele jiñi israelitajob. Mach cojach mi lac taj cabʌl chʼujul bʌ bʌlñʌcʼʌl, cheʼ jaʼel mi lac mejlel ti tem ajñel la quicʼot lac familia yicʼot la camigojob. Mucʼʌch lac wen qʼuel ti ñuc ili colem tempa bʌ, jin chaʼan mi lac chaʼlen wersa chaʼan maʼañic mi lac sʌt mi jumpʼejlic qʼuin.
Pero mach cojach yom mi lac ñaʼtan muʼ bʌ caj laj cʌn ti jiñi colem tempa bʌ, yomʌch mi lac ñaʼtan jaʼel bajcheʼ mi caj lac pʌs jiñi cʼuxbiya tiʼ tojlel yambʌlob (Gá. 6:10; He. 10:24, 25). Ili mi lac pʌs cheʼ bʌ maʼañic mi lac mʌctan cabʌl buchlibʌl o cheʼ bʌ mi lac chuc jiñi puerta chaʼan miʼ ñumelob jiñi la quermañujob (Fil. 2:3, 4). Cheʼ jaʼel, miʼ mejlel lac taj yambʌ la camigojob. Miʼ mejlel lac pejcañob jiñi maxto bʌ laj cʌñʌyic. Miʼ mejlel lac mel cheʼ bʌ muʼto caj i tejchel o cheʼ bʌ tsaʼix ujti jiñi colem tempa bʌ o cheʼ tiʼ yorajlel cʼux waj (2 Co. 6:13). Ili la camigo muʼ bʌ caj lac taj, miʼ mejlel ti ajñel la quicʼot tiʼ pejtelel ora. Cheʼ bʌ jiñi yambʌlob miʼ qʼuelob chaʼan mucʼʌch laj cʼuxbin lac bʌ tiʼ sujm, tajol miʼ mejlel i lʌcʼtesañob i bʌ ti Jehová jaʼel (Jn. 13:35).
CHEʼ BɅ TSAʼIX LAʼ QʼUELE JIÑI VIDEO JIÑI COLEM TEMPA BɅ INTERNACIONAL BɅ «JIÑI CʼUXBIYA MAʼAÑIC MIʼ JILEL», JACʼɅ ILI CʼAJTIYA TAC:
¿Bajcheʼ tsaʼ pʌsbentiyob cʼuxbiya jiñi hermanojob tsaʼ bʌ pʌjyiyob ti jiñi colem tempa bʌ internacional bʌ 2019?
¿Chucoch wen tsiquilʌch chaʼan jiñi i tejclum Jehová wen temelʌch an yicʼot miʼ wen cʼuxbiñob i bʌ?
¿Chuqui tsiʼ yʌlʌyob jiñi Junmojt muʼ bʌ i pʌsob bij chaʼan jiñi cʼuxbiya?
¿Chuqui miʼ mejlel a mel chaʼan maʼ pʌs a cʼuxbiya ti jiñi colem tempa bʌ?
¿Bajcheʼ tsaʼ ñumen tsictiyi i cʼuxbiya jiñi hermanojob yaʼ ti Alemania yicʼot ti Corea del Sur?
¿Chuqui maʼañic bʌ mi caj laj cʌy lac mel?