Cʌntesʌntel 26
Job xucʼul ti Dios
¿MACH ba pʼumpʼuñic maʼ qʼuel jini cʼam bʌ? I cʼabaʼ jiñʌch Job, jini xʼixic i yijñamʌch. ¿Awujil ba chuqui woli i suben Job? ‹Pʼaja Dios cheʼ jini junyajlel chʌmen.› Laʼ laj qʼuel chucoch cheʼ tsiʼ yʌlʌ bajcheʼ jini, yicʼot chucoch tsiʼ wen ila wocol Job.
Job jiñʌch juntiquil wen xucʼul bʌ winic tsaʼ bʌ i chʼujbibe i tʼan Jioba. Tsaʼ chumle tiʼ lumal Uz, mach ñajtic yaʼ ti Canaán. Jioba tsiʼ wen cʼuxbi Job, pero an juntiquil muʼ bʌ i tsʼaʼlen. ¿Awujil ba majqui jini muʼ bʌ i tsʼaʼlen?
Jiñʌch Satanás jini Diablo. Ñaʼtancu, jini ángel jontol bʌ muʼ bʌ i tsʼaʼlen Jioba jiñʌch Satanás. Ili ángel tsaʼ mejli i mel chaʼan jini Adán yicʼot Eva mi ñusʌbeñob i tʼan Jioba, yicʼot tsiʼ ñaʼta chaʼan miʼ mejlel i mel ti yambʌ winicob xʼixicob chaʼan mi ñusʌbeñob i tʼan jaʼel. Pero ¿tsaʼ ba mejli i mel jini? Maʼanic. Ñaʼtan jach cu ti yonlel winicob xʼixicob xucʼuloʼ bʌ cʌmbilix bʌ lac chaʼan. ¿Jaytiquil miʼ mejlel a wʌl?
Cheʼ ba ora Jacob yicʼot José tsaʼ chʌmiyob yaʼ ti Egipto, Job jiñʌch juntiquil ñumen xucʼul bʌ tsaʼ ajni tiʼ tojlel Jioba ti pejtelel Pañimil. Jioba yom i yʌqʼuen i ñaʼtan Satanás chaʼan mach mejlic i laj sujtesan ti xjontolil jini winicob xʼixicob, tsaʼ i sube: ‹Qʼuele jini Job. Xucʼul tic tojlel›.
‹Xucʼulʌch›, cheʼen Satanás, ‹come wen qʼuelel a chaʼan Job yicʼot cabʌl wen tac bʌ i chubʌʼan. Pero muqʼuic a chilben, mi caj i pʼajet›.
Jini chaʼan Jioba tsiʼ sube: ‹Woli cʌqʼueñet ti a cʼʌb. Laj chilben i chubʌʼan. Luʼ an ti a pʼʌtʌlel chaʼan maʼ ticʼlan Job. Yaʼ to mi laj qʼuel mi tsiʼ pʼajayon. Pero cojach mach yomic maʼ tsʌnsan›.
Ti ñaxan, jini Satanás tsiʼ cʼʌñʌ winicob chaʼan miʼ xujchʼibeñob i wacax Job yicʼot i camello tac, jini i tiñʌmeʼ tac tsaʼ tsʌnsʌbenti. Yicʼot tsaʼ i tsʌnsa jini lujuntiquil chʼiton bʌ yicʼot xchʼoc bʌ yalobilob ti jumpʼejl sutujt icʼ. Ti wiʼil, tsiʼ yʌqʼue Job ili wen tsʌts bʌ cʼamʌjel. Job tsiʼ wen ila wocol. Jini chaʼan jini i yijñam tsiʼ sube: ‹Pʼaja Dios cheʼ jini junyajlel chʌmen›. Pero Job maʼanic tsiʼ mele. Yicʼot cheʼ jaʼel, tsaʼ tili uxtiquil xlot bʌ i yamigojob i tsiʼ subeyob chaʼan tsiʼ chaʼle mulil mach bʌ tsaʼ cʌjñi. Pero Job chʌn xucʼul tsaʼ ajni.
Iliyi tsiʼ wen aqʼue i tijicñʌyel Jioba, ti wiʼil tsiʼ yʌqʼue bendición Job, cheʼʌch bajcheʼ maʼ qʼuel yaʼ ti dibujo. Tsiʼ lajmesʌbe i cʼamʌjel. Job tsaʼ chaʼ yʌcʼʌ yambʌ lujuntiquil i tʼojol jax bʌ i yalobil, yicʼot chaʼyajl i ñumel i wacax, yicʼot i tiñʌmeʼ tac i camello tac añʌch bʌ i chaʼan ti ñaxan.
¿Pejtel ba ora xucʼul mi caj a wajñel ti Jioba cheʼ bajcheʼ Job? Mi cheʼʌchi, Dios mi caj i yʌqʼueñet i bendición jaʼel. Mi caj a mejlel tiʼ chumtʌl ti pejtelel ora cheʼ baʼ ora ti petol jini Pañimil miʼ sujtel ti i tʼojol jax bʌ cheʼ bajcheʼ ti pʌcʼʌbʌl Edén.
Job 1:1-22; 2:1-13; 42:10-17.