Cʌntesʌntel 84
Juntiquil ángel tsiʼ julaʼta María
ILI wen i tʼojol jax bʌ xʼixic jiñʌch María. Chʼoyol ti Israel pero yaʼ chumul tiʼ tejclum i cʼabaʼ Nazaret. Dios yujil chaʼan María juntiquilʌch xʼixic wem bʌ chuqui miʼ mel. Jin chaʼan tsiʼ choco tilel i yángel i cʼabaʼ Gabriel chaʼan miʼ pejcan María. ¿Awujil ba chuqui tsaʼ subenti María ti Gabriel? Laʼ laj qʼuel.
Gabriel tsiʼ yʌlʌ: ‹¿Bajcheʼ a wilal?, woliʼ qʼuelet Dios ti utsʼat. An a wicʼot Jioba›. María maʼanic baʼ i qʼuele jini winic. Tsiʼ mele i pusicʼal, come mach yujilic chuqui i sujmlel jini tʼan tsaʼ bʌ subenti. Pero ti jini jach bʌ ora, Gabriel tsaʼ caji i suben chaʼan mach yomic miʼ mel i pusicʼal.
Tsiʼ yʌlʌ: ‹Mach a chaʼlen bʌqʼuen, María. Jioba utsʼat woliʼ qʼuelet. Jin chaʼan mi caj i mel ñuc bʌ ti a tojlel. Mach jalix mi caj a cʌntan juntiquil a walobil. Mi caj a wotsʌben i cʼabaʼ Jesús›.
Gabriel tsaʼ caji i bej tsictesan majlel: ‹Jini alʌl chʼiton mi caj i qʼuejlel ti ñuc yicʼot mi caj i pejcʌntel tiʼ Yalobil jini Cʼax Ñuc bʌ Dios. Jioba mi caj i waʼchocon ti rey, cheʼ bajcheʼ tsiʼ mele tiʼ tojlel David. ¡Pero Jesús reyʌch miʼ cajel ti pejtelel ora, jini i yumʌntel maʼanic i jilibal!›.
‹¿Bajcheʼ mi caj i yujtel tiʼ pejtelel jini?›, cheʼ tsiʼ cʼajti María. ‹¿Bajcheʼ mi caj i tilel calobil, cheʼ maʼanic ñujpuñemon mi anic piʼlebil c chaʼan winic?›
Gabriel tsiʼ yʌlʌ: ‹Mi caj i yochel i pʼʌtʌlel Dios ti a tojlel. Jini alʌ chʼiton mi caj i subentel bajcheʼ i Yalobil Dios›. Jin chaʼan tsiʼ chaʼ sube: ‹Yom cʼajal a chaʼan jini a piʼʌl Elisabet. Jini winicob xʼixicob tsiʼ yʌlʌyob chaʼan anix i jabilel chaʼan mi yʌcʼ i yalobil. Pero mach jalix mi caj i yilan pañimil i yalobil. Jin chaʼan, maʼanic chuqui mach bʌ mejlic i mel Dios›.
Cheʼ jini María tsiʼ yʌlʌ: ‹¡xʼEʼtelon i chaʼan Jioba! Laʼ melbenticon bajcheʼ tsaʼ wʌlʌ›. Cheʼ jini tsaʼ majli jini ángel.
María ti ora jach tsaʼ majli i julaʼtan Elisabet. Cheʼ bʌ jini Elisabet tsiʼ yubibe i tʼan María, jini alʌl cʌntʌbil bʌ i chaʼan tsʌts tsiʼ ñijca i bʌ chaʼan i tijicñʌyel. Elisabet tsaʼ bujtʼi ti chʼujul bʌ espíritu, tsiʼ sube jini María: ‹Mi caj a sujbel ti ñuc tiʼ tojlel jini xʼixicob›. Lʌcʼʌ uxpʼejl uw tsaʼ ajni María baʼan Elisabet, cheʼ jini, ti chaʼ sujti majlel ti Nazaret.
Mach jalix miʼ cajel ti ñujpuñel María yicʼot juntiquil winic i cʼabaʼ José. Pero cheʼ bʌ José tsiʼ ñaʼta chaʼan María mi caj i cʌntan i yalobil, tsiʼ ñaʼta chaʼan mach wenic miʼ ñujpuñel yicʼot. Cheʼ jini, i yángel Dios tsiʼ sube José: ‹Mach a bʌcʼñan a pʌy ti a wijñam jini María. Come jiñʌch Dios tsaʼ bʌ i yʌqʼue i yalobil›. Jin chaʼan María yicʼot José tsaʼ ñujpuñiyob, i tsiʼ pijtayob chaʼan mi yilan pañimil Jesús.