3. Qʼuele laʼ bɅ ti ñuc

¿CHUQUI YOM I YɅL?

Jiñi ñujpuñemoʼ bʌ muʼ bʌ i qʼuelob i bʌ ti ñuc miʼ pensariñob i bʌ, i mach yʌlʌyic mi mach lajalic chuqui miʼ ñaʼtañob. Jiñi libro Diez claves para transformar tu matrimonio miʼ yʌl: «Ili xñujpuñelob mach jiñic jach miʼ cʌytʌl yicʼotob jiñi muʼ bʌ i bajñel ñaʼtañob ti jujuntiquil, miʼ tem alob i wocolob, miʼ ñʌchʼtañob chuqui miʼ subeñob i bʌ yicʼot miʼ melob chuqui wem bʌ miʼ cʼotel i lajal ñaʼtañob».

PRINCIPIO AM BɅ TI BIBLIA: «Jiñi am bʌ i cʼuxbiya [...] maʼañic miʼ bajñel sʌclan i wenlel» (1 Corintios 13:4, 5).

«Chaʼañon, cheʼ mij qʼuel ti ñuc quijñam, yom i yʌl chaʼan mij cʼuxbin i chaʼan maʼañic chuqui mic mel muʼ bʌ mejlel i low o muʼ bʌ mejlel i ticʼlan jiñi lon c ñujpuñel» (Michael).

¿CHUCOCH ÑUC I CʼɅJÑIBAL?

Cheʼ bʌ jiñi ñujpuñemoʼ bʌ maʼañic miʼ qʼuelob i bʌ ti ñuc, chuqui jach miʼ waʼ subeñob i bʌ o miʼ lowob i bʌ tiʼ tʼan. Jiñi expertojob miʼ yʌlob chaʼan pejtelel ili, woliʼ tech i pʌs chaʼan mi caj i yujtel jumpʼejl divorcio.

«Cheʼ maʼ suben mach bʌ weñic tʼan, maʼ suben cʼux bʌ tʼan o maʼ wajlen jiñi a wijñam, mi caj a wʌqʼuen i chʼijyemlel i maʼañix mi caj i chʼʌmet ti ñuc» (Brian).

¿CHUQUI MIʼ MEJLEL A MEL?

ÑAʼTAN ILIYI

Ñaʼtan bajcheʼ an a chaʼle tʼan a wicʼot a piʼʌl yicʼot chuqui an a melbe ti jiñi semana tsaʼix bʌ ñumi. Cheʼ jiñi jacʼʌ ili cʼajtiya tac:

• ¿Jayajl tsaʼ sube mach bʌ weñic i jayajl tsaʼ sube chuqui wem bʌ?

• ¿Bajcheʼ tac tsaʼ pʌsbe chaʼan maʼ qʼuel ti ñuc?

TEM ALɅLA

• ¿Chuqui ti tʼan tac yicʼot melbalʌl tac miʼ yʌqʼueñonla la cubin chaʼan mi laj qʼuel lac bʌ ti ñuc?

• ¿Chuqui ti tʼan tac yicʼot melbalʌl tac miʼ yʌqʼueñonla la cubin chaʼan maʼañic mi laj qʼuel lac bʌ ti ñuc?

MUʼ BɅ MEJLEL LAʼ MEL

• Ti jujuntiquiletla tsʼijbunla ti jun uxchajp laʼ wom bʌ chaʼan jiñi laʼ piʼʌl miʼ mel chaʼan miʼ pʌs chaʼan miʼ qʼueletla ti ñuc. Cheʼ jiñi, qʼuexben laʼ bʌ jiñi lista i chaʼlenla wersa chaʼan mi laʼ melben laʼ bʌ cheʼ bajcheʼ laʼ wom.

• Tsʼijbun jiñi wen tac bʌ i melbal a piʼʌl muʼ bʌ a mulan i suben chaʼan maʼ wen qʼuel ti ñuc.

«Chaʼañon, cheʼ mij qʼuel ti ñuc c ñoxiʼal, yom i yʌl chaʼan mic pʌsben tic melbal chaʼan mij qʼuel ti ñuc yicʼot chaʼan com chaʼan tijicña. An i tajol mach cʼʌñʌlic wen ñuc chuqui mi lac mel chaʼan mi lac pʌsben jiñi lac piʼʌl chaʼan mi laj qʼuel ti ñuc» (Megan).

Ñuc bʌ i cʼʌjñibal jiñʌch cheʼ jiñi a piʼʌl miʼ yubin chaʼan mucʼʌch a qʼuel ti ñuc, mach jiñic cheʼ maʼ ñaʼtan chaʼan wolʌch a qʼuel ti ñuc.

PRINCIPIO AM BɅ TI BIBLIA: «Pʌsʌla jiñi ñuc bʌ pʼuntaya, laʼ wutslel, laʼ pecʼlel, mach laʼ wotsan laʼ bʌ ti wocol yicʼot pʌsʌla laʼ pijt» (Colosenses 3:12).