Cʌntesʌntel 47

Juntiquil xujchʼ ti Israel

¡Q’UELE cu chuqui woli i muc ti mal pisil bʌ i yotot jini winic! Jumpajc bujcʌl wen i tʼojol jax bʌ, yicʼot jumpʼejl jʌlʌl bʌ oro yicʼot lamital i xujtʼil plata. Tsiʼ chʼʌmʌ tilel yaʼ ti Jericó. Pero ¿chuqui yom miʼ tumbeñob tsiʼ cʼʌñʌ jini chubʌʼañʌl tilem bʌ ti Jericó? ¿Cʼajal ba a chaʼan?

Tsiʼ jisayob yomic, yicʼot albilix chaʼan jini oro yicʼot jini plata yom miʼ chʼʌmob majlel yaʼ ti tabernáculo i chaʼan Jioba. Jini chaʼan, iliyobi tsiʼ ñusʌbeyob i tʼan Dios. Tsiʼ xujchʼibeyob jini i chaʼan bʌ Dios. I cʼabaʼ jini winic jiñʌch Acán, jini yaʼ bʌ an yicʼotob i piʼʌlobʌch. Laʼ laj cʌn chuqui tsaʼ ujti.

Ti wiʼil cheʼ bʌ Acán tsiʼ xujchʼi ili chubʌʼañʌl tac, Josué tsiʼ choco majlel winicob chaʼan miʼ contrajiñob jini i tejclum Hai. Pero maʼanic tsaʼ mʌjliyob i chaʼan. Lamital tsaʼ chʌmiyob, jini yañoʼ bʌ tsaʼ putsʼiyob. Josué tsiʼ wen taja i chʼijiyemlel. Tsiʼ pʌcchoco i bʌ ti lum, tsiʼ pejca Jioba ti oración, tsiʼ sube: ‹¿Chucoch maʼ wʌcʼon lojon ti wocol?›.

Jioba tsiʼ jacʼʌ: ‹¡Chʼojyen! Israel tsaʼix i chaʼle mulil. Tsaʼix i chʼʌmʌyob jini yom bʌ miʼ jisʌntel o yom bʌ miʼ chʼʌmob majlel yaʼ ti tabernáculo i chaʼan Dios. Tsaʼix i xujchʼiyob jumpajc bujcʌl wen i tʼojol jax bʌ yicʼot maʼanic subilob i chaʼan. Maʼanix mi caj coltañetla jinto mi laʼ jisan jini bujcʌl yicʼot jini tsaʼ bʌ i chʼʌmʌ jini chubʌʼañʌl tac›. Jioba tsiʼ sube Josué chaʼan mi caj i pʌsben majqui jini jontol bʌ winic.

Jini chaʼan, Josué tsiʼ tempa pejtelel jini israelob, Jioba tsiʼ yʌcʼʌ ti cʌjñel jini jontol bʌ winic i cʼabaʼ, Acán. Acán tsiʼ yʌlʌ: ‹Tsac chaʼle mulil. Tsaj qʼuele wen i tʼojol jax bʌ bujcʌl, yicʼot jumpʼejl jʌlʌl bʌ oro yicʼot lamital i xujtʼil tac plata. Tsac wen mula ili chubʌʼañʌl tac jini chaʼan tsac chʼʌmʌ. Mi mejlel laʼ taj yaʼ baqui tsac mucu ti mal lum yaʼ tiʼ mal jini pisil bʌ cotot›.

Cheʼ bʌ tsiʼ tajayob jini chubʌʼañʌl tac tsiʼ chʼʌmʌyob majlel baʼan Josué, i tsiʼ sube Acán: ‹¿Chucoch tsaʼ wʌcʼʌyon lojon ti wocol? ¡Wʌle Jioba mi caj i yʌqʼueñet wocol!›. Cheʼ jini, pejtelel jini israelob tsiʼ juluyob ti xajlel jini Acán yicʼot i familia jinto tsaʼ chʌmiyob. ¿Mach ba muqʼuic i pʌsbeñonla iliyi chaʼan mach wis yomic lac chʼʌm jini chubʌʼañʌl tac mach bʌ lac chaʼanic?

Ti wiʼil Israel tsaʼ chaʼ majliyob ti guerra chaʼan miʼ contrajiñob Hai. Jioba tsaʼix i colta jini i tejclum, yicʼot tsaʼ mʌjliyob i chaʼan jini guerra.

Josué 7:1-26; 8:1-29.