Cʌntesʌntel 65

Tsiʼ tʼoxo i bʌ i yumʌntel

¿AWUJIL ba chucoch ili winic woli i bicʼti tsil ili bujcʌl? Jioba tsiʼ sube chaʼan cheʼʌch miʼ mel jini. Iliyi jiñʌch Ahías xʼaltʼan bʌ i chaʼan Dios. ¿Awujil ba chuqui jini xʼaltʼan? Jiñʌch muʼ bʌ i wʌn subentel ti Dios chuqui mi caj ti ujtel.

Ahías woli i pejcan Jeroboam cheʼ bajcheʼ mi laj qʼuel ila ti dibujo. Salomón tsiʼ yʌqʼue tiʼ wenta Jeroboam chaʼan miʼ mel otot tac. Ahías tsiʼ mele mach bʌ ñʌmʌlic ti melol, cheʼ bʌ tsaʼ cʼoti i taj i bʌ yaʼ ti bij yicʼot Jeroboam. Tsiʼ jocho i tsijib bujc lʌpʌl bʌ i chaʼan, tsaʼ caji i tsil ti lajchʌntsijl. Tsiʼ sube Jeroboam: ‹Chʼʌmʌ lujuntsijl a chaʼan›. ¿Awujil ba chucoch tsiʼ yʌqʼue lujuntsijl Jeroboam?

Ahías tiʼ tsictesa chaʼan Jioba mi caj i chilben i yumʌntel Salomón. Tsaʼ yʌlʌ chaʼan Dios mi caj yʌqʼuen lujunmojt winicob xʼixicob Jeroboam. Iliyi yom yʌl chaʼan Roboam i yalobil Salomón, cojach miʼ cʌytʌl yicʼot chaʼmojt winicob xʼixicob chaʼan mi yuman.

Tsaʼ wen michʼa Salomón cheʼ bʌ tsaʼ cʼoti i yubin jini tsaʼ bʌ subenti Jeroboam ti Ahías. Tsiʼ ñopo i tsʌnsan Jeroboam, pero tsaʼ putsʼi majlel ti Egipto. Ti wiʼil, tsaʼ chʌmi Salomón. Chaʼcʼal (40) jab tsiʼ chaʼle yumʌntel, pero ti wiʼil jinix i yalobil i cʼabaʼ Roboam tsaʼ ochi ti rey. Yaʼ ti Egipto tsiʼ yubi Jeroboam chaʼan tsaʼix chʌmi Salomón, jin chaʼan ti chaʼ sujti majlel yaʼ ti Israel.

Roboam ñumen jontol to bajcheʼ tsiʼ mele Salomón, come miʼ wen ticʼlan jini winicob xʼixicob. Jeroboam yicʼot yambʌ winicob ñucoʼ bʌ i yeʼtel tsaʼ majliyob i suben Roboam chaʼan mach jontolic miʼ mel i bʌ tiʼ tojlel jini winicob xʼixicob. Pero Roboam maʼanic tsiʼ ñichʼta jini tsaʼ bʌ subenti. Ñumento tsaʼ caji i ticʼlan jini winicob xʼixicob bajcheʼ ti ñaxan. Jin chaʼan, jini winicob xʼixicob tsiʼ waʼchocoyob ti rey Jeroboam tiʼ tojlel jini lujunmojt winicob xʼixicob, pero jini chaʼmojt winicob xʼixicob i chaʼan bʌ Benjamín yicʼot Judá chʌn jiñob i rey Roboam.

Jeroboam mach yomic chaʼan jini xtejclumob miʼ majlelob ti chʼujutesaya yaʼ tiʼ templo Jioba am bʌ ti Jerusalén. Jin chaʼan tsiʼ mele chaʼcojt alʌ tat wacax melbil bʌ ti oro, tsiʼ yʌqʼue i chʼujutesan jini lujunmojt winicob xʼixicob. Mach jalic tsaʼ bujtʼi jini tejclum ti jontolil.

Cheʼ jaʼel an tac wocol yaʼ tiʼ yumʌntel jini chaʼmojt winicob xʼixicob. Maʼanic tsiʼ taja joʼpʼejl jab cheʼ bʌ Roboam tsaʼ ochi ti rey, jini rey bʌ ti Egipto tsaʼ tili i contrajin Jerusalén. Tsiʼ xujchʼiyob cabʌl chubʌʼañʌl tac letsem bʌ i tojol yaʼ tiʼ templo Jioba. Jin chaʼan jini templo mach cabʌlic qʼuin tsaʼ jalʼa bajcheʼ an ti ñaxan.

1 Reyes 11:26-43; 12:1-33; 14:21-31.