Ñuc i cʼʌjñibal jiñi i jacʼbal

¿Chucoch wen ñuc i cʼʌjñibal cheʼ maʼ cʌn mi an juntiquil tsaʼ bʌ i mele chuqui tac an? Come, mi mucʼʌch a ñop chaʼan añʌch juntiquil Dios wen pʼʌtʌl bʌ, tajol mi caj a mulan a cʌn mi jiñi Biblia tilemʌch ti Dios. I ti wiʼil, mi mucʼʌch a ñop ti jiñi Biblia, mi caj a taj ili wenlel tac.

Mi caj a ñumen ñusan a bʌ ti a cuxtʌlel

JIÑI BIBLIA MIʼ YɅL: Dios tsiʼ mele «chuqui tac wen. Tsiʼ yʌqʼueyob jaʼal yicʼot cabʌl i wut i pʌcʼʌʼob, tsiʼ yʌqʼueyob cabʌl i bʌl i ñʌcʼ i tsiʼ butʼbeyob i pusicʼal tiʼ tijicñʌyel» (Hechos 14:17).

¿CHUQUI YOM I YɅL? Pejtelel jiñi an tac bʌ jumpʼejlʌch lac majtan tsaʼ bʌ i yʌqʼueyonla Dios. Cheʼ bʌ maʼ cʌn ti Biblia bajcheʼ cʼamel miʼ ñaʼtañet mi caj a ñumen ñusan a bʌ ti ili majtañʌl tac.

Mi caj a taj wen tac bʌ ticʼojel

JIÑI BIBLIA MIʼ YɅL: «Cheʼ jini mux caj a cʌn jini toj bʌ i pusicʼal yicʼot toj bʌ i tʼan yicʼot toj bʌ i melbal. Mux caj a mel pejtel chuqui tac wen» (Proverbios 2:9).

¿CHUQUI YOM I YɅL? Dios yujil chuqui miʼ mejlel i yʌqʼueñet a tijicñʌyel come jiñʌch tsaʼ bʌ i meleyet. Mi mucʼʌch a tsajin muʼ bʌ i yʌl jiñi Biblia, mi caj a taj wen tac bʌ ticʼojel muʼ bʌ caj i coltañet.

Mi caj a tajben i jacʼbal a cʼajtiya tac

JIÑI BIBLIA MIʼ YɅL: «Mux caj a cʌn Dios» (Proverbios 2:5).

¿CHUQUI YOM I YɅL? Cheʼ a wujil chaʼan an juntiquil tsaʼ bʌ i mele pejtelel chuqui tac an mi caj i coltañet a tajben i jacʼbal cʼajtiya tac wen ñuc bʌ i cʼʌjñibal, cʼajtiya tac bajcheʼ: ¿Baqui bʌ i sujmlel laj cuxtʌlel?, ¿chucoch an cabʌl wocol? O ¿chuqui miʼ chaʼleñob jiñi lac piʼʌlob cheʼ bʌ miʼ chʌmelob? Mi caj a tajben wen tac bʌ i jacʼbal ti Biblia.

Mi caj a taj a pijtaya chaʼan talto bʌ qʼuin

JIÑI BIBLIA MIʼ YɅL: «Cujil chuqui com c melbeñetla, cheʼen lac Yum. Com ñʌchʼʌletla. Mach comic miʼ tajetla wocol. Com cʌqʼueñetla chuqui utsʼat woli bʌ laʼ pijtan» (Jeremías 29:11).

¿CHUQUI YOM I YɅL? Dios miʼ yʌl chaʼan mi caj i jisan jiñi jontolil, jiñi wocol yicʼot jiñi chʌmel. Mi mucʼʌch a ñop muʼ bʌ i yʌl Dios, mi caj a taj a chʼejlel chaʼan maʼ lʌtʼ jiñi wocol tac ti jujumpʼejl qʼuin.

Cheʼ yujilob chaʼan añʌch majqui tsiʼ mele chuqui tac an, tsaʼʌch i coltayob

«Muʼto i bej acʼ ti toj sajtel c pusicʼal cheʼ bʌ mij qʼuel chaʼan cabʌl bajcheʼ miʼ coltañon Dios, jumpʼejl ejemplo, miʼ coltañon c ñaʼtan baqui bʌ jiñi ñumen ñuc bʌ i cʼʌjñibal, chaʼan mic tojʼesan c wocol tac yicʼot chaʼan mij qʼuel bajcheʼ juntiquil camigo» (Cyndi, Estados Unidos).

«Cheʼ cujil chaʼan añʌch majqui tsiʼ mele chuqui tac an miʼ yʌqʼuen i tijicñʌyel j cuxtʌlel. Maʼañic baʼ ora mij cʼojyel come tiʼ pejtelel ora an cabʌl chuqui miʼ mejlel j cʌn tiʼ tojlel, ti chuqui tac melbil i chaʼan o tiʼ Tʼan» (Elise, Francia).

«Wocolix i yʌlʌ jiñi ticʼojel tac muʼ bʌ i yʌqʼueñonla Dios ti Biblia, ñumen tijicñayon. Mach jiñic jax mij qʼuelben i sajtemal yambʌlob, mic ñaʼtan jiñi yambʌlob, tijicñayon i tsaʼ sujtiyon ti ñumen wem bʌ tatʌl» (Peter, Países Bajos).

«Ti ñaxan, maʼañic chuqui yambʌ mic mel: Mucʼ jach j cʼux c waj, mic wʌyel i ajñe ajñel mic majlel ti queʼtel. Maʼañic mic ñusan c bʌ tij cuxtʌlel. Wʌle muqʼuix j qʼuel j cuxtʌlel bajcheʼ utsʼatax bʌ c majtan. Wʌle muqʼuix c ñusan c bʌ» (Liz, Estonia).

«Tiʼ pejtelel ora an chuqui tac mij cʼojoʼtan. Pero cheʼ cujil chaʼan mi caj i jilel jiñi jontolil, jiñi ticʼlʌntel yicʼot jiñi wocol miʼ coltañon c taj c ñʌchʼtʌlel» (Adrien, Francia).