12. Aqʼuen A bɅ Meta Tac

¿CHUQUI YOM I YɅL?

Jumpʼejl meta mach jumpʼejlic ñajal o jiñi a wom bʌ chaʼan cheʼʌch miʼ yujtel. Chaʼan maʼ taj yomʌch maʼ chajpan yicʼot maʼ chaʼlen wersa chaʼan maʼ taj.

An meta tac orajach bʌ mi lac taj i an maʼañic bʌ, an muʼ bʌ i ñumel chaʼpʼej uxpʼejl qʼuin, chaʼpʼej uxpʼejl uw o cabʌl jab chaʼan mi lac taj. Chaʼan mi lac taj jumpʼejl meta muʼ bʌ i wen jalʼan an chuqui tac yom mi lac xucʼu mel majlel.

¿CHUCOCH ÑUC I CʼɅJÑIBAL?

Cheʼ bʌ maʼ chaʼlen wersa chaʼan maʼ taj a meta tac miʼ coltañet chaʼan ñumen chajpʌbilet maʼ wubin a bʌ, ñumen wen mi caj a wajñel a wicʼot a wamigojob yicʼot ñumen tijicña mi caj a wubin a bʌ.

Ñumen chajpʌbilet maʼ wubin a bʌ. Mi mucʼʌch a wʌqʼuen a bʌ alʌ meta tac i mi mucʼʌch a taj, maʼañic mi caj a bʌcʼñan chaʼan maʼ wʌqʼuen a bʌ ñuc bʌ meta tac. Cheʼ jaʼel, maʼañic mi caj a bʌcʼñan a ñusan jiñi wocol tac mejl bʌ a taj ti jujumpʼejl qʼuin, jumpʼejl ejemplo, cheʼ bʌ jiñi a piʼʌlob ti escuela miʼ xiqʼuetob a mel mach bʌ weñic.

Ñumen wen mi caj a wajñel a wicʼot a wamigojob. Ti lac pejtelel mi lac mulan ajñel la quicʼot jiñi yujilʌch bʌ chuqui yom yicʼot muʼ bʌ i chaʼlen wersa chaʼan miʼ taj jiñi yom bʌ. Cheʼ jaʼel, cheʼ mi lac chaʼlen wersa lac taj jumpʼejl meta la quicʼot jiñi la camigojob, miʼ coltañonla chaʼan ñumen wen mi la cajñel la quicʼotob.

Ñumen tijicña mi caj a wubin a bʌ. Cheʼ bʌ maʼ wʌqʼuen a bʌ meta tac i mucʼʌch a taj, maʼ wubin a tijicñʌyel.

«Mic mulan cʌqʼuen c bʌ meta tac come miʼ yʌqʼueñon chaʼan an chuqui mic mel i miʼ coltañon chaʼan mic chaʼlen wersa chaʼan mic tajeʼ. Wen utsʼatax cheʼ mi lac taj jumpʼejl meta, cheʼ mi lac chaʼ ñaʼtan lac bʌ i mi la cʌl: ‹¡Tsaʼʌch mejliyon!› » (Christopher).

PRINCIPIO AM BɅ TI BIBLIA: «Mux caj i toʼol ñumel i yorajlel pacʼ mi woli jach a chʌcʌ qʼuel jini icʼ. Mi wolaʼ chʌcʌ qʼuel tocal, mach muqʼuic a chaʼlen cʼajbal» (Eclesiastés 11:4).

¿CHUQUI MIʼ MEJLEL A MEL?

Chaʼan maʼ wʌqʼuen a bʌ meta tac yicʼot maʼ taj, mele iliyi.

Yajcan chuqui ti meta tac a wom a taj. Tsʼijbun pejtelel muʼ bʌ i tilel ti a jol, i cheʼ jiñi yajcan baqui mi caj a tech.

Yajcan chuqui mi caj a mel. Mele iliyi ti jujumpʼejl a meta:

• Tsʼijbun jala a wom a taj.

• Tsʼijbun chuqui tac mi caj a mel chaʼan maʼ taj.

• Qʼuele chuqui tac ti wocol miʼ mejlel a taj i bajcheʼ miʼ mejlel a mʌlben.

Teche a mel. Mach wersajic yom a wujil pejtelel chuqui yom maʼ mel chaʼan maʼ tech. Ñaʼtan chuqui yom maʼ ñaxan mel chaʼan maʼ taj jiñi a meta, i mele. Chʌcʌ qʼuele bajcheʼ yilal woli a majlel ti jiñi a meta.

PRINCIPIO AM BɅ TI BIBLIA: «Jini bʌx bʌ ti eʼtel muʼ bʌ i ñaʼtan chuqui yom i mel miʼ yʌcʼ ti pʼojlel i chubʌʼan» (Proverbios 21:5).