Jiñi xpejcaya juñob miʼ cʼajtibeñob i bʌ
¿Majquiyob jiñi «ángelob yajcʌbiloʼ bʌ» muʼ bʌ i yʌjlelob ti 1 Timoteo 5:21?
Jiñi apóstol Pablo tiʼ tsʼijbube majlel Timoteo, anciano bʌ jaʼel: «Tiʼ tojlel Dios, Cristo Jesús yicʼot jiñi ángelob yajcʌbiloʼ bʌ mic subeñet: Chʌn jacʼʌ ili tʼan tac pero mach a chaʼlen meloñel mi maxto a cʌñʌyic chuqui tsaʼ ujti yicʼot mach muqʼuic jach a yajcan majqui tiʼ tojlel maʼ mel» (1 Tim. 5:21). ¿Majquiyob jiñi «ángelob yajcʌbiloʼ bʌ» muʼ bʌ i tajtʌlob ti tʼan ilayi?
Chaʼan mi lac ñaʼtan majquiyob, laʼ lac ñaxan taj ti tʼan majquiyob mach bʌ ochemobic ti ili grupo. Pablo mach jiñic woli (choncol) i tajob ti tʼan jiñi 144 mil yajcʌbiloʼ bʌ chaʼan miʼ majlelob ti panchan. Come cheʼ bʌ tiʼ tsʼijbube majlel Timoteo maxto añic mi juntiquilic ungido yaʼ ti panchan. Jiñi apóstolob yicʼot jiñi yañoʼ bʌ yajcʌbiloʼ bʌ chaʼan miʼ majlelob ti panchan maxto ángelobic. Jin chaʼan, miʼ mejlel la cʌl chaʼan mach jiñobic jiñi «ángelob yajcʌbiloʼ bʌ» (1 Cor. 15:50-54; 1 Tes. 4:13-17; 1 Juan 3:2).
Mach jiñobic jaʼel jiñi jontol bʌ (mañajoʼ bʌ) ángelob añoʼ bʌ cheʼ bʌ tsaʼ ñumi jiñi Diluvio. Jiñi ángelob tsaʼ sujtiyob tiʼ wiñic Satanás, tsaʼ sujtiyob ti xiba yicʼot tiʼ contra Jesús (Gn. 6:2; Luc. 8:30, 31; 2 Ped. 2:4). Ti talto bʌ qʼuin Jesús mi caj i ñupʼob mil jab, ti wiʼil mi caj i jisan jiñi xibajob yicʼot Satanás (Jud. 6; Apoc. 20:1-3, 10).
Cheʼ bʌ miʼ tajtʌlob ti tʼan jiñi «ángelob yajcʌbiloʼ bʌ» yaʼ ti 1 Timoteo 5:21 miʼ tatʌlob ti tʼan jaʼel Dios yicʼot Cristo Jesús, jin chaʼan miʼ mejlel la cʌl chaʼan iliyob jiñobʌch jiñi xucʼul bʌ ángelob woliyoʼ bʌ (yʌqueloʼ bʌ) ti comol eʼtel yicʼot Dios yicʼot Jesucristo yaʼ ti panchan.
An yonlel ángelob xucʼuloʼ bʌ (Heb. 12:22, 23). Miʼ mejlel la cʌl chaʼan Jehová mach junlajalic bʌ eʼtel (troñel) miʼ yʌqʼueñob jiñi ángelob (Apoc. 14:17, 18). Laʼ laj cʼajtesan chaʼan ti jumpʼejl bʌ qʼuin juntiquil ángel tsaʼ aqʼuenti tiʼ wenta chaʼan miʼ jisan 185 mil soldadojob asiriojoʼ bʌ (2 R. 19:35). Cheʼ jaʼel, jiñi tsaʼ bʌ i yʌlʌ Jesús, miʼ yʌcʼ ti ñaʼtʌntel chaʼan junmojt ángelob mi caj i «chocob loqʼuel tiʼ Yumʌntel pejtelel chuqui miʼ yʌcʼ mulil yicʼot jiñi lac piʼʌlob muʼ bʌ i melob mach bʌ weñic» (Mat. 13:39-41). Tajol yañobʌch jaʼel muʼ bʌ caj i tempañob jiñi yajcʌbiloʼ bʌ chaʼan miʼ majlelob ti panchan (Mat. 24:31). I an yambʌ ángelob muʼ bʌ i subentelob chaʼan miʼ cʌntañonla baqui jach añonla, cheʼ bajcheʼ miʼ yʌl Salmo 91:11 (Mat. 18:10; laja yicʼot Mateo 4:11 i Lucas 22:43).
Mi laj qʼuel chaʼan jiñi «ángelob yajcʌbiloʼ bʌ» muʼ bʌ i yʌjlel ti 1 Timoteo 5:21 tajol jiñobʌch tsaʼ bʌ aqʼuentiyob tiʼ wenta i qʼuel jiñi congregación tac. Ti ili capítulo, Pablo woliʼ taj ti tʼan jiñi ancianojob, i miʼ suben jiñi yambʌ hermanojob chaʼan yomʌch miʼ qʼuelob ti ñuc ili wiñicob waʼchocobiloʼ bʌ. I jiñi ancianojob miʼ subentelob chaʼan yom wen bajcheʼ miʼ melob i yeʼtel yicʼot mach orajic miʼ waʼ chʼʌmob decisión tac. ¿Chucoch? Pablo tsiʼ yʌlʌ junchajp wen ñuc bʌ i cʼʌjñibal, tsiʼ yʌlʌ chaʼan ili hermanojob woliʼ melob i yeʼtel «tiʼ tojlel Dios, Cristo Jesús yicʼot jiñi ángelob yajcʌbiloʼ bʌ». Ili yom i yʌl chaʼan Jehová, Jesús yicʼot jiñi ángelob woliʼ qʼuelob bajcheʼ miʼ cʌntañob congregación jiñi ancianojob. Tsiquil miʼ pʌsbeñonla chaʼan an ángelob muʼ bʌ i yʌqʼuentelob tiʼ wenta chaʼan miʼ qʼuelob jiñi congregación, an muʼ bʌ i cʌntʌbeñob jiñi i wiñicob Jehová, muʼ bʌ i qʼuelob jiñi subtʼan yicʼot miʼ subeñob Jehová chuqui tac miʼ taj i qʼuelob (Mat. 18:10; Apoc. 14:6).