Jiñi chʼijyemlel muʼ bʌ la cubin cheʼ an majqui miʼ chʌmel lac chaʼan

«Ñumeñix ti 39 jab ñujpuñemon quicʼot Sofíaa cheʼ bʌ tsaʼ chʌmi tiʼ caj jumpʼejl cʼamʌjel. Jiñi camigojob tsiʼ wen coltayoñob, i tsaʼ c sʌcla chuqui mic mel ti jujumpʼejl qʼuin. Pero jumpʼejl jab wen chʼijyemon tsaʼ cubi c bʌ. Cabʌl jax bajcheʼ tsaʼ caji cubin c bʌ. I cʼʌlʌl ili ora, anquese tsaʼix ñumi uxpʼejl jab, an i tajol miʼ wen tilel c chʼijyemlel» (Kostas).

¿Am ba majqui chʌmen (sajtem) a chaʼan? Mi añʌch, tajol cheʼ tsaʼ wubi a bʌ bajcheʼ Kostas. Maʼañic yambʌ muʼ bʌ i wen aqʼueñonla lac chʼijyemlel o pensar bajcheʼ cheʼ miʼ chʌmel lac ñoxiʼal, la quijñam, juntiquil lac familia o juntiquil wem bʌ la camigo. Jiñi am bʌ i wen chaʼleyob ti estudiar iliyi miʼ yʌlob chaʼan cheʼʌchi. Ti jumpʼejl tema tsaʼ bʌ loqʼui yaʼ ti revista The American Journal of Psychiatry miʼ yʌl chaʼan «cabʌl lac piʼʌlob miʼ ñaʼtañob chaʼan cheʼ bʌ an majqui miʼ chʌmelob i chaʼan maʼañix baʼ ora mi caj i chʌn qʼuelob i wen cʼux miʼ yubiñob». Cheʼ bʌ an majqui miʼ chʌmel i chaʼan, tajol miʼ cʼajtiben i bʌ: «¿Jalatoqui mi caj j cʌy cubin c chʼijyemlel? ¿Muʼ ba caj c chaʼ ubin c tijicñʌyel baʼ ora? ¿Baqui miʼ mejlel c taj i ñuqʼuesʌntel c pusicʼal?».

Ili revista ¡Jamʌx a wut! mi caj i jacʼ jiñi cʼajtiya tac. Jiñi yambʌ tema mi caj i yʌl jiñi wocol tac tajol woli (choncol) bʌ a ñusan mi an majqui tsaʼ chʌmi a chaʼan poj maxto jali. I ti jiñi yambʌ tema tac mi caj a subentel chuqui tac miʼ mejlel a mel chaʼan miʼ mejlel a ñusan majlel jiñi a chʼijyemlel.

Com lojon chaʼan ili revista miʼ ñuqʼuesʌben i pusicʼal yicʼot miʼ coltan pejtelel jiñi am bʌ majqui tsaʼ chʌmiyob i chaʼan.