Cʌntesʌntel 88
Juan tsiʼ yʌcʼʌ ti chʼʌm jaʼ Jesús
QʼUELE, woliʼ jubel tilel tiʼ chañelal i jol jini winic juncojt xʼujcuts tilem bʌ ti panchan. Jini winic jiñʌch Jesús. Cheʼ bʌ ora jini, anix cheʼ bʌ lujumpʼejl i chaʼcʼal (30) i jabilel. Yaʼ bʌ an yicʼot jiñʌch Juan. Tsaʼix laj cʌñʌ majqui jini Juan. ¿Cʼajal baʼ chaʼan, cheʼ bʌ jini alʌl cʌntʌbil bʌ i chaʼan Elisabet tsiʼ ñijca i bʌ tiʼ malil i ñʌcʼ, chaʼan tijicña cheʼ bʌ tsaʼ cʼoti María i julaʼtan jini i piʼʌl o i majchil bʌ? Jini alʌl maxto bʌ i yila pañimil jiñʌch Juan. Pero, ¿chuqui woliʼ mel Juan yicʼot Jesús yaʼ ti dibujo?
Juan tsiʼ supʼu Jesús yaʼ ti Jordán jaʼ. Cheʼʌch bajcheʼ jini, tsiʼ chʼʌmʌ jaʼ. Miʼ sujpʼejl ochel ti jaʼ, yaʼi miʼ locʼsʌntel. Juan mi yʌcʼ ti chʼʌm jaʼ winicob xʼixicob, jin chaʼan miʼ subentel Juan xʼAcʼ Chʼʌm jaʼ. Pero, ¿chucoch tsiʼ yʌcʼʌ ti chʼʌm jaʼ Jesús?
Weno, Juan tsiʼ mele bajcheʼ jini, come Jesús tsaʼ tili baʼan Juan i tsiʼ sube chaʼan mi yʌcʼ ti chʼʌm jaʼ. Juan mi yʌcʼ ti chʼʌm jaʼ jini winicob xʼixicob yomoʼ bʌ chaʼan miʼ ñusʌbentelob i mul. Pero, ¿tsaʼ ba i chaʼle mulil Jesús? Maʼanic, Jesús maʼanic baqui ora tsiʼ chaʼle mulil, come i Yalobilʌch Dios tilem bʌ ti panchan. Jin chaʼan, añʌch chucoch cheʼ bʌ Jesús tsiʼ sube Juan chaʼan mi yʌcʼ ti chʼʌm jaʼ. Laʼ laj qʼuel chucoch.
Cheʼ bʌ maxto tilem Jesús baqui an Juan, woli ti eʼtel bajcheʼ xjucʼteʼ. Juntiquil xjucʼteʼ jiñʌch muʼ bʌ i mel tac mesa yicʼot buchlibʌl. José, i ñoxiʼal María, juntiquilʌch xjucʼteʼ, jiñʌch tsiʼ pʌsbe i mel Jesús jaʼel. Pero Dios maʼanic tsiʼ choco tilel i Yalobil ti Pañimil chaʼan miʼ chaʼlen eʼtel bajcheʼ xjucʼteʼ. Jioba tsiʼ yʌqʼue jumpʼejl i yeʼtel ñuc bʌ. Jin chaʼan, chaʼan miʼ pʌs iliyi, tsaʼ tili i melben i yeʼtel i Tat, jin chaʼan Jesús tsiʼ cʼajtibe Juan chaʼan mi yʌcʼ ti chʼʌm jaʼ. ¿Wem ba tsiʼ qʼuele Dios iliyi?
Cheʼʌchi, come cheʼ bʌ tsaʼ loqʼui Jesús yaʼ ti jaʼ, tsaʼ yubi tʼan tilem bʌ ti panchan: ‹Iliyi jiñʌch calobil, wen utsʼat mij qʼuel›. Cheʼ jaʼel, tsaʼ jajmi jini panchan yicʼot tsaʼ jubi tilel baʼan Jesús cheʼ bajcheʼ xʼujcuts, pero mach juncojtic xʼujcuts tiʼ sujmlel, come jiñʌch chʼujul bʌ i yespíritu Dios.
Cheʼ bʌ ora jini, Jesús cabʌl chuqui tsaʼ caji i ñaʼtan, jin chaʼan tsaʼ majli ti jochol bʌ lum, tsaʼ jalʼa chaʼcʼal (40) qʼuin yicʼot chaʼcʼal (40) acʼʌlel. Tsaʼ tili Satanás yaʼ baʼan Jesús. Satanás uxyajl tsiʼ ñopo chaʼan Jesús maʼanic miʼ jacʼben i mandar Dios. Pero Jesús mach cheʼic tsiʼ mele.
Cheʼ bʌ tsaʼ ujti jini, Jesús tsiʼ cʌyʌ jini jochol bʌ lum, ti wiʼil tsiʼ cʌñʌ winicob tsaʼ bʌ sujtiyob bajcheʼ ñaxam bʌ xcʌntʼañob i chaʼan. Lamital jiñobʌch: Andrés, Pedro (cʌmbil jaʼel bajcheʼ Simón), Felipe yicʼot Natanael (cʌmbil jaʼel bajcheʼ Bartolomé). Jesús yicʼot jini xcʌntʼañob i chaʼan tsaʼ majliyob ti Galilea. Tsaʼ jijliyob tiʼ tejclum Natanael, i cʼabaʼ Caná, baqui tsaʼ ujti jumpʼejl ñujpuñijel, jiñʌch baqui tsiʼ mele jini ñaxam bʌ i milagro Jesús. ¿Awujil ba baqui bʌ jini milagro? Jiñʌch baqui tsiʼ pʌntesa jaʼ ti vino.
Mateo 3:13-17; 4:1-11; 13:55; Marcos 6:3; Juan 1:29-51; 2:1-12.