Cʌntesʌntel 101

Tsiʼ tsʌnsayob Jesús

¡QʼUELE chuqui bʌbʌqʼuen bʌ woli ti ujtel! Woli i tsʌnsañob Jesús. Chʼijil o bajal ti juntsʼijt bʌñʌl bʌ teʼ. Tsiʼ cʼʌñʌyob lawux chaʼan miʼ chʼijbeñob i cʼʌb yicʼot i yoc. ¿Chucoch an majqui yom i mel bajcheʼ jini?

Come an winicob xʼixicob muʼ bʌ i tsʼaʼleñob. ¿Awujil ba majquiyob? I junticlel jiñʌch jontol bʌ ángel i cʼabaʼ Satanás jini Diablo. Jiñʌch tsiʼ yʌcʼʌ chaʼan Adán yicʼot Eva maʼanic miʼ jacʼbeñob i tʼan Jioba. Jiñʌch jaʼel Satanás tsiʼ yʌcʼʌ chaʼan jini i contrajob Jesús miʼ tsʌnsañob.

Cheʼ bʌ maxto i chʼijiyob Jesús yaʼ ti bʌñʌl bʌ teʼ, jini i contrajob tsiʼ wen aqʼueyob i yilan wocol. ¿Cʼajal baʼ chaʼan tsaʼ cʼotiyob yaʼ ti pʌcʼʌbʌl i cʼabaʼ Getsemaní, i tsiʼ chucuyob majlel? ¿Majquiyob jini i contrajob? Jiñobʌch jini ñaxam bʌ miʼ yʌcʼob i bʌ ti ñopbalʌl. Laʼ laj qʼuel chuqui tsaʼ ujti ti wiʼil.

Cheʼ bʌ jini ñaxam bʌ mi yʌcʼob i bʌ ti ñopbalʌl tsiʼ chucuyob majlel Jesús, jini apóstolob tsaʼ putsʼiyob majlel. Tsiʼ chaʼleyob bʌqʼuen, i tsiʼ bajñel cʌyʌyob yicʼot i contrajob. Pero jini apóstol Pedro yicʼot Juan mach ñajtic tsaʼ putsʼiyob majlel. Tsaʼ caji i mucul tsajcañob majlel, chaʼan miʼ qʼuelob chuqui mi caj i tumbeñob Jesús.

Jini motomajob tsiʼ pʌyʌyob majlel Jesús baqui an juntiquil anix bʌ i jabilel i cʼabaʼ Anás, tsaʼ bʌ i mele i yeʼtel jaʼel bajcheʼ ñuc bʌ motomaj. Jini winicob xʼixicob mach jalic tsaʼ ajñiyob yaʼi. Ti wiʼil tsiʼ pʌyʌyob majlel Jesús ti yotot Caifás, jini am bʌ i yeʼtel bajcheʼ ñuc bʌ motomaj. An cabʌlob ñaxam bʌ mi yʌcʼob i bʌ ti ñopbalʌl yaʼi.

Yaʼ tiʼ yotot Caifás woli ti ujtel meloñel. Tsiʼ pʌyʌyob cʼotel cabʌl winicob chaʼan mi yʌlob mach bʌ isujmic tiʼ tojlel Jesús. Tiʼ pejtelel jini ñaxam bʌ mi yʌcʼob i bʌ ti ñopbalʌl tsiʼ yʌlʌyob: ‹Yom mi lac tsʌnsan Jesús›. Cheʼ jini tsiʼ tujbʌbeyob i wut Jesús yicʼot tsiʼ jatsʼʌyob.

Cheʼ bʌ woli ti ujtel jini, Pedro yaʼan tiʼ pat otot. Ti jini acʼʌlel wen an tsʌñal, jin chaʼan jini winicob xʼixicob tsiʼ ñutsuyob cʼajc. Cheʼ bʌ woliyob ti qʼuix ti cʼajc, juntiquil xchʼoc muʼ bʌ ti eʼtel bajcheʼ moso, tsiʼ taj i qʼuel Pedro, i tsiʼ yʌlʌ: ‹Ili winic tsiʼ piʼle ñumel jini Jesús jaʼel›.

Pedro tsiʼ jacʼʌ: ‹¡Maʼanic, maʼanic yaʼan ñumel quicʼot!›.

Uxyajl tsaʼ subenti Pedro chaʼan yaʼan ñumel yicʼot Jesús. Pero jujunsujtel Pedro tsiʼ yʌlʌ chaʼan mach melelic. Pero ti yujsujtelel, cheʼ bʌ Pedro tsiʼ yʌlʌ jini, Jesús tsaʼ sujti i qʼuel. Pedro wen chʼijiyem tsiʼ yubi i bʌ chaʼan tsiʼ chaʼle lot, tsaʼ loqʼui majlel, tsʌts tsaʼ caji ti uqʼuel.

Cheʼ bʌ tsaʼ loqʼui jini Qʼuin ti viernes, jini motomajob tsiʼ pʌyʌyob majlel Jesús baqui mi yujtel colem bʌ meloñel, yaʼ ti Sanedrín. Jiñʌch baqui tsaʼ caji i ñaʼtañob chuqui mi caj i melbeñob Jesús. Tsiʼ pʌyʌyob majlel baqui an Poncio Pilato, yumʌl bʌ yaʼ ti Judea.

‹Wen jontol ili winic›, cheʼ tsiʼ subeyob Pilato. ‹Yom mi lac tsʌnsan.› Cheʼ bʌ jini Pilato tsaʼ ujti i melben cʼajtiya tac Jesús, tsiʼ yʌlʌ: ‹Mi cʌl joñon maʼanic i mul ili winic›. Cheʼ jini, Pilato tsiʼ yʌcʼʌ chaʼan Jesús miʼ pʌjyel majlel tiʼ tojlel Herodes Antipas, yaʼ bʌ an ti Jerusalén, yumʌl bʌ yaʼ ti Galilea. Come maʼanic tsiʼ taja jontolil tiʼ tojlel Jesús, tsiʼ subu chaʼan miʼ chaʼ pʌjyel majlel tiʼ tojlel Pilato.

Pilato yomix i col Jesús. Pero jini i contrajob Jesús yomob chaʼan jini Pilato miʼ col jini aj cʌjchel i cʼabaʼ Barrabás aj xujchʼ bʌ. Muqʼuix caj i taj xinqʼuiñil cheʼ bʌ Pilato tsiʼ locʼsa Jesús chaʼan miʼ qʼuelob. Pilato tsiʼ sube jini winicob xʼixicob: ‹¡Qʼuelela! ¡Jini laʼ rey!›. Pero jini motomajob cʼam tsiʼ chaʼleyob tʼan: ‹¡Locʼsanla! ¡Tsʌnsanla!›. Cheʼ jini, Barrabás tsaʼ locʼsʌnti ti mʌjquibʌl, i Jesús tsiʼ pʌyʌyob majlel chaʼan miʼ tsʌnsañob.

Ti ochʼajel qʼuin ti viernes tsiʼ chʼijiyob ti jumpʼejl bʌñʌl bʌ teʼ. Yaʼ ti dibujo maʼanic maʼ taj a qʼuel, pero tsaʼ chʼijleyob chaʼtiquil winicob chaʼan miʼ chʌmelob, juntiquil tiʼ ñoj yicʼot juntiquil tiʼ tsʼej Jesús. Cheʼ bʌ mach jalix mi caj i chʌmel Jesús, juntiquil xjontolil tsiʼ yʌlʌ: ‹Ñaʼtañon cheʼ maʼ wochel ti a yumʌntel›. Jesús tsiʼ jacʼʌ: ‹Mi cʌqʼueñet c tʼan chaʼan yaʼʌch mi caj a wajñel quicʼotet ti Paraíso›.

¡Wen utsʼatax bʌ tʼan jini! ¿Ñomach? ¿Awujil ba baqui bʌ paraíso tsiʼ taja ti tʼan Jesús? ¿Baqui an jini paraíso tsaʼ bʌ i mele Dios ti ñaxan? Wʌʼʌch ti Pañimil. Cheʼ bʌ wolix ti yumʌntel Jesús yaʼ ti panchan, mi caj i tech chʼojyel jini winic chaʼan wen tijicña miʼ chumtʌl ti Paraíso wʌʼ ti Pañimil. ¿Mach ba wenic jini?

Mateo 26:57-75; 27:1-50; Lucas 22:54-71; 23:1-49; Juan 18:12-40; 19:1-30.