Cʌntesʌntel 53

I tʼan tsaʼ bʌ i waʼchoco Jefté

¿AM BA junyajl tsaʼ waʼchoco a tʼan i ti wiʼil wocol tsaʼ wubi chaʼan maʼ tsʼʌctesan? Jiñʌch tsaʼ bʌ ujti tiʼ tojlel ili winic yaʼ bʌ an ti dibujo, jini chaʼan chʼijiyem i pusicʼal. Jiñʌch Jefté, juntiquil chʼejl bʌ juez ti Israel.

Jefté tsaʼ chumle cheʼ tiʼ yorajlel israelob cheʼ maʼanix miʼ chʼujutesañob Jioba. Woliʼ chaʼ melob jontolil. Jini chaʼan Jioba tsiʼ yʌqʼue tiʼ cʼʌb i winicob Amón chaʼan miʼ ticʼlañob. Jini israelob cʼam tsiʼ pejcayob Jioba: ‹Tsaʼix c chaʼle lojon mulil ti a tojlel. ¡Coltañon lojon!›.

Jini winicob xʼixicob mach tijicñayobic chaʼan chuqui tac jontol tsiʼ meleyob. Tsiʼ pʌsʌyob iliyi, cheʼ tsaʼ chaʼ caji i chʼujutesañob Jioba. Jini chaʼan, Jioba tsiʼ chaʼ coltayob.

Jini winicob xʼixicob tsiʼ yajcayob jini Jefté chaʼan miʼ contrajin jini jontoloʼ bʌ amoñob. Jefté wen yom chaʼan Jioba miʼ coltan cheʼ miʼ majlel ti guerra. Jini chaʼan tsiʼ waʼchoco i tʼan tiʼ tojlel Jioba: ‹Mi tsaʼ wʌqʼueyon chaʼan miʼ mʌjlel c chaʼan, mi caj cʌqʼueñet jini ñaxam bʌ miʼ loqʼuel tilel ti cotot chaʼan miʼ tajon cheʼ woli c sujtel ti guerra chaʼan tsaʼ mʌjli c chaʼan›.

Jioba tsiʼ yubibe i tʼan Jefté tsaʼ bʌ i waʼchoco, tsiʼ colta chaʼan mi mʌjlel i chaʼan. Cheʼ bʌ tsaʼ sujti Jefté, ¿awujil ba majqui jini ñaxam bʌ tsaʼ loqʼui i taj? Jiñʌch cojach bʌ xchʼoc bʌ i yalobil. ‹¡Calobil, pʼumpʼuñon jax!›, tsiʼ chaʼle uqʼuel Jefté. ‹¡Tsaʼix a wʌqʼueyon c chʼijiyemlel! Pero tsaʼix c waʼchocobe c tʼan Dios, wʌle mach mejlix c chʌn yʌn jini c tʼan tsaʼ bʌ c waʼchoco tiʼ tojlel Jioba.›

Cheʼ bʌ ora tsiʼ ñaʼta jini xchʼoc bʌ i yalobil Jefté chaʼan i tʼan i tat tsaʼ bʌ i waʼchoco, ti ñaxan tsiʼ taja i chʼijiyemlel jaʼel, chaʼan mi caj i cʌy i tat yicʼot i yamigojob. Pero mi caj i chʌn melben i yeʼtel Jioba yaʼ ti tabernáculo am bʌ ti Silo. Jini chaʼan tsiʼ sube Jefté: ‹Mi tsaʼix a waʼchoco a tʼan tiʼ tojlel Jioba, yom maʼ tsʼʌctesan›.

Jini chaʼan, jini xchʼoc bʌ i yalobil Jefté tsaʼ majli ti Silo, i yaʼ tsaʼ chʌn ajni ti tabernáculo chaʼan miʼ melben i yeʼtel Jioba. Jini xʼixicob ti Israel chʌmpʼejl qʼuin mi yajñelob i julaʼtañob ti jujumpʼejl jab yicʼot tijicña miʼ tem ñusañob qʼuin. Jini winicob xʼixicob miʼ cʼuxbiñob jini xchʼoc bʌ i yalobil Jefté chaʼan wem bʌ xʼeʼtel i chaʼan i Dios, Jioba.

Jueces 10:6-18; 11:1-40.