Cʌntesʌntel 17

Qʼuexel bɅ lojob

JINI chaʼtiquil chʼitoñob muʼ bʌ a qʼuel ila ti dibujo wen qʼuexelob, ¿ñomach? ¿Awujil ba chuqui i cʼabaʼob? Jini xʼajñesa bʌteʼel jiñʌch Esaú, i jini chʼiton muʼ bʌ i cʌntan tiñʌmeʼ jiñʌch Jacob.

Esaú yicʼot Jacob jiñobʌch lojoʼ bʌ o lutoʼ bʌ i yalobil Isaac yicʼot Rebeca. Jini tatʌl, Isaac, miʼ wen cʼuxbin Esaú, come wen yujil ajñesa bʌteʼel yicʼot miʼ chʼʌm tilel bʌlñʌcʼʌl chaʼan miʼ cʼux ti pejtelel i familia. Pero Rebeca mi ñumen cʼuxbin Jacob, come ñʌchʼʌl yicʼot uts.

Jini tatuchʌl Abraham cuxul to, yicʼot miʼ mejlel lac ñaʼtan bajcheʼ cʼamel tsiʼ mula i ñichʼtan Jacob cheʼ mi yʌl chaʼan Jioba. Abraham tsaʼ chʌmi cheʼ anix joʼlujumpʼejl i bolomcʼal (175) i jabilel, cheʼ bʌ anix joʼlujumpʼejl (15) i jabilelob jini lojob.

Cheʼ bʌ anix chaʼcʼal (40) i jabilel Esaú tsaʼ ñujpuñi yicʼot chaʼtiquil xʼixic chʼoyoloʼ bʌ tiʼ lumal Canaán. Ili tsiʼ wen aqʼue i chʼijiyemlel Isaac yicʼot Rebeca, come ili xʼixicob maʼanic miʼ chʼujutesañob Jioba.

Cheʼ jini, jumpʼejl bʌ qʼuin an chuqui tsaʼ bʌ i wen michʼesa Esaú chaʼan tiʼ tojlel i yijtsʼin Jacob. Tsaʼ cʼoti i yorajlel cheʼ bʌ Isaac mi caj i yʌqʼuen i yutslel i tʼan jini ascuñʌl bʌ i yalobil. Come ascuñʌl jini Esaú bajcheʼ Jacob, Esaú woli i pijtan i yutslel i tʼan jini i tat. Pero jini Esaú tsaʼix i chombe Jacob jini am bʌ tiʼ wenta chaʼan miʼ chʼʌm i yutslel i tʼan i tat. Cheʼ jaʼel, cheʼ bʌ tsaʼ yilayob pañimil jini chaʼtiquil chʼitoñob, Dios tsaʼix i yʌlʌ chaʼan Jacob mi caj i chʼʌm i yutslel i tʼan i tat. Cheʼʌch tsaʼ ujti. Isaac tsiʼ yʌqʼue i yutslel i tʼan jini i yalobil Jacob.

Ti wiʼil, cheʼ bʌ tsaʼ yubi jini Esaú, tsiʼ wen michʼle Jacob. Come tsaʼ wen michʼa i tsiʼ yʌlʌ chaʼan mi caj i tsʌnsan Jacob. Cheʼ bʌ tsaʼ yubi Rebeca iliyi, tsiʼ wen mele i pusicʼal. Jini chaʼan, tsiʼ sube i ñoxiʼal i cʼabaʼ Isaac: ‹Mi caj i wen aqʼueñon c chʼijiyemlel mi Jacob tsaʼ ñujpuñi yicʼot jini xʼixicob chʼoyoloʼ bʌ yaʼ ti Canaán›.

Jini chaʼan Isaac tsiʼ pʌyʌ Jacob i tsiʼ sube: ‹Mach a pʌy juntiquil xʼixic chʼoyol bʌ ti Canaán. Mi cheʼ jini, cucu baʼan i yotot a tatuch Betuel yaʼ ti Harán. Ñujpuñen a wicʼot juntiquil i yixicʼal i yalobil jini Labán›.

Jacob tsiʼ jacʼbe i tʼan i tat, i tsaʼ majli yaʼ baqui chumul i piʼʌlob ti Harán.

Génesis 25:5-11, 20-34; 26:34, 35; 27:1-46; 28:1-5; Hebreos 12:16, 17.