Cʌntesʌntel 76
Tsaʼ jisʌnti Jerusalén
ANIX ñumen lujumpʼejl jab cheʼ bʌ jini rey Nabucodonosor tsiʼ pʌyʌyob majlel yaʼ ti Babilonia jini israelob wen cʌntesʌbiloʼ bʌ. ¡I wʌle qʼuele yaʼ ti dibujo! Woli ti pulel Jerusalén, jini israelob maʼanic bʌ tsaʼ chʌmiyob, tsaʼ cʌjchiyob majlel yaʼ ti Babilonia.
Cʼajal a chaʼan, iliyi jiñʌch tsaʼ bʌ i yʌlʌyob jini xʼaltʼañob muʼ bʌ i cajel ti ujtel mi maʼanic miʼ cʌyob jontol bʌ i melbalob. Pero jini israelob maʼanic tsiʼ ñichʼtayob tsaʼ bʌ subentiyob ti xʼaltʼañob. Tsaʼ chʌn caji i chʼujutesañob dios tac mach bʌ isujmic i mach jinic Jioba. Jin chaʼan cheʼʌch yomob tiʼ tajayob wocol. Lac cujilix come jini Ezequiel xʼaltʼan bʌ i chaʼan Dios miʼ subeñonla jini jontolil tsaʼ bʌ i meleyob jini israelob.
¿Awujil ba majqui jini Ezequiel? Jiñʌch juntiquil chʼiton anix bʌ lujumpʼejl jab i pʌjyel majlel ti Nabucodonosor yaʼ ti Babilonia cheʼ maxto jisʌnti Jerusalén. Daniel yicʼot jini uxtiquil i yamigo i cʼabaʼ, Sadrac, Mesac yicʼot Abednego, ti jini bʌ qʼuin tsaʼ pʌjyiyob majlel jaʼel yaʼ ti Babilonia.
Cheʼ yaʼ to an Ezequiel ti Babilonia, Jioba tsiʼ pʌsbe ti jumpʼejl milagro, chuqui woli ti ujtel yaʼ ti templo, am bʌ ti Jerusalén. Jioba tsiʼ pʌsbe iliyi ti jumpʼejl milagro. Tiʼ sujmʌch chaʼan jini Ezequiel yaʼ to an ti Babilonia, pero Jioba tsaʼ yʌqʼue i qʼuel chuqui woli ti ujtel yaʼ ti templo. ¡Wen bʌbʌqʼuen jax tsaʼ bʌ i qʼuele!
Jioba tsiʼ sube Ezequiel, ‹qʼuele jini cʼax bibiʼ jax bʌ woliʼ melob winicob xʼixicob yaʼ ti templo›. Yicʼot jaʼel, ‹qʼuele jini yejtal lucum tac yicʼot yambʌ añimal tac tsaʼ bʌ i meleyob yaʼ tiʼ tsʼajquil jini templo. ¡I qʼuele bajcheʼ jini israelob woliʼ chʼujutesañob!›. Ezequiel tsaʼʌch i qʼuele chuqui woli bʌ ti ujtel, i tsaʼ i tsʼijbu.
Jioba tsiʼ cʼajtibe Ezequiel, ‹¿woli baʼ qʼuel chuqui woliʼ melob ti mucul, jini ñaxan bʌ mi yʌcʼob i bʌ yaʼ ti Israel?›. Woliyʌch, tsaʼʌch mejli i qʼuel jaʼel iliyi. Yaʼ an lujuntiquil i chʌncʼal (70) winicob, tiʼ pejtelelob woliʼ chʼujutesañob jini dios tac mach bʌ isujmic. Woliʼ yʌlob: ‹Jioba maʼanic miʼ qʼuelonla. Tsaʼix loqʼui majlel ti tejclum›.
Cheʼ jini, Jioba tsiʼ yʌqʼue i qʼuel Ezequiel lamital xʼixicob yaʼ bʌ buchulob tiʼ tiʼ i puertajlel jini templo, yaʼ bʌ an tiʼ tojel norte. Tsiʼ qʼuele Ezequiel yaʼ añob i chʼujutesañob jini Tamuz, i diosob mach bʌ isujmic. Ezequiel tsaʼ subenti, ¡qʼuele jini winicob yaʼ bʌ añob tiʼ tiʼ jini i templo Jioba! Yaʼañob joʼtiquil i chaʼcʼal (25) winicob. Jiñʌch tsaʼ bʌ i qʼuele Ezequiel. ¡Woli i ñocchocoñob i bʌ tiʼ tojlel i pasibal qʼuin, i woli i chʼujutesañob jini Qʼuin!
Tsiʼ yʌlʌ Jioba, ‹ili winicob xʼixicob maʼanic miʼ qʼueloñob ti ñuc›. ‹¡Mach jinic jach miʼ melob chuqui mach bʌ wenic, cheʼ to miʼ tilelob tic templo i melob iliyi!› Jin chaʼan Jioba tsiʼ yʌcʼʌ i tʼan: ‹Mi caj i yubiñob i pʼʌtʌlel c michʼajel. Maʼanic mi cac pʼuntañob baqui ora mi caj i jisʌntelob›.
An jax to uxpʼejl jab i pʌsbentel Ezequiel iliyi, cheʼ bʌ jini israelob tsiʼ chanʼesayob i bʌ ti tojlel jini rey Nabucodonosor. Jin chaʼan tsaʼ majli ti guerra tiʼ tojlelob. Cheʼ tsaʼix ñumi jumpʼejl jab yicʼot ojlil jab, jini babiloniojob tsiʼ jemeyob jini tsʼajc tac yaʼ ti Jerusalén i tsaʼ ochi i pulob jini tejclum. Yonlel winicob xʼixicob tsaʼ chʌmiyob i yañoʼ bʌ tsaʼ cʌjchiyob majlel yaʼ ti Babilonia.
¿Chucoch maʼanic chuqui tsiʼ mele Jioba, chaʼan maʼanic miʼ jisʌntelob jini israelob? Come maʼanic tsiʼ ñichʼtayob tsaʼ bʌ subentiyob ti Jioba yicʼot maʼanic tsiʼ jacʼbeyob i mandar. Iliyi miʼ cʌntesañonla chaʼan yomʌch mi lac mel ti pejtelel ora chuqui miʼ subeñonla Jioba.
Ti ñaxan tsaʼ ajqʼui chaʼan miʼ cʌytʌl junmojt yaʼ tiʼ lum Israel. Jini rey Nabucodonosor tsiʼ waʼchoco juntiquil judío i cʼabaʼ Gedalías chaʼan miʼ chaʼlen yumʌntel tiʼ tojlel jini tsaʼ bʌ cʌleyob ti Judá. Pero cheʼ jini, Gedalías tsaʼ tsʌnsʌnti ti lamital israelob. Cheʼ jini, tsaʼ cajiyob ti bʌqʼuen chaʼan mi yochelob jini babiloniojob i miʼ jisʌntelob chaʼan tiʼ caj jini tsaʼ bʌ i meleyob. Jin chaʼan tsiʼ wersa pʌyʌyob majlel Jeremías yicʼotob, i tsaʼ putsʼiyob majlel ti Egipto.
Maʼanix winicob xʼixicob tsaʼ cʌyle yaʼ tiʼ tejclum Israel. Maʼanic majqui tsaʼ chumle yaʼ ti tejclum ti lujumpʼejl i chʌncʼal (70) jab. Mi juntiquilic to tsaʼ cʌyle yaʼ ti tejclum. Pero Jioba tsaʼ yʌqʼueyob i tʼan chaʼan mi caj i chaʼ sujtesʌntelob tilel yaʼ tiʼ tejclumob, cheʼ tsaʼix ñumi lujumpʼejl i chʌncʼal (70) jab. Cheʼ yaʼ to añob ti Babilonia, ¿chuqui tsiʼ chaʼle i tejclum Dios? Laʼ laj qʼuel.
2 Reyes 25:1-26; Jeremías 29:10; Ezequiel 1:1-3; 8:1-18.