Cʌntesʌntel 94

Miʼ wen cʼuxbin alʌlob

QʼUELE Jesús yaʼ ti dibujo, meʼqʼuel i chaʼan jini alʌ chʼiton. Mi laj qʼuel chaʼan mucʼʌch i qʼuel ti ñuc jini alʌlob. Jini winicob woli bʌ i qʼuelob, jiñobʌch i yaj apóstolob. ¿Awujil ba chuqui tsaʼ subentiyob ti Jesús?

Jesús yicʼot i yaj apóstolob tsaʼ jaxto juliyob ti ñajt bʌ xʌmbal. Jini apóstolob tsiʼ chaʼleyob leto o aʼleya yaʼ ti bij. Jin chaʼan, cheʼ bʌ tsaʼ cʼotiyob baqui tsaʼ jijliyob, Jesús tsiʼ cʼajtibeyob: ‹¿Chuqui woli laʼ wʌl tilel yaʼ ti bij?›. Pero tiʼ sujm Jesús yujilix chuqui tsiʼ yʌlʌyob yaʼ ti bij. Pero tsiʼ cʼajtibeyob chaʼan jach miʼ qʼuel mi mucʼʌch caj i subeñob.

Jini apóstolob maʼanic tsiʼ jacʼʌyob, come yaʼ ti bij tsiʼ chaʼleyob leto o aʼleya tiʼ caj majqui ñumen ñuc. Lamitalob yom i ñumen ñuqʼuesañob i bʌ tiʼ tojlel yañoʼ bʌ. ¿Bajcheʼ mi caj i sub Jesús chaʼan mach wenic mi ñaʼtañob bajcheʼ jini?

Jesús tsiʼ pʌyʌ juntiquil alʌ chʼiton, tsiʼ waʼchoco yaʼ tiʼ tʼejl baqui añob. Cheʼ jini tsiʼ sube xcʌntʼañob i chaʼan: ‹Isujm mic subeñetla: Mi maʼanic mi laʼ sutqʼuin laʼ bʌ bajcheʼ alobob, maʼanic baqui ora mi caj laʼ wochel tiʼ yumʌntel Dios. Majqui jach miʼ mel i bʌ ti pecʼ cheʼ bajcheʼ jini alob, cʼax ñuc mi caj i yajñel ti jini yumʌntel›. ¿Awujil ba chucoch tsiʼ yʌlʌ Jesús iliyi?

Weno, come jini alʌlob maʼanic miʼ ñaʼtañob chaʼan miʼ chanʼesañob i bʌ, mi jinic to chaʼan miʼ qʼuejlelob ti ñumen ñuc tiʼ tojlel yañoʼ bʌ. Jin chaʼan jini apóstolob yom miʼ melob cheʼ bajcheʼ alʌlob, i mach chaʼanic miʼ chaʼleñob leto o aʼleya chaʼan majqui ñumen ñuc.

Ti yan tac bʌ ora jaʼel, Jesús tsiʼ pʌsʌ chaʼan mucʼʌch i qʼuel ti ñuc jini alʌlob. Ti wiʼil, winicob xʼixicob tsiʼ pʌyʌyob majlel i yalobilob yaʼ baqui an Jesús. Jini apóstolob tsiʼ ñopo i locʼsañob jini alʌlob yaʼ baqui an Jesús. Pero Jesús tsiʼ subeyob: ‹Laʼ tilicob alʌlob baʼ añon, mach mi laʼ ticʼob, come pejtelel muʼ bʌ i tilelob bajcheʼ jini mi caj i yochelob tiʼ yumʌntel›. Cheʼ jini tsiʼ meqʼue jini alʌlob i tsaʼ i yʌqʼueyob i bendición. ¡Wen tijicña mi laj cubin cheʼ jini Jesús miʼ wen cʼuxbin jini alʌlob! ¿Ñomach?

Mateo 18:1-4; 19:13-15; Marcos 9:33-37; 10:13-16.