Cʌntesʌntel 110

Timoteo i yaj coltaya Pablo

JINI chʼiton winic yaʼ bʌ maʼ qʼuel ti dibujo yicʼot apóstol Pablo, jiñʌch Timoteo. Chumul yicʼot i familia yaʼ ti Listra. I cʼabaʼ i mamá jiñʌch Eunice yicʼot i coʼ o i chuchuʼ jiñʌch Loida.

I yuxyajlelix Pablo woli ti julaʼ yaʼ ti Listra. Anix jumpʼejl jab cheʼ bʌ Pablo yicʼot Bernabé tsaʼ ñaxan cʼotiyob ti subtʼan yaʼi. Cheʼ jini Pablo tsaʼ chaʼ cʼoti yicʼot i yamigo i cʼabaʼ Silas.

¿Awujil ba chuqui woliʼ suben Pablo jini Timoteo? ‹¿A wom ba majlel yicʼot Silas yicʼot joñon?›, cheʼ tsiʼ cʼajti Pablo. ‹Miʼ mejlel a coltañon lojon ti subtʼan ti ñajt tac bʌ tejclum.›

‹Yomʌch›, cheʼ tsiʼ jacʼʌ Timoteo, ‹mucʼʌch c mulan majlel›. Ti wiʼil, Timoteo tsiʼ cʌyʌ i familia i tsaʼ majli yicʼot Pablo yicʼot Silas. Pero cheʼ bʌ muʼ to caj laj cʌn chaʼan i xʌmbal Pablo tiʼ subtʼan, laʼ lac ñaxan qʼuel chuqui tsaʼ ujti tiʼ tojlel. Anix ñumen wuclujumpʼejl jab cheʼ bʌ Jesús tsiʼ sʌc pʌsʌ i bʌ tiʼ tojlel Pablo yaʼ tiʼ bijlel Damasco.

¡Yom cʼajal a chaʼan, Pablo tsaʼ majli ti Damasco, chaʼan miʼ ticʼlan xcʌntʼañob i chaʼan Jesús, pero tsaʼ sujti ti xcʌntʼan jaʼel! Ti wiʼil, i contrajob jini Pablo, tsaʼ caji i sajcañob chaʼan miʼ tsʌnsañob, pero jini xcʌntʼañob tiʼ coltayob chaʼan miʼ putsʼel. Tsiʼ juʼsayob ti colem chiquib tiʼ ñʌcʼ jini chan bʌ tsʼajc, chaʼan miʼ locʼsañob yaʼ ti tejclum.

Ti wiʼil, Pablo tsaʼ ñumi ti subtʼan ti Antioquía. Yaʼʌch baqui tsaʼ ñaxan cʌjñiyob jini xñoptʼañob cheʼ bajcheʼ xcʌntʼañob. Ti wiʼil, Pablo yicʼot Bernabé cheʼ bʌ yaʼañob ti Antioquía tsaʼ chojquiyob majlel ti subtʼan ti yan tac bʌ tejclum ñajt bʌ an. Jumpʼejl tejclum tsaʼ bʌ i julaʼtayob jiñʌch Listra, yaʼ baqui chumul Timoteo.

Cheʼ jini, tsaʼ ñumi cheʼ bʌ jumpʼejl jab, Pablo tsaʼ chaʼ majli yaʼ ti Listra cheʼ tiʼ chaʼyajlel i xʌmbal tiʼ subtʼan. ¿Awujil ba baqui tsaʼ majli Timoteo, cheʼ bʌ tsaʼ majli yicʼot Pablo yicʼot Silas? Qʼuele yaʼ ti mapa, i laʼ laj cʌn baqui tsaʼ majliyob.

Tsaʼ ñaxan majliyob ti Iconio, come mach ñajtic an, cheʼ jini tsaʼ majliyob ti yambʌ tejclum i cʼabaʼ Antioquía. Cheʼ jini tsaʼ majliyob ti Troas, tsaʼ ñumiyob ti Filipos, ti Tesalónica yicʼot Berea. ¿Muʼ baʼ taj a qʼuel Atenas yaʼ ti mapa? Pablo tsiʼ chaʼle subtʼan ti jini tejclum. Cheʼ jini, tsiʼ chaʼleyob subtʼan jumpʼejl jab yicʼot ojlil yaʼ ti Corinto. Tsaʼ cʼotiyob ti jijlel yaʼ ti Éfeso. Cheʼ jini tsaʼ sujtiyob ti barco cʼʌlʌl ti Cesarea yicʼot tsaʼ chaʼ majliyob cʼʌlʌl ti Antioquía, yaʼ baqui tsaʼ jijli Pablo.

Jin chaʼan Timoteo tsiʼ chaʼle xʌmbal cabʌl kilómetro tac chaʼan miʼ coltan Pablo i sub jini «wen tʼan» yicʼot chaʼan miʼ waʼchocon yan tac bʌ congregación. Cheʼ maʼ taj a colel, ¿muʼ ba caj a wochel ti toj bʌ xyaj eʼtel i chaʼan Dios bajcheʼ Timoteo?

Hechos 9:19-30; 11:19-26; capítulo 13 cʼʌlʌl 17; 18:1-22.

[Mapa]

(Mi a wom a qʼuel bajcheʼ an yaʼ ti libro, miʼ mejlel a chaʼlen ti descargar)

Roma

Malta

Tesalónica

Berea

Corinto

Filipos

Atenas

Creta

Troas

Efeso

Mileto

Colosas

Antioquía

Iconio

Listra

Antioquía

Chipre

Damasco

Cesarea

Jope

Jerusalén

JINI COLEM BɅ ÑAJB (MEDITERRÁNEO)