¿Cʼajal baʼ chaʼan?
¿Wen pejcʌbilix baʼ chaʼan jiñi tema tac maxto bʌ wen jalic loqʼuem ti Lac Tsictesʌbentel? Qʼuele mi mucʼʌch i mejlel a jacʼ ili cʼajtiya tac:
¿Chuqui ti wenlel tac mi caj lac taj cheʼ bʌ mi la cʌqʼuen i yorajlel chaʼan mi lac pejcan Jehová, lac ñʌchʼtan yicʼot mi lac ñaʼtan?
Mi caj lac yajcan lac mel chuqui tac wen, mi caj lac sujtel ti ñumen wem bʌ xcʌntesa, mi caj i ñumen pʼʌtʼan lac ñopoñel yicʼot mi caj lac ñumen cʼuxbin Jehová (w22.01, página 30 yicʼot 31).
¿Chucoch yomʌch mi lac ñop ti Jehová yicʼot jiñi waʼchocobil bʌ i chaʼañob?
Ili ora yom mi lac ñop chaʼan weñʌch bajcheʼ miʼ mel i yeʼtel Jehová. Mi lac mel iliyi cheʼ bʌ mucʼʌch lac jacʼ chuqui miʼ yʌlob jiñi ancianojob. Cheʼ tiʼ yorajlel jiñi cabʌl wocol, mucʼʌch caj lac jacʼ jiñi muʼ bʌ lac subentel anquese mach jiñic ñumen wem bʌ mi laj qʼuel (w22.02, página 4 cʼʌlʌl 6).
¿Chucoch juntiquil ángel tiʼ sube Zacarías chaʼan mi caj i qʼuel jiñi plomo tiʼ cʼʌb Zorobabel? (Zac. 4:8-10).
Woliʼ suben jiñi i tejclum Dios chaʼan mucʼʌch caj i yujtesʌntel jiñi templo i mi caj i tsʼʌctesan chuqui miʼ cʼajtin Jehová anquese an mach bʌ wen ñuquic miʼ qʼuelob jiñi templo (w22.03, página 16 yicʼot 17).
¿Chuqui miʼ mejlel lac mel chaʼan mi la cʌcʼ wem bʌ ejemplo ti bajcheʼ mi lac chaʼlen tʼan? (1 Tim. 4:12).
Yom utset yicʼot wen jach bajcheʼ maʼ chaʼlen tʼan ti subtʼan, chaʼlen cʼay yicʼot a tijicñʌyel ti tempa bʌ, ñʌmtesan a bʌ a wʌcʼ a comentario, alʌ chuqui i sujm bʌ tiʼ pejtelel ora, ñuqʼuesʌben i pusicʼal yañoʼ bʌ yicʼot mach a wʌl muʼ bʌ i low yambʌlob (w22.04, página 6 cʼʌlʌl 9).
¿Chucoch jiñi jontol bʌ bʌteʼel muʼ bʌ i yʌjlel ti Apocalipsis 13:1, 2 cheʼ yilal bajcheʼ jiñi chʌncojt jontol bʌ bʌteʼel (yumʌlob) muʼ bʌ i yʌjlel ti Daniel capítulo 7?
Jiñi jontol bʌ bʌteʼel muʼ bʌ i yʌjlel ti Apocalipsis 13 mach yomic jach i yʌl juntiquil yumʌl o jumpʼejl yumʌntel, bajcheʼ Roma. Jiñobʌch jiñi yumʌlob ñumen añoʼ bʌ i pʼʌtʌlel tiʼ tojlel lac piʼʌlob cʼʌlʌl ti wajali (w22.05, página 9).
¿Bajcheʼ junchajp mi lac pʌs chaʼan mucʼʌch lac ñop chaʼan Jehová miʼ mel chuqui toj?
Mi an majqui miʼ ticʼlañonla, miʼ pʼajonla o miʼ melbeñonla mach bʌ weñic, mi lac chaʼlen wersa laj cʌy jiñi michʼajel yicʼot michʼ pusicʼal, i mi laj cʌy jiñi wocol tac tiʼ cʼʌb Jehová. Jiñʌch mi caj i tojʼesan jiñi wocol tac am bʌ i yʌcʼʌ jiñi mulil (w22.06, página 10 yicʼot 11).
¿Chuqui yom cʼajal i chaʼan juntiquil hermano cheʼ bʌ miʼ mel oración yaʼ ti tempa bʌ?
Chaʼan jiñi oración tac mach chaʼañic miʼ tijqʼuel jiñi hermanojob o chaʼan miʼ ñusʌntel anuncio tac. Mach yomic miʼ cʼʌn «cabʌl tʼan tac», ñumento tiʼ tejchibal jiñi tempa bʌ (Mat. 6:7) (w22.07, página 24 yicʼot 25).
¿Bajcheʼ an i sujmlel cheʼ jiñi «tsaʼ bʌ i meleyob chuqui tac mach bʌ weñic» «mi caj i chʼojyelob chaʼan meloñel»? (Juan 5:29).
Mach jiñic woliʼ taj chaʼan mi caj i yʌqʼuentelob i toj i mul tiʼ caj tsaʼ bʌ i meleyob ti wajali. Yom i yʌl chaʼan mi caj i wen qʼuejlel bajcheʼ yilal miʼ melob majlel i bʌ cheʼ bʌ tsaʼix chaʼ chʼojyiyob (w22.09, página 18).
¿Chuqui ti anuncio tsiʼ yʌcʼʌ jiñi hermano Joseph Rutherford ti jumpʼejl colem tempa bʌ tsaʼ bʌ mejli ti septiembre, 1922?
Ti jumpʼejl colem tempa bʌ ti Cedar Point (Ohio, Estados Unidos), tsiʼ yʌlʌ: «¡Qʼuelela, wolix ti yumʌntel jiñi Rey! Jatetla jiñi yom bʌ mi laʼ wʌcʼ ti cʌjñel. Jin chaʼan, acʼʌla ti cʌjñel, acʼʌla ti cʌjñel, acʼʌla ti cʌjñel jiñi Rey yicʼot i yumʌntel» (w22.10, página 3 cʼʌlʌl 5).
Cheʼ bajcheʼ miʼ yʌl Isaías capítulo 30, ¿bajcheʼ uxchajp miʼ coltañonla Dios chaʼan mi lac lʌtʼ jiñi wocol tac?
Ili capítulo miʼ pʌs chaʼan 1) miʼ wen ñʌchʼtan jiñi la coración yicʼot chaʼan mucʼʌch i jacʼ, 2) miʼ pʌsbeñonla jiñi bij yicʼot 3) miʼ yʌqʼueñonla bendición ti ili ora yicʼot ti talto bʌ qʼuin (w22.11, página 9).
¿Chucoch miʼ mejlel la cʌl chaʼan Salmo 37:10, 11, 29 tsaʼ tsʼʌctiyi ti wajali i mi caj i tsʼʌctiyel ti talto bʌ qʼuin?
Jiñi tsaʼ bʌ i tsʼijbu jiñi rey David tsiʼ pʌsʌ bajcheʼ yilal i ñʌchʼtʌlel tsiʼ taja jiñi tejclum Israel cheʼ bʌ tsiʼ chaʼle yumʌntel Salomón. Jesús tsiʼ taja ti tʼan jiñi versículo 11 cheʼ bʌ tsiʼ yʌlʌ chaʼan bʌ jiñi Paraíso ti talto bʌ qʼuin (Mat. 5:5; Luc. 23:43) (w22.12, página 8 cʼʌlʌl 10 yicʼot 14).