Cʌntesʌntel 102
Jesús cuxul
¿AWUJIL ba majqui jini xʼixic yicʼot majquiyob jini chaʼtiquil winicob? Jini xʼixic jiñʌch María chʼoyol bʌ ti Magdala, i yamiga Jesús. Jini winicob sʌsʌcoʼ bʌ i pislel jiñobʌch chaʼtiquil ángel. María woliʼ qʼuel i malil jini mucoñibʌl yaʼ baqui tsiʼ yʌcʼʌyob i bʌcʼtal o i cuctal Jesús, ¡pero maʼanix yaʼan jini i cuctal! ¿Majqui tsiʼ chʼʌmʌ loqʼuel? Laʼ laj qʼuel.
Cheʼ bʌ tsaʼix chʌmi Jesús, jini xmotomajob tsiʼ subeyob jini Pilato: ‹Cheʼ bʌ cuxulto jini Jesús tsiʼ yʌlʌ chaʼan mi caj i tejchesʌntel chʼojyel tiʼ yuxpʼejlel qʼuin. Jin chaʼan, yom maʼ choc majlel ti cʌntʌntel jini mucoñibʌl. ¡Cheʼ bajcheʼ jini, jini xcʌntʼañob i chaʼan maʼanic mi caj i xujchʼibeñob i cuctal yicʼot chaʼan maʼanic mi yʌlob tsaʼ tejchisʌnti chʼojyel!›. Pilato tsiʼ sube jini xmotomajob chaʼan mi chocob majlel jini soldadojob.
Cheʼ bʌ anix uxpʼejl qʼuin i chʌmel Jesús, ti sʌcʼajel, juntiquil i yángel Jioba tsaʼ sʌc tili. Tsiʼ selcʼu jini xajlel mʌcʌl bʌ i chaʼan jini mucoñibʌl. Maʼanic tsaʼ mejli i ñijcañob i bʌ jini soldadojob tiʼ caj bʌqʼuen. ¡Cheʼ bʌ tsiʼ qʼueleyob i malil mucoñibʌl, maʼanix yaʼan i bʌcʼtal Jesús! Lamital soldadojob tsaʼ ochiyob yaʼ ti tejclum i tsiʼ pejcayob xmotomajob. ¿Awujil ba chuqui tsiʼ meleyob jini jontoloʼ bʌ xmotomajob? Tsiʼ tojoyob jini soldadojob chaʼan miʼ chaʼleñob lot. Tsaʼ subentiyob: ‹Subula chaʼan jini xcʌntʼañob tsiʼ chʼʌmbeyob majlel i bʌcʼtal cheʼ bʌ woliyetla ti wʌyel›.
Cheʼ jini, i yamigajob Jesús tsaʼ cʼotiyob baqui tsaʼ mujqui. ¡Jochol tsaʼ cʼoti i tajob! Ti orajach, chaʼtiquil ángelob sʌcoʼ bʌ i pislel tsiʼ pʌsʌyob i bʌ. ‹¿Chucoch woliʼ laʼ sajcan Jesús wʌʼi?›, cheʼ tsiʼ cʼajtiyob. ‹Tsaʼix tejchisʌnti chʼojyel. Cucula ti ora chaʼan mi laʼ suben jini xcʌntʼañob i chaʼan.› Tsaʼ majliyob ti ajñel. Pero yaʼ ti bij juntiquil winic tsiʼ waʼchocoyob. ¡Jiñʌch Jesús! Tsiʼ yʌlʌ: ‹Cucu subenla xcʌntʼañob c chaʼan›.
Cheʼ bʌ jini xʼixicob tsiʼ subeyob jini xcʌntʼañob, chaʼan cuxulʌch yicʼot chaʼan tsiʼ taja i qʼuelob Jesús, mach ti orajic tsaʼ ñopbentiyob. ¡Pedro yicʼot Juan tsaʼ majliyob ti ajñel yaʼ baqui tsaʼ mujqui Jesús, pero jochol tsiʼ tajayob jini mucoñibʌl! Cheʼ bʌ tsaʼ sujtiyob majlel, María chʼoyol bʌ ti Magdala tsaʼ to bajñel cʌyle. Jin chaʼan tsiʼ taja i qʼuel jini chaʼtiquil ángel tiʼ malil mucoñibʌl.
¿Awujil ba chuqui tsiʼ chaʼle i bʌcʼtal Jesús? Dios tsiʼ yʌcʼʌ chaʼan tsaʼ jach sʌc majli. Dios maʼanic tsiʼ tejchesa chʼojyel Jesús bajcheʼ juntiquil winic wʌʼ ti Pañimil. Tsiʼ sujtesa ti espíritu, cheʼ bajcheʼ juntiquil ángel. Pero chaʼan mi pʌs i bʌ ti tojlel xcʌntʼañob i chaʼan, Jesús tsiʼ pʌsʌ i bʌ.
Mateo 27:62-66; 28:1-15; Lucas 24:1-12; Juan 20:1-12.