Cʌntesʌntel 54
Jini winic ñumen pʼʌtʌl bʌ
¿AWUJIL ba chuqui i cʼabaʼ jini winic ñumen pʼʌtʌl bʌ tsaʼ chumle? Jiñʌch juntiquil juez i cʼabaʼ Sansón. Jiñʌch Jioba tsaʼ bʌ i yʌqʼue i pʼʌtʌlel jini Sansón. Cʼʌlʌl cheʼ maxto i yila pañimil Sansón, Jioba tsiʼ sube i ñaʼ: ‹Mach jalix mi caj a wʌcʼ ti pañimil juntiquil a walobil. Jiñʌch muʼ bʌ caj i coltan jini israelob ti cʼʌb filisteojob›.
Jini filisteojob jiñobʌch jontol bʌ winicob xʼixicob chumuloʼ bʌ yaʼ ti Canaán. Wen cabʌlob i soldadojob yujiloʼ bʌ guerra, yicʼot miʼ ticʼlañob jini israelob. Junyajl, cheʼ bʌ Sansón woliʼ majlel yaʼ baqui chumulob jini filisteojob, juncojt colem bajlum jujuj ña tsaʼ loqʼui tilel baʼan. Pero Sansón tsiʼ tsʌnsa jini bajlum yicʼot jach i cʼʌb. Yicʼot jaʼel tsiʼ tsʌnsa cabʌl joʼcʼal jontoloʼ bʌ filisteojob.
Ti wiʼil Sansón tsiʼ mulaj juntiquil xʼixic i cʼabaʼ Dalila. Jini añoʼ bʌ i yeʼtel filisteojob tsiʼ waʼchocoyob i tʼan chaʼan ti jujuntiquilob mi caj i yʌqʼueñob Dalila joʼlujuncʼal i yuxbajcʼ (1,100) taqʼuin melbil bʌ ti plata mi tsaʼ mejli i subeñob baqui tilem i pʼʌtʌlel jini Sansón. Dalila yom jini taqʼuin. Mach ti mero isujmic i yamiga jini Sansón, mi jinic chaʼan i tejclum Dios. Jini chaʼan, tsaʼ chʌn caji i cʼajtiben Sansón chucoch wen an i pʼʌtʌlel.
Ti wiʼil, Dalila tsaʼ mejli i cʼajtiben jini Sansón chaʼan miʼ suben baqui tilem i pʼʌtʌlel. ‹Maʼanic baʼ ora tsaʼ wis sejtʼi i tsutsel c jol›, cheʼen. ‹Cʼʌlʌl tsaʼ quila pañimil, Dios tsiʼ yajcayon chaʼan ti cojach bʌ xʼeʼtel i chaʼan i cʼabaʼ nazareo. Muqʼuic i setʼbeñoñob i tsutsel col, miʼ jilel c pʼʌtʌlel.›
Cheʼ bʌ Dalila tsiʼ ñaʼta iliyi, tsiʼ wʌysa Sansón tiʼ yaʼ. Cheʼ jini tsiʼ pʌyʌ ochel juntiquil winic chaʼan miʼ setʼben i tsutsel i jol. Cheʼ bʌ tsaʼ cajñi i wut Sansón, tsaʼix i sʌtʌ i pʼʌtʌlel. Cheʼ jini tsaʼ ochiyob jini filisteojob i tsiʼ chucuyob. Tsiʼ locʼsʌbeyob tiʼ chaʼpʼejlel i wut, yicʼot tsiʼ yotsayob tiʼ moso.
Jumpʼejl bʌ qʼuin jini filisteojob woli i melob ñuc bʌ qʼuiñijel chaʼan miʼ chʼujutesañob jini i dios Dagón, tsiʼ locʼsayob jini Sansón yaʼ ti mʌjquibʌl chaʼan miʼ wajleñob. Pero cheʼ jini, tsaʼix chaʼ coli i tsutsel i jol Sansón. Sansón tsiʼ sube jini alʌ chʼiton woli bʌ i chuc majlel tiʼ cʼʌb: ‹Acʼʌ j cʼʌb chaʼan mic tʌl i yoyel jini otot›. Cheʼ jini Sansón tsiʼ pejca ti oración Jioba chaʼan mi yʌqʼuen i pʼʌtʌlel, i tsiʼ chucu tiʼ chaʼtsʼijtlel i yoyel jini otot. Tsiʼ chaʼle cʼam bʌ oñel: ‹Laʼix chʌmicon yicʼotob jini filisteojob›. Añob uxpʼejl (3,000) mil filisteojob woli bʌ i melob qʼuiñijel, cheʼ bʌ Sansón tsiʼ yuʼu i bʌ yaʼ baqui an i yoyel jini otot, jini otot tsaʼ jejmi yicʼot tsaʼ luʼ chʌmiyob jini jontoloʼ bʌ winicob xʼixicob.
Jueces, capítulo 13 cʼʌlʌl ti 16.