Sujtesan jiñi yambʌlob ti a wamigojob
Jiñi wocol
Mi mach comic lac ñochtan jiñi muʼ bʌ lac ñaʼtan mach bʌ weñic tiʼ tojlelob, miʼ mejlel lac ñumen tech lac tsʼaʼleñob. I mi jiñi la camigojob lajalob jach bajcheʼ joñonla, miʼ mejlel lac ñaʼtan chaʼan jin jach ñumen wem bʌ bajcheʼ mi lac chaʼlen pensar, bajcheʼ mi la cubin lac bʌ yicʼot muʼ bʌ lac mel.
Principio am bʌ ti Biblia
‹Jamʌla laʼ pusicʼal› (2 CORINTIOS 6:13).
¿Chuqui yom i yʌl ili? Jiñi tʼan pusicʼal, yom i yʌl, cheʼ bajcheʼ yubil mi la cubin lac bʌ. Mi cojach jin com laj qʼuel jiñi wiñicob xʼixicob (quixtañujob) lajaloʼ bʌ bajcheʼ joñonla, lajal bajcheʼ mi lac ñupʼben lac pusicʼal jiñi yambʌlob. Mi mach cheʼic la com chaʼan mi la cujtel, laʼ lac sujtesan ti la camigojob jiñi qʼuexeloʼ bʌ bajcheʼ joñonla.
¿Bajcheʼ miʼ coltañonla cheʼ bʌ mi lac sujtesan jiñi yambʌlob ti la camigojob?
Cheʼ bʌ an majqui miʼ cʼotel lac wen cʌn, mi lac ñumen chʼʌmben i sujm chucoch qʼuexel chuqui tac miʼ mel. I cheʼ bʌ mi lac tech laj cʼuxbiñob, mi lac ñajʌtesan chaʼan yañʌlobʌch bajcheʼ joñonla. Mi lac ñumen qʼuelob ti ñuc. I cheʼ bʌ tijicñayob, tijicñayonla jaʼel i cheʼʌch mi la cubin jaʼel cheʼ bʌ chʼijyemob.
Laʼ laj cʌn tiʼ tojlel Nazaré, tsaʼ bʌ i chaʼle wersa chaʼan miʼ cʌy i tsʼaʼlen jiñi tilemoʼ bʌ ti yambʌ país. Miʼ yʌl: «Tsaʼ wen ajñi quicʼotob i tsaʼ lon c chaʼle eʼtel (troñel). Tsaʼ j cʌñʌ jiñi lac piʼʌlob mach bʌ lajalobic bajcheʼ tsaʼ subentiyon. Cheʼ maʼ sujtesan ti a wamigojob jiñi yʌñʌloʼ bʌ i cultura, maʼ cʌn chaʼan mach yomic maʼ wʌlob, maʼ cʼotel a cʼuxbiñob yicʼot a qʼuelob ti ñuc».
¿Chuqui yom maʼ mel?
Chaʼlen wersa chaʼan maʼ pejcan jiñi quixtañujob yambʌyoʼ bʌ i país, i colorlel i pʌchʌlel o jiñi tʼan yujiloʼ bʌ. Mele ili tac:
Cʼajtibeñob chaʼan miʼ yʌlob tiʼ tojlelob.
Pʌyʌyob ti uchʼel.
Ñʌchʼtan chuqui miʼ yʌlob i ñaʼtan chuqui i cʼʌjñibal i chaʼañob.
Mi mucʼʌch a chaʼlen wersa a chʼʌmben i sujm chuqui an i ñusayob, mi caj a chʼʌmben i sujm chucoch cheʼ miʼ melob (chaʼleñob) bajcheʼ jiñi, i ñumen weñix chuqui mi caj a ñaʼtan tiʼ tojlelob.