Cʌntesʌntel 86

Tsiʼ tsajcayob majlel jumpʼejl ecʼ

¿MUʼ baʼ qʼuel jini ecʼ ñumen tsʼʌyʌl bʌ, yaʼ bʌ woli i tuchʼ jini winic? Jini winicob yaʼ tilemob tiʼ pasibal qʼuin yicʼot miʼ pejcañob ecʼ tac. Tsiʼ lon ñaʼtayob chaʼan mi caj i pʌyob majlel jini tsijiʼ bʌ ecʼ yaʼ baqui an juntiquil wen ñuc bʌ.

Cheʼ bʌ jini winicob tsaʼ cʼotiyob ti Jerusalén, tsiʼ cʼajtiyob: ‹¿Baqui an jini alʌl muʼ bʌ caj i yochel tiʼ rey jini judíojob?›. «Judíojob», jiñʌch yambʌ bajcheʼ miʼ subentelob jini israelob. ‹Tsaj qʼuele lojon i yecʼ tiʼ pasibal qʼuin yicʼot tsaʼ tiliyon lojon chaʼan mic chʼujutesan lojon›, cheʼ tsiʼ yʌlʌyob jini winicob.

Jini Herodes, rey bʌ yaʼ ti Jerusalén, tsiʼ mele i pusicʼal cheʼ bʌ tsiʼ yubi iliyi. Jini rey Herodes mach yomic chaʼan yambʌ rey miʼ chʼʌmben i yumʌntel. Jin chaʼan tsiʼ cʼajtibe jini ñuc bʌ motomajob: ‹¿Baqui mi caj i yilan pañimil jini rey wʌn albilix bʌ?›. Tsiʼ jacʼʌyob: ‹Jini Biblia miʼ yʌl, mi caj i yilan pañimil yaʼ ti Belén›.

Jin chaʼan Herodes tsiʼ subeyob jini winicob chʼoyoloʼ bʌ tiʼ pasibal qʼuin: ‹Wersa sajcanla jini alʌl. Cheʼ mi laʼ taj, yom mi laʼ tilel laʼ subeñon. Com majlel c chʼujutesan jaʼel›. ¡Pero mach isujmic, yom bʌ i mel Herodes jiñʌch miʼ tsʌnsan jini alʌl!

Cheʼ jini, cheʼ bʌ ti loqʼuiyob yaʼ ti Jerusalén, tsiʼ chaʼ pʌsʌ i bʌ jini ecʼ, tsaʼ caji i chaʼlen xʌmbal majlel tiʼ wutob, cʼʌlʌl miʼ cʼotelob ti Belén, jini ecʼ tsiʼ cʌyʌ xʌmbal, yaʼ tiʼ chañelal baʼan jini alʌl. Cheʼ bʌ tsaʼ cajiyob ti ochel jini winicob yaʼ ti otot, yaʼʌch an María yicʼot jini alʌl Jesús. Tsiʼ yʌqʼueyob i majtan Jesús. Pero ti wiʼil, Jioba tsiʼ subeyob jini xpejcaya ecʼob chaʼan maʼanic miʼ chaʼ sujtelob majlel yaʼ baqui an jini Herodes. Jin chaʼan, cheʼ tsaʼ sujtiyob majlel tiʼ tejclumob, ti yambʌlix bij tsaʼ ñumiyob majlel.

Cheʼ bʌ Herodes tsiʼ yubi chaʼan jini winicob tsaʼix sujtiyob majlel, tsaʼ wen michʼa. Tsiʼ choco ti tsʌnsʌntel jini alʌlob an jax to bʌ i chaʼañob chaʼpʼejl jab o maxto bʌ i taja. Pero Jioba tsiʼ ñaxan sube José ti jumpʼejl ñajal, jin chaʼan tsaʼ majli yicʼot i familia ti Egipto. Ti wiʼil, cheʼ bʌ tsaʼ yubi José chaʼan Herodes tsaʼix chʌmi, ti chaʼ sujti majlel yicʼot María yicʼot Jesús yaʼ ti Nazaret. Yaʼʌch baqui tsaʼ coli Jesús.

¿Majqui tsiʼ yʌcʼʌ ti tsʼʌjyel jini ecʼ maʼ wʌl? Yom cʼajal a chaʼan, jini winicob ñaxan tsajñiyob yaʼ ti Jerusalén cheʼ bʌ tsiʼ qʼueleyob jini ecʼ. Satanás jini Diablo tsiʼ ñaʼta i tsʌnsʌben i Yalobil Dios, i yujil jaʼel chaʼan jini rey bʌ yaʼ ti Jerusalén, i cʼabaʼ Herodes yomʌch i tsʌnsan jaʼel. Jin chaʼan, jiñʌch Satanás tsaʼ bʌ i yʌcʼʌ ti tsʼʌjyel jini ecʼ.

Mateo 2:1-23; Miqueas 5:2.