Jiñi tecnología miʼ mejlel i yʌcʼ ti wocol jiñi a ñaʼtʌbal

Jiñi muʼ bʌ i wen cʼʌñob jiñi tecnología miʼ mejlel i tajob wocol bajcheʼ tac iliyi:

• Wocol miʼ yubiñob chaʼan yaʼ jach miʼ cʌyob i ñaʼtʌbal ti chuqui woliʼ pejcañob.

• Maʼañic miʼ mejlel i xucʼchocoñob i pensal.

• Cheʼ i bajñelob jach mach ñumel qʼuin miʼ yubiñob.

YOM BɅ MAʼ CɅN

CHEʼ BɅ AN CHUQUI MI LAC PEJCAN

An lac piʼʌlob cheʼ jach bʌ miʼ pam pejcañob pero maʼañic miʼ chaʼleñob wersa chaʼan miʼ chʼʌmbeñob i sujm chuqui miʼ pejcañob.

Cheʼ bʌ an chuqui mi lac pam pejcan miʼ mejlel i coltañonla lac taj ti ora i jacʼbal jumpʼejl cʼajtiya. Pero maʼañic mi caj i coltañonla lac chʼʌmben i sujm mi an com bʌ lac ñumen ñaʼtan.

ÑAʼTANCU ILI: ¿Wocol ba maʼ wubin cheʼ bʌ maʼ pejcan jumpʼejl texto wem tam bʌ? ¿Chucoch mucʼʌch caj i coltañet cheʼ maʼ chaʼlen wersa a ñumen chʼʌmben i sujm? (PROVERBIOS 18:15).

CHEʼ MI LAC XUCʼCHOCON LAC PENSAL

An cabʌl muʼ bʌ i ñaʼtañob chaʼan jiñi tecnología cabʌl bajcheʼ miʼ coltañob, jumpʼejl ejemplo, tajol miʼ mejlel i chocob majlel mensaje cheʼ bʌ an chuqui woliʼ pejcañob. Pero miʼ maʼan miʼ chʼʌm ti ñuc woli bʌ i mel tiʼ caj chaʼan an yambʌ chuqui woliʼ ñaʼtan, ti wiʼil mi jumpʼejlic miʼ mel ti wen.

Chaʼan mi lac xucʼchocon lac pensal yom mi lac ticʼ lac bʌ. Pero ñuc i cʼʌjñibal cheʼ mi lac mel jiñi. Juntiquil xchʼoc i cʼabaʼ Grace miʼ yʌl: «Ñumen wen chuqui maʼ mel i maʼañic maʼ wen cʼojoʼtan a bʌ. An j qʼuele chaʼan ñumen weñʌch cheʼ junsujm jach chuqui mi lac ñaʼtan lac mel i mach jiñic cheʼ cabʌl jax chuqui com lac mel».

ÑAʼTANCU ILI: Cheʼ bʌ cabʌl jax chuqui maʼ ñop a mel, ¿wocol ba maʼ wubin chaʼan maʼ chʼʌmben i sujm yicʼot maʼ chaʼ cʼajtesan tsaʼ bʌ a pejca? (PROVERBIOS 17:24).

CHEʼ LAC BAJÑEL JACH

An lac piʼʌlob maʼañic miʼ mulañob cheʼ i bajñelob i cheʼ maʼañic chuqui miʼ melob. Jin chaʼan miʼ cʼʌñob jiñi celular o tableta chaʼan mach cheʼic miʼ yubiñob i bʌ. Juntiquil xʼixic i cʼabaʼ Olivia miʼ yʌl: «Mach mejlic ti ñumel 15 minuto yubil cheʼ maʼañic mij qʼuel c celular o tableta, o cheʼ maʼañic mic tsʼʌb jiñi televisión. Mach ñumelic qʼuin yubil».

Ti lac pejtelel i cʼʌjñibalʌch lac chaʼan cheʼ mi lac jumucʼ bajñel ajñel chaʼan mi la cʌqʼuen i yorajlel mi lac wen ñaʼtan chuqui mi laj cʌn. Ili wen ñucʌch i cʼʌjñibal.

ÑAʼTANCU ILI: Cheʼ bʌ a bajñel jach, ¿muʼ baʼ chaʼlen wersa a chaʼ ñaʼtan muʼ bʌ a cʌn? (1 TIMOTEO 4:15).

MUʼ BɅ I MEJLEL A MEL

ÑAʼTAN BAJCHEʼ WOLI A CʼɅN JIÑI TECNOLOGÍA

¿Bajcheʼ miʼ coltañet jiñi tecnología chaʼan an cabʌl chuqui maʼ ñumen cʌn? ¿I bajcheʼ miʼ mejlel i yʌqʼuet ti wocol cheʼ bʌ yaʼ jach yom maʼ wʌcʼ a ñaʼtʌbal ti jiñi woli bʌ a cʌn?