Cʌntesʌntel 100
Jesús yaʼan ti pʌcʼʌbʌl
CHEʼ bʌ tsaʼ loqʼui yaʼ ti cuarto baqui tsaʼ i tempayob i bʌ, Jesús yicʼot i apóstolob, tsaʼ majliyob yaʼ ti pʌcʼʌbʌl i cʼabaʼ Getsemaní. Ñʌmʌl mi yajñelob yaʼi. Jesús tsiʼ sube i apóstolob chaʼan yom chʌn pʼixilob yicʼot chaʼan yom miʼ chaʼleñob oración, Jesús tsaʼ bajñel majli i chaʼlen oración.
Cheʼ bʌ tsaʼ ujti i mel oración Jesús tsaʼ majli baqui an i apóstolob. ¿Chuqui woliʼ melob maʼ wʌl? ¡Wʌyʌlob! Jesús uxyajl tsiʼ subeyob chaʼan yom pʼixil miʼ yajñelob, pero jujunsujtel tsaʼ cʼoti i qʼuelob, wʌyʌlob. ‹¿Chucoch mi laʼ wʌyel cheʼ muʼ tsaʼ laʼ qʼuel bajcheʼ yilal añonla?› Cheʼ tsiʼ yʌlʌ Jesús cheʼ bʌ cojix tsaʼ majli i qʼuelob. ‹Tsaʼix cʼoti i yorajlel chaʼan mi caj i yʌcʼoñob tiʼ cʼʌb j contrajob.›
Ti jin jach bʌ ora tsaʼ caji i yubiñob chaʼan woliʼ tilel cabʌl winicob. ¡Qʼuele! ¡Tsaʼ cʼotiyob cabʌl winicob yicʼotob i espada yicʼot teʼ! Woliʼ chʼʌmob majlel xutunteʼ chaʼan tsiquil pañimil. Cheʼ bʌ tsaʼ cʼotiyob yaʼi, an juntiquil tsaʼ bʌ loqʼui baqui an jini winicob i tsaʼ majli baʼan Jesús. Tsiʼ tsʼujtsʼu, cheʼ bajcheʼ maʼ qʼuel yaʼ ti dibujo. ¡Jini winic jiñʌch Judas Iscariote! ¿Chucoch woliʼ tsʼujtsʼun Jesús?
Jesús tsiʼ cʼajtibe: ‹Judas, ¿woli a tsʼujtsʼuñon chaʼan maʼ wʌcʼon tiʼ cʼʌb j contrajob?›. Cheʼʌch bajcheʼ jini tsiʼ choño Jesús. Tiʼ mele bajcheʼ jini, chaʼan jini winicob woli bʌ i tilelob miʼ cʌñob chaʼan jiñʌch Jesús, woli bʌ i sajcañob. Jin chaʼan, jini i contrajob tsiʼ lʌcʼtesayob i bʌ baʼan Jesús i tsiʼ chucuyob. Pero Pedro maʼanic mi caj i yʌcʼ ti chucol Jesús. Tsiʼ botsʼo yespada, i tsiʼ lowo jini winic yaʼ bʌ an tiʼ tʼejl. Tsiʼ tsepbe loqʼuel i chiquin am bʌ tiʼ ñoj. Pero Jesús tsiʼ tʌlbe i chiquin jini winic i tsaʼ tojʼa.
Jesús tsiʼ sube Pedro: ‹Loto jini a wespada yaʼ ti yajñib. ¿Maʼanic ba maʼ ñopbeñon chaʼan miʼ mejlel j cʼajtiben c Tat yonlel ángelob chaʼan miʼ coltañon?›. ¡Mucʼʌch i mejlel! Pero Jesús maʼanic tsiʼ cʼajtibe Dios chaʼan miʼ choc tilel ángelob, come yujil chaʼan tsaʼix cʼoti i yorajlel chaʼan miʼ pʌjyel majlel tiʼ contrajob. Tsiʼ yʌcʼʌ i bʌ tiʼ cʼʌb i contrajob. Laʼ laj qʼuel chuqui mi caj i chaʼlen Jesús.
Mateo 26:36-56; Lucas 22:39-53; Juan 18:1-12.