Cʌntesʌntel 52
Gedeón yicʼot joʼlujuncʼal (300) i winicob
¿MUʼ ba a qʼuel chuqui woli ti ujtel ilayi? Jiñobʌch i soldadojob Israel wen yujiloʼ bʌ guerra. Jini ñocoloʼ bʌ muʼ bʌ a qʼuelob woli i japob jaʼ. Jini juez Gedeón yaʼ waʼal tiʼ tʼejlob. Woliʼ qʼuelob bajcheʼ miʼ japob jaʼ.
Wen qʼuele cu, come mach junlajalic bajcheʼ woli i japob jaʼ jini winicob. Lamital miʼ ñoctʌlob chaʼan miʼ japob jaʼ. Pero juntiquil miʼ lochʼ jaʼ tiʼ cʼʌb chaʼan miʼ jap, chaʼan miʼ mejlel i qʼuel chuqui mi yujtel tiʼ joytilel. Iliyi wen an i cʼʌjñibal, come Jioba tsiʼ sube jini Gedeón chaʼan cojach yom miʼ yajcan jini yʌxʌloʼ bʌ i yo cheʼ miʼ japob jaʼ. Jini yañoʼ bʌ yom miʼ sujtelob majlel tiʼ yotot. Laʼ laj cʌn chucoch.
Jini israelob chaʼ wen añob ti wocol come maʼanic woli i jacʼbeñob i tʼan Jioba. Jini madiañob tsaʼix wen pʼʌtʼayob ñumento bajcheʼ jini israelob yicʼot miʼ ticʼlañob. Jini chaʼan israelob miʼ cʼajtiñob i coltʌntel ti Jioba, Jioba tsiʼ yubi i yoñelob.
Jioba tsiʼ sube Gedeón chaʼan miʼ tempan jini soldadojob, jini chaʼan Gedeón tsiʼ tempa lajchʌmpʼejl i chaʼcʼal (32,000) mil wen yujiloʼ bʌ guerra. Pero an joʼlujumpʼejl i wuccʼal (135,000) mil soldadojob woli bʌ i tilelob tiʼ contra Israel. Pero cheʼ jini, Jioba tsiʼ sube Gedeón: ‹Ñumenix ti pʼis jini a winicob›. ¿Chucoch tsiʼ yʌlʌ bajcheʼ jini?
Come mi tsaʼ mʌjliyob i chaʼan guerra jini israelob, tajol miʼ lon ñaʼtañob chaʼan tiʼ bajñel pʼʌtʌlelob jach tsaʼ mʌjliyob i chaʼan, i mach wersajic i coltaya Jioba. Jini chaʼan Jioba tsiʼ sube Gedeón: ‹Majqui jach an i bʌqʼuen laʼ sujticob ti yotot›. Cheʼ bʌ tsiʼ mele Gedeón iliyi, chaʼpʼejl i chaʼcʼal (22,000) mil soldadojob yujiloʼ bʌ guerra tsaʼ sujtiyob. Tsaʼ jach cʌleyob lujumpʼejl (10,000) mil winicob chaʼan miʼ contrajiñob jini joʼlujumpʼejl i wuccʼal (135,000) mil soldadojob.
Pero, ¡ubin cu! Jioba tsiʼ yʌlʌ: ‹Cabʌl to a winicob tsaʼ bʌ cʌleyob›. Jini chaʼan tsiʼ sube Gedeón chaʼan miʼ yʌqʼuen i japob jaʼ jini winicob ila ti jaʼ, chaʼan cheʼ jini miʼ chocob sujtel tiʼ yototob jini muʼ bʌ i ñoctʌlob chaʼan miʼ japob jaʼ. ‹Mi caj cʌqʼueñet chaʼan miʼ mʌjlel a chaʼan a wicʼot jini joʼlujuncʼal (300) winicob chʌn yʌxʌloʼ bʌ i yo cheʼ woli i japob jaʼ›, cheʼ tsiʼ waʼchoco i tʼan Jioba.
Tsaʼ cʼoti i yorajlel chaʼan miʼ chaʼleñob guerra. Gedeón tsiʼ tʼoxo ti uxmojt jini joʼlujuncʼal (300) i winicob. Ti jujuntiquil tsiʼ yʌqʼue jumpʼejl xulub, yicʼot jumpʼejl ucʼum am bʌ yicʼot juntsʼijt xutunteʼ tiʼ mal. Cheʼ yomix i taj ojlil acʼʌlel, ti pejtelelob tsiʼ joyoyob yaʼ baqui tempʌbilob i contrajob. Cheʼ jini, junlajal, tsiʼ wusuyob jini trompeta tac melbil bʌ ti xulub yicʼot tsiʼ topʼoyob i yucʼum tac, i tsiʼ chaʼleyob oñel: ‹¡I yespada Jioba am bʌ tiʼ wenta Gedeón!›. Cheʼ bʌ tsaʼ cajñiyob i wut jini i contrajob, tsaʼ sojquiyob yicʼot tsiʼ chaʼleyob bʌqʼuen. Tsaʼ laj putsʼiyob majlel, jini israelob tsaʼ mʌjliyob i chaʼan.
Jueces, capítulo 6 cʼʌlʌl ti 8.