Cʌntesʌntel 92
Jesús tsiʼ teche chʼojyel jini chʌmeñoʼ bʌ
JINI alʌ xchʼoc muʼ bʌ a qʼuel yaʼ ti dibujo an jax to lajchʌmpʼejl (12) i jabilel. Jesús chucbebil i chaʼan i cʼʌb jini alʌ xchʼoc, jini i tat yicʼot i ñaʼ yaʼañob tiʼ tʼejl. ¿Awujil ba chucoch wen tijicñayob i tat i ñaʼ? Laʼ laj qʼuel chucoch.
I tat jini alʌ xchʼoc jiñʌch juntiquil winic wen ñuc bʌ i yeʼtel i cʼabaʼ Jairo. Jumpʼejl bʌ qʼuin jini alʌ xchʼoc tsaʼ cʼamʼa, i tsiʼ totsʼchocoyob ti jumpʼejl wʌyibʌl. Pero maʼanic tsaʼ lajmi i cʼamʌjel, i tsaʼ jach ñumen ñijli. Jairo yicʼot yijñam tsaʼ caji i wen cʼojoʼtañob, come mi caj i chʌmel i yalobil. Come cojach bʌ i yalobil. Jini chaʼan Jairo tsaʼ majli i sʌclan Jesús. Come an yubi ti alol chaʼan jini Jesús miʼ mel milagro tac.
Cheʼ bʌ Jairo tsaʼ cʼoti baʼan Jesús, yaʼan cabʌl winicob xʼixicob yicʼotob. Pero Jairo tsaʼ ñumi yaʼ baqui an winicob xʼixicob i tsiʼ ñocchoco i bʌ baʼan Jesús. Tsiʼ yʌlʌ: ‹Wen cʼam calobil›. Tsiʼ cʼajtibe ti wocol tʼan, ‹a wocolic conla ti cotot, lajmesʌben i cʼamʌjel calobil›. Jesús tsiʼ sube chaʼan mucʼʌch caj i majlel.
Cheʼ woliyob ti xʌmbal majlel, jini winicob xʼixicob tsaʼ caji i choc chocob i bʌ. Cheʼ jini Jesús tsaʼ waʼle. Tsiʼ cʼajti: ‹¿Majqui tsiʼ tʌlʌ c pislel?›. Jesús tsiʼ yubi chaʼan tsaʼ loqʼui i pʼʌtʌlel, i yujil chaʼan an majqui tsiʼ tʌlbe i pislel. Pero, ¿majqui? Jiñʌch juntiquil xʼixic anix bʌ lajchʌmpʼejl jab i cajel ti cʼamʼan. ¡Tsaʼ tili baʼan Jesús i tsiʼ tʌlbe i pislel, tsaʼ lajmi i cʼamʌjel!
Cheʼ bʌ tsiʼ qʼuele Jairo ili tsaʼ bʌ ujti, wen tijicña tsiʼ yubi, come yujil chaʼan Jesús mach wocolic miʼ cʼoqʼuesan jini xcʼamʌjelob. Pero cheʼ bʌ ora jini tsaʼ tili juntiquil xsuboñel. Jairo tsaʼ subenti: ‹Mach a chʌn mʌcben qʼuin Jesús. Chʌmenix a walobil›. Cheʼ bʌ Jesús tsiʼ yubi jini tʼan, tsiʼ sube Jairo: ‹Mach a cʼojoʼtan, wen mi caj i yajñel a walobil›.
Cheʼ bʌ Jesús tsaʼ cʼoti tiʼ yotot Jairo, jini winicob xʼixicob woliyob ti uqʼuel chaʼan wen chʼijiyemob. Pero Jesús tsiʼ yʌlʌ: ‹Mach laʼ chaʼlen uqʼuel. Jini alʌ xchʼoc maʼanic chʌmen. Woli jach ti wʌyel›. Pero tsaʼ jach cajiyob ti tseʼñal i tsaʼ caji i wajleñob Jesús, come yujilob chaʼan jini alʌ xchʼoc chʌmenix.
Cheʼ jini, Jesús tsaʼ ochi yicʼot i tat yicʼot i ñaʼ jini alʌ xchʼoc yaʼ ti cuarto yicʼot uxtiquil i apóstolob. Tsiʼ chucbe i cʼʌb i tsiʼ sube: ‹¡Tejchen!› Tsaʼ chaʼ cuxtʌyi jini alʌ xchʼoc cheʼ bajcheʼ maʼ qʼuel yaʼ ti dibujo. ¡Tsaʼ tejchi i tsaʼ caji ti xʌmbal! Jin chaʼan wen tijicña i tat yicʼot ña.
Ili alʌ xchʼoc mach jinic ñaxam bʌ tsaʼ tejchisʌnti chʼojyel. Ñaxam bʌ tsaʼ tejchisʌnti chʼojyel jiñʌch i yalobil jini mebaʼ xʼixic chumul bʌ ti tejclum i cʼabaʼ Naín. Ti wiʼil, Jesús tsiʼ tejchesa chʼojyel jini Lázaro, i yermaño María yicʼot Marta. Cheʼ baqui ora Jesús miʼ tech yumʌntel tsaʼ bʌ aqʼuenti ti Dios mi caj i tejchesan chʼojyel yonlel chʌmeñoʼ bʌ. ¿Mach ba yomic tijicñayonla chaʼan jini?
Lucas 8:40-56; 7:11-17; Juan 11:17-44.