Cʌntesʌntel 49
Tsaʼ waʼle jini Qʼuin
Q’UELE jini Josué. Tsiʼ yʌlʌ: ‹¡Qʼuin, mach a ñijcan a bʌ!›. Jini Qʼuin tsaʼ waʼle. Tsaʼ waʼle ti ojlil panchan cʼʌlʌl tsaʼ ñumi jumpʼejl qʼuin. ¡Jiñʌch Jioba tsaʼ bʌ i mele iliyi chaʼan cheʼ mi yujtel! Pero laʼ laj cʌn chucoch Josué mach yomic cheʼ mi i yicʼan.
Cheʼ bʌ ora jini joʼtiquil jontol bʌ reyob yaʼ ti tejclum Canaán tsaʼ caji i contrajiñob Gabaón, jini gabaoñob tsiʼ chocoyob majlel juntiquil winic i cʼajtiñob i coltʌntel baʼan Josué. ‹¡Laʼ ti ora baʼ añon lojon!›, cheʼen. ‹¡Coltañon lojon! Pejtelel jini reyob añoʼ bʌ ti wits tac woli i contrajiñob a winicob.›
Cheʼ jini Josué yicʼot pejtelel i soldadojob tsaʼ majliyob. Tsiʼ chaʼleyob xʌmbal jumpʼejl acʼʌlel. Cheʼ tsaʼ cʼotiyob yaʼ ti Gabaón, jini i soldadojob joʼtiquil reyob tsiʼ chaʼleyob bʌqʼuen i tsaʼ cajiyob ti putsʼel majlel. Cheʼ jini Jioba tsiʼ choco jubel colem tac bʌ tuñijaʼ, ñumen cabʌlob jini soldadojob tsaʼ bʌ chʌmiyob chaʼan jini tuñijaʼ bajcheʼ jini tsaʼ bʌ tsʌnsʌntiyob tiʼ soldadojob Josué.
Josué tsiʼ qʼuele chaʼan wolix i bʌjlel majlel jini Qʼuin. Muqʼuix cajel i yicʼan, yicʼot yonlel jini soldadojob chaʼan jini joʼtiquil jontol bʌ reyob mi caj i putsʼelob. Jini chaʼan, Josué tsiʼ pejca ti oración Jioba, i tsiʼ yʌlʌ: ‹¡Qʼuin, mach a ñijcan a bʌ!›. Cheʼ bʌ chʌn tsʼʌyʌl to jini Qʼuin, jini israelob miʼ mʌjlelob i chaʼan jini guerra.
An yambʌ cabʌl reyob jontoloʼ bʌ yaʼ ti Canaán muʼ bʌ i tsʼaʼlen i tejclum Dios. Jini Josué yicʼot i soldadojob, wʌcpʼejl jab tsaʼ ñumi chaʼan miʼ jisañob jini junlujuntiquil i chaʼcʼal (31) reyob ti jini tejclum. Cheʼ tsaʼ ujti iliyi, Josué tsiʼ tʼoxbeyob jini lum ti mojt ti mojt jini israelob maxto bʌ añobic i lum.
Tsaʼ ñumi cabʌl jabil, Josué tsaʼ chʌmi cheʼ anix lujumpʼejl i wʌccʼal (110) i jabilel. Cheʼ cuxul to jini Josué yicʼot i yamigojob, jini winicob xʼixicob tsiʼ jacʼbeyob i tʼan jini Jioba. Pero cheʼ tsaʼix chʌmiyob, jini winicob xʼixicob tsiʼ meleyob jontolil yicʼot tsiʼ tajayob wocol tac. Wʌle yomobix i coltʌntel ti Dios.
Josué 10:6-15; 12:7-24; 14:1-5; Jueces 2:8-13.