4. ¿Tsaʼ ba i meleyonla Dios chaʼan mi lac ñusan wocol?

¿Chucoch ñuc i cʼʌjñibal cheʼ la cujil i jacʼbal?

Come miʼ coltañonla bajcheʼ yilal mi laj qʼuel laj cuxtʌlel.

Ñaʼtancu iliyi

¿Chucoch jiñi Dios tsaʼ bʌ i mele wen utsʼatax bʌ lac chumlib miʼ yʌcʼ chaʼan mi lac ñusan wocol?

An lac piʼʌlob mach bʌ xñoptʼañobic muʼ bʌ i tajob ti tʼan jiñi wocol tac chaʼan miʼ yʌlob chaʼan lolom jach tsiʼ meleyonla jiñi Dios o chaʼan miʼ yʌcʼob ti ñaʼtʌntel chaʼan maʼañic majqui tsiʼ Meleyonla (Pʌtʌyonla). Miʼ ñopob chaʼan jiñi wocol tac miʼ pʌs chaʼan: 1) Jiñi Dios mach mejlic i jisan jiñi wocol tac, 2) mach yomic i mel o 3) chaʼan maʼañic Dios.

Pero ¿anto ba yambʌ chucoch mi lac ñusan jiñi wocol?

Muʼ bʌ i yʌl jiñi Biblia

Dios maʼañic tsiʼ meleyonla chaʼan mi lac ñusan wocol

Yom chaʼan tijicña mi lac chumtʌl.

«Yom tijicñayonla anquese ti pʼisol jach bajcheʼ miʼ mejlel. Jiñʌch yom bʌ. Maʼanic yambʌ. Yom jaʼel mi lac chaʼlen weʼel, mi lac chaʼlen uchʼel. Yom mi lac taj i chobejtʌbal la queʼtel, come lac majtañʌch tilem bʌ ti Dios» (ECLESIASTÉS 3:12, 13).

Luʼ tojʌch chuqui an ti pañimil cheʼ bʌ Dios tsiʼ mele Adán yicʼot Eva

Dios mach yomic chaʼan miʼ ñusañob wocol mi jiñicto i pʼolbalob.

«Dios tsiʼ yʌqʼueyob i yutslel i tʼan. Dios tsiʼ subeyob: Laʼ pʼojliquetla. Butʼula jini pañimil. Cʼʌñʌla. Laʼ i yumañetla jini chʌy yicʼot jini mut yicʼot pejtel cuxul tac bʌ muʼ bʌ ti xʌmbal ti pañimil» (GÉNESIS 1:28).

Adán yicʼot Eva tsiʼ ñusʌbeyob i tʼan Dios

Tiʼ caj i ñusatʼañob tsiʼ tajayob cabʌl wocol i tsiʼ ñusʌbeyob jaʼel jiñi i pʼolbalob.

«Tsaʼ ochi mulil ti pañimil chaʼan tiʼ mul juntiquil winic i cʼabaʼ Adán. Jini mulil tsiʼ yʌcʼʌ ti chʌmel pejtel winicob xʼixicob. Jini chaʼan mi lac chʌmel ti lac pejtelel, come tsaʼ lac chaʼle mulil ti lac pejtelel» (ROMANOS 5:12).a

Maʼañic tsiʼ meleyonla Dios chaʼan mi lac bajñel tojʼesan lac bʌ

Cheʼ bajcheʼ maʼañic tsaʼ mejliyonla chaʼan mi lac chumtʌl tiʼ yebal jaʼ, cheʼ jaʼel maʼañic tsaʼ mejliyonla chaʼan mi lac bajñel yuman lac bʌ.

«Maʼanic i ñaʼtʌbal winic chaʼan miʼ bajñel tojʼesan majlel i bʌ. Mach mejlic i bajñel yajcan i bijlel» (JEREMÍAS 10:23).

Dios mach yomic mi lac ñusan wocol

Miʼ yʌqʼueñonla ticʼojel tac chaʼan maʼañic mi lac taj cabʌl wocol

«Tsaʼic a jacʼʌ c mandar, cabʌlix i ñʌchʼtilel a pusicʼal cheʼ bajcheʼ colem jaʼ woli bʌ ti ajñel» (ISAÍAS 48:18).