JIÑI JAʼ

Jiñi wem bʌ jaʼ woliʼ jilel

Anquese jiñi Lum joyolʌch ti jaʼ, jiñi Organización Meteorológica Mundial miʼ yʌl chaʼan tsʼitaʼ jach jiñi jaʼ muʼ bʌ i mejlel lac jap yicʼot muʼ bʌ i mejlel laj cʼʌn. Anquese mach oñic yilal jasʌlʌch chaʼan pejtelel cuxul bʌ. Pero jiñi jaʼ wolix i ñumen asiyel yicʼot ñumen wocolix ti tajtʌl. Iliyi woliʼ yujtel tiʼ caj ñoj qʼuexelix jiñi clima yicʼot ñumen oñix jaʼ woli lac jisan. Jiñi expertojob miʼ ñaʼtañob chaʼan ti jiñi 30 jab talto bʌ, 5 mil millón lac piʼʌlob maʼañix mi caj i tajob jaʼ.

Jiñi Lum tsaʼ mejli chaʼan mi lac mejlel ti chumtʌl

Jiñi Pañimil melbil chaʼan maʼañic baʼ ora miʼ jilel jaʼ. Cheʼ jaʼel, jiñi lum, jiñi cuxul tac bʌ yaʼ ti jaʼ yicʼot jiñi Qʼuin miʼ mejlel i sʌqʼuesan jiñi jaʼ. Laʼ laj qʼuel muʼ tac bʌ i pʌsbeñonla chaʼan jiñi Lum melbilʌch chaʼan mi lac mejlel ti chumtʌl:

• Qʼuelbil chaʼan jiñi lum miʼ mejlel i sʌqʼuesan jiñi jaʼ ti chuqui tac miʼ mejlel i bibʼesan. Jumpʼejl ejemplo, qʼuelbil chaʼan yaʼ ti jaʼ lumil tac miʼ colel jam tac muʼ bʌ i tsʼuʼ jiñi nitrógeno, jiñi fósforo yicʼot jiñi veneno tac chaʼan bʌ mateʼel.

• Jiñi científicojob an i qʼueleyob bajcheʼ miʼ bajñel sʌqʼuesan i bʌ jiñi jaʼ cheʼ bʌ miʼ bajñel bibʼan. Cheʼ bʌ miʼ chaʼlen ajñel jiñi jaʼ, miʼ bicʼtiyel jiñi i bibiʼlel i jiñix jiñi i yalʌ chʌñil tac jiñi jaʼ miʼ junyajlel jisan.

• Jiñi almeja tac yicʼot mejillón muʼ bʌ i tajtʌl ti jiñi jaʼ tac maʼañic bʌ i yʌtsʼʌmlel ti chaʼpʼej uxpʼejl jach qʼuin miʼ mejlel i sʌqʼuesan jiñi jaʼ tiʼ pejtelel jiñi químico tac muʼ bʌ i mejlel i yʌsin, i tajol ñumen wento miʼ mel bajcheʼ jiñi máquina tac.

• An jaʼ ila ti Lum come jiñi Qʼuin miʼ ticwesan jiñi jaʼ am bʌ ti mar, cheʼ jiñi miʼ sujtel ti tocal i ti wiʼil miʼ yajlel bajcheʼ jaʼal. Cheʼ bajcheʼ iliyi yicʼot yan tac bʌ muʼ bʌ i yujtel ila ti Lum maʼañic miʼ jilel jiñi jaʼ.

An woli bʌ i qʼuelob chuqui tac yom miʼ mejlel

Jiñi expertojob miʼ yʌlob chaʼan mach yomic mi laj cʌlʌx beqʼueʼ jaʼ. Cheʼ jaʼel, miʼ yʌlob chaʼan mi an laj carro yomʌch mi lac wen qʼuel chaʼan maʼañic miʼ bejqʼuel i yaceitejlel, mach yomic mi lac choc tsʼac yaʼ ti taza yicʼot maʼañic mi lac choc baqui miʼ ñumel jiñi jaʼ pejtelel chuqui miʼ mejlel i bibʼesan.

An ingenierojob am bʌ i qʼueleyob chuqui tac miʼ mejlelob i mel chaʼan miʼ locʼsʌbeñob i yʌtsʼʌmlel jiñi jaʼ am bʌ ti mar, cheʼ bajcheʼ jiñi ñumen cabʌl lac piʼʌlob miʼ mejlel i tajob jaʼ chaʼan miʼ japob o chaʼan miʼ cʼʌñob.

Pero mach jasʌlic jiñi. Mach mejlic ti luʼ locʼsʌbentel i yʌtsʼʌmlel jiñi jaʼ am bʌ ti mar come yom cabʌl taqʼuin yicʼot cʌlʌxix miʼ cʼʌjñel luz. Ti 2021, ti jumpʼejl informe tsaʼ bʌ i yʌcʼʌ jiñi Naciones Unidas baqui tsiʼ taja ti tʼan jiñi jaʼ, tsiʼ yʌlʌ chaʼan ñumen orato yom miʼ chaʼlentel wersa chaʼan pejtelel lac piʼʌlob miʼ tajob jaʼ.

Mucʼʌch caj i tojʼan ili wocol.¿Chuqui miʼ yʌl jiñi Biblia?

«Dios [ . . . ] miʼ yʌcʼ ti letsel i yowix jaʼ. Miʼ sujtel ti jaʼal ti chʌjcʼ ti chʌjcʼ. I yowix colem ñajb miʼ chaʼ chʼujyel letsel ti tocal. Jini tocal mi yʌcʼ jaʼal ti lum. Miʼ yʌchʼesañonla» (Job 36:26-28).

Dios añʌch chuqui tac tsiʼ mele chaʼan maʼañic miʼ jilel jiñi jaʼ (Eclesiastés 1:7).

Ñaʼtancu iliyi: Mi Dios tsaʼ mejli i mel chaʼan jiñi jaʼ miʼ mejlel i bajñel sʌqʼuesan i bʌ, miʼ mejlel lac ñop chaʼan yomʌch yicʼot mucʼʌch caj i mejlel i tojʼesan pejtelel jiñi wocol am bʌ i yʌcʼʌ jiñi wiñicob. Qʼuele jiñi tema «Dios miʼ yʌl chaʼan mi caj i chaʼ tojʼan ili Lum» am bʌ ti página 15 ti ili revista.