Cʌñʌ baqui bʌ i sujmlel

Jiñi wocol

An qʼuiñil mi lac tsʼaʼ qʼuel yambʌlob tiʼ caj mach i sujmic chuqui la cujil bʌ tiʼ tojlelob. Jumpʼejl ejemplo:

An qʼuiñil jiñi yumob ti eʼtel (troñel), miʼ ñaʼtañob chaʼan jiñi xʼixicob maʼañic miʼ mejlelob ti eʼtel baqui yom an cabʌl lac pʼʌtʌlel o lac ñaʼtʌbal.
Jiñi wiñicob xʼixicob (quixtañujob) an qʼuiñil miʼ yʌlob chaʼan jiñi chʼoyoloʼ bʌ ti yambʌ tejclum chil eʼtel jach miʼ cʼotelob.
An cabʌl muʼ bʌ i yʌlob chaʼan jiñi xpotsʼob, xcojcob o jiñi maʼañic bʌ miʼ mejlelob ti xʌmbal mach tijicñayobic yicʼot maʼañic chuqui miʼ mulañob i mel (chaʼlen).

Jiñi quixtañujob muʼ bʌ i ñopob iliyi, yaʼʌch miʼ chucob i bʌ chaʼan i sujmʌch bajcheʼ miʼ ñaʼtañob, i miʼ yʌlob chaʼan jiñi mach bʌ cheʼic miʼ ñaʼtañob maʼañic chuqui yujilob.

Principio am bʌ ti Biblia

«Mach yomic mi lac bʌcʼ mel bajcheʼ jach yom lac pusicʼal» (PROVERBIOS 19:2).

¿Chuqui yom i yʌl ili? Mi mach luʼ la cujilic i sujmlel, mi lac mejlel ti ñajʌyel. Mi jin jach mi lac chʼʌm ti ñuc muʼ bʌ lac subentel, i mach jiñic bajcheʼ ñoj an i sujmlel, tajol mach weñic chuqui mi caj lac ñaʼtan tiʼ tojlel yambʌlob.

¿Bajcheʼ miʼ coltañonla cheʼ mi lac ñaxan wen cʌn juntiquil lac piʼʌl?

Cheʼ lac wen cʌñʌ juntiquil lac piʼʌl, maʼan mi caj lac waʼ ñop chuqui mach bʌ i sujmic miʼ yʌjlel tiʼ tojlel. I cheʼ bʌ miʼ cʼotel lac ñaʼtan chaʼan lot jach tsaʼ bʌ subentiyonla tiʼ tojlel, mi caj laj cʼajtiben lac bʌ miʼ sujmʌch o mach i sujmic am bʌ la cubi tiʼ tojlel yambʌlob jaʼel.

Tsaʼ bʌ ujti tiʼ tojlel: Yovitsa (Sureste de Europa)

Yovitsa, tsaʼix bʌ lac taja ti tʼan, cʼʌlʌl cheʼ bʌ chutto tsaʼ caji i yubin chaʼan jiñi yaʼ bʌ chumulob tiʼ tʼejl, jiñi noticia tac yicʼot ti televisión miʼ yʌlob mach bʌ weñic tiʼ tojlel junmojt quixtañujob. Miʼ yʌl: «Mi joñoñicto com j qʼuelob jaʼel, mic wen tsʼaʼleñob. I tsaʼ c ñaʼta chaʼan machʌch lolomic cheʼ mi cubin bajcheʼ jiñi».

«Pero cheʼ bʌ soldadojon tsaʼ comol ajñiyon quicʼot jiñi quixtañujob. Pero xucʼu xucʼul tsaʼ caji c ñumen cʌñob majlel. Tsaʼ caji j cʌn jiñi tʼan yujiloʼ bʌ yicʼot tsaʼ caji c ñʌchʼtan jiñi música muʼ bʌ i ñʌchʼtañob. Tijicña tsaʼ caji c ñusan quicʼotob, i tsaʼ caji ti qʼuextʌyel majlel c pensar tiʼ tojlelob. Pero come mach wocolic miʼ mejlel ti chaʼ qʼuextʌyel jiñi c pensar, maʼañic mic ñʌchʼtan noticia tac baqui mach weñic chuqui miʼ yʌjlel tiʼ tojlelob i maʼañic mij qʼuel película o programa tac baqui miʼ wajlentelob. Cujil chaʼan mi mach weñic chuqui mi lac ñaʼtan tiʼ tojlel yambʌlob miʼ yʌcʼonla chaʼan mi lac tsʼaʼleñob».

¿Chuqui yom maʼ mel?

Mach a ñaʼtan chaʼan junlajalob. Tajol an chuqui mach weñic mi lac taj laj qʼuel tiʼ tojlel juntiquil quixtañu, pero mach yomic i yʌl chaʼan luʼ cheʼob yaʼ baqui tilem.
Ñaʼtan chaʼan mach luʼ a wujilic tiʼ tojlelob.
Mi an chuqui a wom a ñaʼtan tiʼ tojlel yambʌlob, sʌclan baqui miʼ yʌjlel chuqui i sujm bʌ.