Cʌntesʌntel 51

Rut yicʼot Noemí

YAʼ ti Biblia mi caj a taj jumpʼejl libro i cʼabaʼ Rut. Jiñʌch tsaʼ bʌ ujti tiʼ tojlel jumpʼejl xchumtʌl ti otot cheʼ tiʼ yorajlel Israel, cheʼ bʌ tsaʼ chumleyob juezob. Rut jiñʌch juntiquil xchʼoc chʼoyol bʌ ti Moab; mach yaʼic loqʼuem ti Israel, jini i tejclum Dios. Pero cheʼ bʌ Rut tsiʼ cʌñʌ jini isujm bʌ Dios, Jioba, tsiʼ wen cʼuxbi. Noemí jiñʌch juntiquil xʼixic anix bʌ i jabilel tsaʼ bʌ i colta Rut chaʼan miʼ cʌn Jioba.

Noemí chʼoyol ti Israel. Tsaʼ majli yicʼot i ñoxiʼal yicʼot jini chaʼtiquil winic bʌ i yalobilob yaʼ tiʼ lumal Moab cheʼ bʌ tsaʼ sʌjli bʌlñʌcʼʌl yaʼ ti Israel. Jumpʼejl bʌ qʼuin, jini i ñoxiʼal Noemí tsaʼ chʌmi. Ti wiʼil, jini winic bʌ i yalobilob Noemí tsaʼ ñujpuñiyob yicʼot chaʼtiquil xchʼocob ti Moab i cʼabaʼob Rut yicʼot Orfa o Orpá. Cheʼ bʌ tsaʼ ñumi lujumpʼejl jabil, jini chaʼtiquil winic bʌ i yalobilob Noemí tsaʼ chʌmiyob. ¡Wen chʼijiyem jax! ¿Chuqui mi caj i mel Noemí wʌle?

Jumpʼejl bʌ qʼuin Noemí tsiʼ ñaʼta chaʼan miʼ chaʼ sujtel baʼan i piʼʌlob, wen ñajt bʌ xʌmbal. Rut yicʼot Orfa mach yomic i cʌyob, tsaʼ majli yicʼotob. Pero cheʼ ñajtix i xʌmbalob, Noemí tsiʼ sube jini xchʼocob: ‹Cucuxla ti sujtel yaʼ baʼ tsaʼ tiliyetla i cʌlenla yaʼ tiʼ yotot laʼ ñaʼ›.

Noemí tsiʼ tsʼujtsʼuyob cheʼ wolix i majlel. Tsaʼ cajiyob ti uqʼuel, come miʼ wen cʼuxbiñob Noemí. Tsiʼ yʌlʌyob: ‹¡Maʼanic! Mux c majlel lojon quicʼotet baʼan a piʼʌlob›. Pero Noemí tsiʼ subeyob: ‹Jatetla yom mi laʼ sujtel, calobilob. Utsʼat mi caj laʼ wajñel yicʼot laʼ piʼʌlob›. Jini chaʼan Orfa tsaʼ caji ti majlel cʼʌlʌl baʼ chʼoyol. Pero Rut maʼanic tsaʼ sujti.

Noemí tsiʼ chaʼ sube Rut: ‹Orfa tsaʼix majli. Cucu a wicʼot jaʼel›. Pero Rut tsiʼ jacʼʌ: ‹¡Mach a subeñon sujtel chaʼan mij cʌyet! Mach a ticʼon ti majlel a wicʼot. Baʼ maʼ majlel, mic majlel jaʼel, yaʼ baʼ maʼ chumtʌl, mi caj c chumtʌl. Jini a piʼʌlob mi caj i sujtelob tic piʼʌlob, jini a Dios c Diosʌch. Yaʼ baʼ maʼ chʌmel, mi caj c chʌmel jaʼel, yaʼi mi caj c mujquel›. Cheʼ bʌ tsiʼ yʌlʌ Rut iliyi, Noemí tsiʼ cʌyʌ i suben sujtel.

Jini chaʼtiquil xʼixicob tsaʼ cʼotiyob ti Israel. Yaʼ tsaʼ chumleyob. Rut tsaʼ caji ti eʼtel yaʼ ti jamil, come i yorajlel chaʼan miʼ tempʌntel cebada. Juntiquil winic i cʼabaʼ Boaz o Booz tsiʼ yʌqʼue i tempan cebada yaʼ tiʼ jamil. ¿Awujil ba majqui i ñaʼ jini Booz? Jiñʌch Rahab, chʼoyol bʌ ti Jericó.

Jumpʼejl bʌ qʼuin Booz tsiʼ sube Rut: ‹Ti isujm tsaʼ cubi pejtel chuqui tsaʼ melbe Noemí. Cujil chaʼan tsaʼ cʌyʌ a tat yicʼot a ñaʼ yicʼot a lumal chaʼan maʼ tilel baʼan winicob xʼixicob mach bʌ a cʌñʌyobic. ¡Laʼ i yʌqʼueñet i yutslel Jioba!›.

Rut tsiʼ jacʼʌ: ‹Cabʌl tsaʼ pʌsbeyon i yutslel a pusicʼal, c yum. Tsaʼ wen ñuqʼuesʌbeyon c pusicʼal chaʼan chuqui wen tsaʼ subeyon›. Jini Booz wen utsʼat tsiʼ qʼuele Rut, mach cabʌlic qʼuin tsaʼ ñumi cheʼ bʌ tsaʼ ñujpuñiyob. ¡Wen tijicña tsiʼ yubi Noemí! Pero Noemí ñumento tsiʼ yubi i tijicñʌyel cheʼ bʌ Rut yicʼot Booz tsiʼ yʌcʼʌyob ti pañimil ñaxam bʌ i yalobil, i cʼabaʼ Obed. Ti wiʼil Obed jiñʌch i tatuch David; muʼto caj lac ñumen cʌn tiʼ tojlel ili David.

Libro i chaʼan Rut 1-4.