Cʌntesʌntel 37
Jumpʼejl otot chaʼan chʼujutesaya
¿AWUJIL ba chuqui jini cheʼ bʌ bajcheʼ jumpʼejl otot? Jiñʌch jumpʼejl otot cojach bʌ chaʼan miʼ chʼujutesʌntel Jioba. Miʼ subentel tabernáculo. Jini tejclum jumpʼejl jach jab tsaʼ ujti i melob cheʼ bʌ tsaʼ loqʼuiyob yaʼ ti Egipto. ¿Awujil ba majqui tsiʼ yʌlʌ chaʼan miʼ mejlel?
Jiñʌch Jioba tsaʼ bʌ i yʌlʌ chaʼan miʼ mejlel. Cheʼ bʌ Moisés yaʼto an ti wits Sinaí, Jioba tsiʼ sube chaʼan bajcheʼ yom miʼ mejlel. Tsiʼ sube chaʼan miʼ mel cheʼ mach wocolic mi mejlel i chaʼ jemob. Cheʼ bajcheʼ jini mi caj mejlel i chʼʌmob majlel yaʼ baqui miʼ majlelob, yaʼi miʼ chaʼ melob. Jini chaʼan, cheʼ ba ora jini israelob miʼ yʌñob i bʌ yaʼ baqui añob ti i tiquiñal lum, miʼ chʼʌmob majlel jini pisil bʌ otot.
Cheʼ maʼ qʼuel yaʼ ti alʌ tsalʌl yaʼ baqui jaxʌl jini otot, miʼ mejlel a qʼuel jumpʼejl caja. Ili caja mi subentel arca chaʼan bʌ trato. An chaʼtiquil ángelob o querubin melbil bʌ ti oro, juntiquil ti jujunwejl i xujc. Dios tsiʼ chaʼ tsʼijbu jini Lujumpʼejl Mandar tac ti chaʼqʼuejl wechel bʌ xajlel, come jini ñaxam bʌ Moisés tsiʼ topʼo. Ili chaʼqʼuejl wechel bʌ xajlel tsaʼ lojti yaʼ ti arca chaʼan bʌ trato. Yicʼot jaʼel yaʼ tsaʼ lojti jumpʼejl ucʼum maná. ¿Cʼajal ba a chaʼan chuqui jini maná?
Jioba tsiʼ yajca Aarón i yeran Moisés chaʼan mi yochel ti ñuc bʌ motomaj. Jiñʌch muʼ bʌ i chaʼlen cʌntesa chaʼan i chʼujutesʌntel Jioba. Jini i yalobilob jiñobʌch jaʼel motomajob.
Wʌle qʼuele yaʼ ti ñumen colem bʌ tsalʌl yaʼ ti otot. Chaʼyajl to i colemlel cheʼ bajcheʼ jini alʌ tsalʌl. ¿Muʼ ba a qʼuel jini alʌ caja baʼ woli i cʼʌjquel butsʼ? Jiñʌch jini pulʌntib baqui miʼ pulob pom jini motomajob, jiñʌch xojocña bʌ yujtsʼil. Qʼuele jaʼel jini wuctsʼijt lámpara tac. Tiʼ yuxpʼejlel jini am bʌ yaʼ ti tsalʌl jiñʌch jumpʼejl mesa, tiʼ pam yaʼʌch baqui mi yajñel jini lajchʌmpʼejl caxlan waj.
Yaʼ tiʼ pat jini tabernáculo an jumpʼejl colem yajñib jaʼ, o palangana, butʼul bʌ ti jaʼ. Jini motomajob miʼ cʼʌñob chaʼan chuqui miʼ pocob. Cheʼ jaʼel yaʼan jini colem pulʌntib. Yaʼʌch baqui miʼ pulob jini añimal tac tsʌnsʌbil bʌ chaʼan tiʼ majtan Jioba. Jini pisil bʌ otot yaʼan ti ojlil baʼ jijlemob, jini israelob chumulob ti pisil bʌ i yototob yaʼ tiʼ joytilel jini pisil bʌ otot.
Éxodo 25:8-40; 26:1-37; 27:1-8; 28:1; 30:1-10, 17-21; 34:1, 2; Hebreos 9:1-5.