Cʌntesʌntel 82

Mardoqueo yicʼot Ester

LAʼ lac ñaʼtan cheʼ ti wajali, cheʼ bʌ Esdras maxto anic majlem yaʼ ti Jerusalén. Maʼanic yambʌ israelob ñucoʼ bʌ bajcheʼ Mardoqueo yicʼot Ester, añoʼ bʌ tiʼ yumʌntel Persia. Ester jiñʌch yumʌl bʌ xʼixic, Mardoqueo jiñʌch yalobil i yichan, ñumen ñuc bajcheʼ jini yañoʼ bʌ, pero mach cheʼic tiʼ tojlel jini rey. Laʼ laj qʼuel bajcheʼ tsaʼ ujti iliyi.

Tsaʼ chʌmi i tat i ña Ester cheʼ alʌ xchʼoc to, jin chaʼan tsaʼ coli tiʼ yotot Mardoqueo. Asuero, rey bʌ ti Persia, an i palacio yaʼ ti tejclum i cʼabaʼ Susa, Mardoqueo jiñʌch junticlel i yaj eʼtel. An jumpʼejl bʌ qʼuin i yijñam jini rey, i cʼabaʼ Vasti, maʼanic tsiʼ jacʼʌ chuqui tsaʼ bʌ subenti, jini chaʼan jini rey tsiʼ sʌcla yambʌ i yijñam bajcheʼ yumʌl bʌ xʼixic. ¿Awujil ba majqui jini xʼixic tsaʼ bʌ i yajca? Jiñʌch i tʼojol jax bʌ Ester.

¿Muʼ baʼ qʼuel jini winicob xʼixicob woliʼ lijchocoñob i bʌ tiʼ tojlel jini winic wen chan bʌ miʼ qʼuel i bʌ? Jiñʌch Amán, juntiquil winic wen ñuc bʌ ti Persia. Amán yom chaʼan jini Mardoqueo, yaʼ bʌ buchul maʼ qʼuel, miʼ lij chocon i bʌ tiʼ tojlel. Pero Mardoqueo mach cheʼic tsiʼ mele. Come mach wenic miʼ qʼuel cheʼ miʼ lijchocon i bʌ tiʼ tojlel juntiquil winic wen jontol bʌ. Amán tsaʼ wen michʼa. Muʼto caj a cʌn chuqui tsiʼ mele.

Amán tsiʼ sube jini rey chuqui mach bʌ isujmic tiʼ tojlel israelob. Tsiʼ yʌlʌ, ‹jontolob yicʼot maʼanic miʼ jacʼbeñetob a mandar. Yom miʼ jisʌntelob›. Asuero mach yujilic chaʼan jini i yijñam tilem ti Israel. Tsiʼ jacʼbe i tʼan jini Amán, tsiʼ tsʼijbu jumpʼejl mandar baqui tsiʼ yʌlʌ, chaʼan ti jumpʼejl bʌ qʼuin mi caj i jisʌntelob tiʼ pejtelel jini israelob.

Cheʼ bʌ Mardoqueo tsiʼ yubi chaʼan jini mandar, tsaʼ cajiʼ wen mel i pusicʼal. Tsiʼ chocbe majlel ili tʼan Ester: ‹Pejcan jini rey, cʼajtiben miʼ coltañonla chaʼan maʼanic mi lac chʌmel›. Cheʼ an majqui miʼ yochel yaʼ baqui an jini rey cheʼ mach pʌybilic, woliʼ ñusañob ti pʼis jini mandar yaʼ ti Persia. Pero Ester tsaʼ ochi anquese mach pʌybilic. Cheʼ bʌ tsiʼ sʌtsʼʌ i teʼ jini rey melbil bʌ ti oro, yom yʌl chaʼan mach yomic miʼ tsʌnsʌntel. Ester tsiʼ pʌyʌ ti ñuc bʌ cʼux waj jini rey yicʼot jaʼel jini Amán. Jini rey tsiʼ cʼajtibe Ester mi yom coltʌntel. Ester tsiʼ sube chaʼan mi caj i suben bajcheʼ yom miʼ coltʌntel, pero mi mucʼʌch i chaʼ majlelob ti cʼux waj baqui mi caj i mel tiʼ yijcʼʌlal.

Yaʼ baqui woliʼ cʼuxob i waj, Ester tsiʼ sube jini rey: ‹Mi cac jisʌntel yicʼot c tejclum›. Jini rey tsaʼ wen michʼa. Tsiʼ cʼajti, ‹¿majqui yom i mel bajcheʼ jini?›.

Ester tsiʼ yʌlʌ, ‹¡jini winic, yom bʌ i jisañon lojon, jiñʌch ili Amán!›.

Jini rey tsaʼ wen michʼa. Tsiʼ yʌcʼʌ i tʼan chaʼan miʼ tsʌnsʌntel Amán. Ti wiʼil, jini rey tsiʼ waʼchoco Mardoqueo ti ñumen ñuc bʌ i yaj eʼtel bajcheʼ yañoʼ bʌ, pero mach ñuquic tiʼ tojlel jini rey. Cheʼ jini, Mardoqueo tsiʼ yʌcʼʌ ti mejlel yambʌ tsijib mandar, baqui miʼ yʌl chaʼan miʼ mejlel i coltañob i bʌ jini israelob cheʼ miʼ tsaʼ tili i tsʌnsʌntelob. Come Mardoqueo anix cabʌl i ñuclel, wʌle cabʌl winicob xʼixicob miʼ coltan jini israelob, maʼanic tsaʼ jisʌntiyob tiʼ contrajob.

Libro i chaʼan Ester 1-10.