Cʌntesʌntel 75
Chʌntiquil chʼitoñob yaʼ ti Babilonia
JINI rey Nabucodonosor tsiʼ pʌyʌ majlel jini israelob wen utsʼat cʌntesʌbiloʼ bʌ yaʼ ti Babilonia. Ti wiʼil, tsiʼ yajca loqʼuel jini chʼitoñob wen i tʼojol jax bʌ yicʼot wen añoʼ bʌ i ñaʼtʌbal. Ila ti dibujo maʼ qʼuel chʌntiquil. Juntiquil jiñʌch Daniel, jini yambʌ uxtiquil chʼitoñob miʼ subentelob yaʼ ti Babilonia bajcheʼ Sadrac, Mesac yicʼot Abednego.
Nabucodonosor yom i ñumen cʌntesañob chaʼan miʼ chaʼleñob eʼtel yaʼ ti yotot. Cheʼ anix uxpʼejl jab i cʌntesʌntelob, Nabucodonosor mi caj i yajcan jini wen yujiloʼ bʌ, chaʼan miʼ coltañob i tojʼesan wocol tac. Nabucodonosor tsiʼ yʌlʌ chaʼan jini bʌlñʌcʼʌl muʼ bʌ i cʼuxob, yicʼot jini vino muʼ bʌ japob yicʼot i familia, jiñʌch mi yʌqʼuentelob jaʼel jini chʌntiquil chʼitoñob, come yom chaʼan wen pʼʌtʌlob.
Qʼuele jini chʼiton Daniel. ¿Awujil ba chuqui woliʼ suben i winic wen ñuc bʌ i chaʼan Nabucodonosor, i cʼabaʼ Aspenaz? Woliʼ suben chaʼan mach yomic i cʼux jini bʌlñʌcʼʌl wen sumuc bʌ yaʼ bʌ an tiʼ mesa jini rey. Pero Aspenaz miʼ cʼojoʼtan. ‹Jini rey tsaʼix yʌlʌ chuqui mi caj laʼ cʼux yicʼot chuqui mi caj laʼ jap›, cheʼ tsiʼ yʌlʌ. ‹Mi maʼanic cheʼ laʼ cʼocʼlel bajcheʼ yañoʼ bʌ chʼitoñob, tajol miʼ tsʌnsañon jini rey.›
Jini xcʌntaya tsaʼ bʌ waʼchoconti ti Aspenaz, chaʼan miʼ cʌntan Daniel yicʼot jini uxtiquil i yamigojob, tsaʼ caji ti pejcʌntel ti Daniel. ‹Ñopoyon lojon lujumpʼejl qʼuin›, cheʼen. ‹Aqʼueñon lojon j cʼux pejtelel chuqui miʼ colel ti pʌcʼʌbʌl yicʼot jaʼ chaʼan mic jap lojon. Cheʼ jini lajayon lojon yicʼot jini chʼitoñob muʼ bʌ i cʼuxob chuqui miʼ cʼux jini rey, i qʼuele majqui ñumen an i cʼocʼlel.›
Jini xcʌntaya tsiʼ jacʼʌ chuqui tsaʼ bʌ subenti. Cheʼ tsaʼix ñumi lujumpʼejl qʼuin, Daniel yicʼot i yamigojob ñumen cʼocʼoʼ to bajcheʼ jini yambʌ chʼitoñob, jin chaʼan tsaʼ chʌn ajqʼuiyob i cʼux jini muʼ bʌ i colel ti pʌcʼʌbʌl, chaʼan mach jinic miʼ cʼuxob muʼ bʌ i yʌqʼuentelob ti rey.
Cheʼ tsaʼ tsʼʌctiyi uxpʼejl jab, tiʼ pejtelel jini xcolelob tsaʼ pʌjyiyob majlel, tiʼ tojlel jini rey Nabucodonosor. Cheʼ tsaʼ ujtiyob ti pejcʌntel, jini rey tsiʼ qʼuele chaʼan Daniel yicʼot uxtiquil i yamigojob, jiñobʌch wen yujiloʼ bʌ. Jin chaʼan, tsaʼ ajqʼuiyoʼ bajcheʼ xcoltayajob chaʼan jini rey yaʼ tiʼ yotot. Cheʼ miʼ cʼotel jini rey, yicʼot i cʼajtiya yicʼot i wocol baqui an jini Daniel, Sadrac, Mesac yicʼot Abednego, ñumen to lujunsujtel yujilob bajcheʼ jini motomajob o jini wen añoʼ bʌ i ñaʼtʌbal, i chaʼan jini rey.
Daniel 1:1-21.