Cʌntesʌntel 67
Josafat tsiʼ ñopo ti Jioba
¿AWUJIL ba majquiyob jini winicob yicʼot chuqui woliʼ melob? Jini ñaxam bʌ winicob woliyob i chaʼleñob cʼay majlel, i woliyob majlel ti guerra. Tajol maʼ cʼajtiben a bʌ: ‹¿Chucoch maʼañobic i yespada tac yicʼot i lanzajob chaʼan miʼ majlelob ti guerra jini woliyoʼ bʌ ti cʼay majlel?›. Laʼ laj qʼuel.
Josafat jiñʌch rey yaʼ tiʼ yumʌntel jini chaʼmojt winicob xʼixicob i chaʼan Israel. Tsaʼ chumle cheʼ tiʼ yorajlel jini rey Acab yicʼot Jezabel, yumʌloʼ bʌ yaʼ ti lujunmojt tejclum an bʌ ti norte. Pero Josafat mach jontol bʌ rey, cheʼ cuxulto i tat jaʼel i cʼabaʼ Asa, mach jontolic. Jin chaʼan jini yaʼ bʌ chumulob tiʼ yumʌntel chaʼmojt winicob xʼixicob an bʌ ti sur, jal tsaʼ chumleyob ti wen tijicñʌyel.
Pero an chuqui tsaʼ bʌ ujti, tsaʼ bʌ yʌcʼʌ ti bʌqʼuen jini winicob xʼixicob. Tsaʼ cʼotiyob xsuboñelob yaʼ baqui an Josafat, tsiʼ yʌlʌyob: ‹Woliʼ tilelob cabʌl soldadojob, tilemoʼ bʌ tiʼ tejclum Moab, Amón yicʼot yaʼ ti wits i cʼabaʼ Seír›. Yonlel israelob tsiʼ tempayob i bʌ yaʼ ti Jerusalén chaʼan miʼ cʼajtibeñob i coltʌntel Jioba. Tsaʼ majliyob yaʼ ti templo, yaʼʌch baqui tsiʼ chaʼle oración Josafat: ‹C yum Jioba Dios, maʼanic mic ñaʼtan chuqui yom mic mel. Maʼanic chuqui miʼ mejlel c mel lojon tiʼ tojlel ili yonlel soldadojob. Coltañon lojon jatet›.
Jioba tsiʼ jacʼʌ jini oración, tsiʼ choco majlel juntiquil i winic chaʼan miʼ suben jini tejclum: ‹Jini guerra mach laʼ chaʼanic, i chaʼañʌch Dios. Maʼanic mi laʼ cajel ti guerra. Yom jach waʼaletla miʼ laʼ wajñel, qʼuelela bajcheʼ mi caj i coltañetla Jioba›.
Ti yijcʼʌlal, cheʼ ti sʌcʼan Josafat tsiʼ sube jini tejclum: ‹¡Xucʼchocon laʼ pusicʼal tiʼ tojlel Jioba!›. Cheʼ jini, tsiʼ waʼchoco xcʼayob ti tojlel i soldadojob, pero cheʼ woliyob ti xʌmbal majlel, woliyob ti cʼay jaʼel chaʼan miʼ ñuqʼuesʌbeñob i cʼabaʼ Jioba. ¿Awujil ba chuqui tsaʼ ujti cheʼ woli i lʌcʼtesañob i bʌ chaʼan jini guerra? Jioba tsiʼ yʌcʼʌ chaʼan jini i contrajob jin jach miʼ chaʼ lajal tsʌnsañob i bʌ. ¡Laj chʌmeñobix jini soldadojob, cheʼ bʌ tsaʼ cʼotiyob jini israelob yaʼ baqui añob!
Josafat wen an i ñaʼtʌbal cheʼ tsiʼ ñopo ti Dios, ¿ñomach? Mi cheʼʌch mi lac mel jaʼel, woliyʌch lac pʌs chaʼan añʌch lac ñaʼtʌbal.
1 Reyes 22:41-53; 2 Crónicas 20:1-30.