Cʌntesʌntel 70
Jonás yicʼot jini colem chʌy
QʼUELE jini winic yaʼ bʌ an ti jaʼ. Tsaʼ yotsa i bʌ ti cabʌl wocol, ¿ñomach? ¡Mi caj i mʌsʌntel ti colem chʌy! ¿Awujil ba majqui jini winic? I cʼabaʼ Jonás. Laʼ laj qʼuel bajcheʼ tsiʼ yotsa i bʌ ti cabʌl wocol.
Jonás xʼaltʼan i chaʼan bʌ Jioba. Cheʼ maxto wajali chʌmi jini xʼaltʼan Eliseo, Jioba tsiʼ sube Jonás: ‹Cucu ti Nínive, jini colem tejclum. Com chaʼan maʼ subeñob jini cabʌl i jontolelob winicob xʼixicob yaʼi›.
Pero Jonás mach yomic majlel. Jin chaʼan, tsiʼ ochi ti jumpʼejl barco mach bʌ yaʼic miʼ majlel ti Nínive. Pero Jioba maʼanic tsiʼ mulaj cheʼ Jonás tsaʼ putsʼi. Jin chaʼan Jioba tsiʼ choco tilel pʼʌtʌl icʼ jaʼal yaʼ ti ñajb. Wen pʼʌtʌl jini icʼ jaʼal, jin chaʼan jini barco cheʼ bʌ mi caj i sujpʼejl. Jini xʼeʼtelob ti barco tsaʼ wen cajiyob ti bʌqʼuen, tsaʼ caji yotañob i diosteʼ tac chaʼan miʼ coltʌntelob.
Cheʼ jini, Jonás tsiʼ yʌlʌ: ‹Joñon mic chʼujutesan Jioba, jini Dios tsaʼ bʌ i mele panchan yicʼot Pañimil. Woliyon ti putsʼel chaʼan maʼanic mic mel tsaʼ bʌ i subeyon Jioba›. Jin chaʼan jini xʼeʼtelob ti barco tsiʼ cʼajtibeyob Jonás: ‹¿Chuqui yom mic melbeñet lojon chaʼan miʼ ñʌjchʼel jini icʼ jaʼal?›.
‹Chocoyonla ochel yaʼ ti ñajb, mi caj i ñʌjchʼel›, cheʼen Jonás. Jini xʼeʼtelob ti barco mach yomobic i mel iliyi, pero cheʼ tsaʼ caji ti ñumen tsʌtsʼan jini icʼ jaʼal, tsiʼ chocoyob ochel Jonás yaʼ ti ñajb. Ti jin bʌ ora, jini icʼ jaʼal ñʌjchʼen tsaʼ cʌyle yicʼot cheʼ jaʼel jini ñajb.
Cheʼ bʌ Jonás tsaʼ sujpʼij yaʼ ti jaʼ, tsaʼ mʌsʌnti ti juncojt colem chʌy. Pero Jonás maʼanic tsaʼ chʌmi. Yaʼ tsaʼ cʌle tiʼ ñʌcʼ jini chʌy uxpʼejl qʼuin yicʼot uxpʼejl acʼʌlel. Jini Jonás tsiʼ mele i pusicʼal cheʼ maʼanic tsiʼ jacʼbe i tʼan Jioba yicʼot chaʼan maʼanic tsaʼ majli yaʼ tiʼ tejclum Nínive. Jin chaʼan, ¿awujil ba chuqui tsiʼ mele?
Jonás tsiʼ pejca Jioba ti oración chaʼan miʼ cʼajtiben i coltaya. Cheʼ jini, Jioba tsiʼ yʌqʼue mandar jini chʌy chaʼan miʼ xejtan loqʼuel Jonás yaʼ ti tiquin lum. Ti wiʼil, Jonás tsaʼ majli yaʼ ti Nínive. ¿Maʼanic ba miʼ cʌntesañonla, chaʼan wen añʌch i cʼʌjñibal mi lac mel chuqui jach miʼ subeñonla Jioba?
Libro i chaʼan Jonás 1-4.