Cʌntesʌntel 4
¿Majqui jini Diablo?
Diablo yicʼot Satanás, ¿baqui tsaʼ tili? (1, 2)
¿Bajcheʼ miʼ lotin winicob xʼixicob? (3-7)
¿Chucoch yom maʼ wʌcʼ a bʌ tiʼ contra jini Diablo? (7)
1. Jini tʼan «diablo» i sujmlel jiñʌch juntiquil muʼ bʌ i wen chaʼlen leco bʌ lot tiʼ tojlel yambʌ i piʼʌl. «Satanás» i sujmlel xcontra o xmʌctaya. Ili cʼabaʼʌl tac tsaʼ aqʼuenti jini ñaxan bʌ i contra Dios. Tiʼ tejchibal jiñʌch juntiquil toj bʌ ángel chumul bʌ yicʼot Dios yaʼ ti panchan, pero cheʼ jini tsiʼ chanʼesa i bʌ i tsiʼ ñopo i chʼʌm jini chʼujutesʌntel cojach bʌ yom miʼ yʌqʼuentel Dios (Mateo 4:8-10).
2. Ili ángel, Satanás, tsiʼ chaʼle tʼan yicʼot Eva yicʼot tsiʼ cʼʌñʌ juncojt lucum, yicʼot jini i lot, tsiʼ mele chaʼan miʼ ñusʌben i tʼan Dios. Cheʼ bajcheʼ iliyi Satanás tsiʼ ñopo i chilben i «yajñib» Dios cheʼ bajcheʼ yumʌl, cojach bʌ an tiʼ wenta jini ñumen Ñuc bʌ Dios. Tsiʼ yʌcʼʌ ti chʼʌmbentel isujm chaʼan jini Dios mach wenic bʌ yumʌl tiʼ Tojlel winicob xʼixicob. Yicʼot jaʼel tsiʼ ñopo i yʌl chaʼan mi juntiquilic jax wʌʼ ti pañimil xucʼul miʼ caj i yajñel tiʼ tojlel Dios. Cheʼ tsiʼ mele bajcheʼ jini, tsaʼ sujti tiʼ contra Dios. Yaʼ ba ora tsaʼ otsʌbenti i cʼabaʼ ti Diablo jini Satanás (Génesis 3:1-5; Job 1:8-11; Apocalipsis 12:9).
3. Satanás miʼ ñop i lotin winicob xʼixicob chaʼan miʼ chʼujutesʌntel (2 Corintios 11:3, 14). Junchajp bajcheʼ miʼ mel jiñʌch cheʼ miʼ cʼʌn jini mach bʌ isujmic ñopbalʌl. Mi jumpʼejl ñopbalʌl miʼ chaʼlen lot bʌ cʌntesa tiʼ tojlel Dios, i sujmlel miʼ tsʼʌctiyel chuqui yom Satanás (Juan 8:44). Jini winicob xʼixicob muʼ bʌ i majlelob yaʼ ti mach bʌ isujmic ñopbalʌl, tajol miʼ lon ñaʼtañob chaʼan wolʌch i chʼujutesañob jini isujm bʌ Dios, pero i sumjlel woli i melbeñob i yeʼtel Satanás, come jiñʌch i dios ili pañimil (2 Corintios 4:4).
4. Tiʼ pejcʌntel espíritu jiñʌch yambʌ muʼ bʌ i cʼʌn Satanás, chaʼan miʼ pʌy tiʼ tojlel winicob xʼixicob. Lamital winicob xʼixicob miʼ pejcañob jini espíritujob, chaʼan, miʼ coltʌntelob o miʼ ticʼlañob yañoʼ bʌ, i miʼ wʌn aloʼ chuqui miʼ cajel ti ujtel yicʼot miʼ melob milagro tac. Ti pejtelel jini mach bʌ wentaquic yaʼan Satanás jini pʼʌtʌl bʌ xjontolil. Mi la com chaʼan utsʼat miʼ qʼuelonla Dios, mach yomic mi la cotsan lac bʌ ti pejcʌntel jini espíritujob (Deuteronomio 18:10-12; Hechos 19:18, 19).
5. Satanás miʼ yʌqʼuen i ñaʼtan winicob xʼixicob jaʼel, chaʼan i colorlel i pʌchʌlelob ñumen ñuc bajcheʼ i chaʼan yañoʼ bʌ, yicʼot miʼ mel chaʼan miʼ chʼujutesan jini yumʌlob. Lamital winicob xʼixicob miʼ ñaʼtañob, chaʼan i tejclumob o i colorlel i pʌchʌlelob ñumen ñuc bajcheʼ yañoʼ bʌ. Pero jini mach i sujmlelic (Hechos 10:34, 35). Yañoʼ bʌ miʼ pijtañob chaʼan jini yumʌlob miʼ tojʼesan i wocol winicob xʼixicob ti pañimil. Cheʼ bajcheʼ iliyi miʼ tsʼaʼleñob i Yumʌntel Dios, jini cojach bʌ mi caj mejlel i jisan lac wocol (Daniel 2:44).
6. Yambʌ bajcheʼ miʼ lotin winicob xʼixicob Satanás, jiñʌch cheʼ miʼ yilʌbeñob i pusicʼal tiʼ mulʌntel chuqui mach wen. Jehová miʼ subeñonla chaʼan mach mi lac mel jini mach bʌ wentaquic come yujil chaʼan miʼ ticʼlañonla (Gálatas 6:7, 8). Tajol lamital yomob chaʼan maʼ mel chuqui miʼ melob. Pero yom cʼajal a chaʼan jiñʌch Satanás yom bʌ chaʼan maʼ mel jini (1 Corintios 6:9, 10; 15:33).
7. Satanás mi mejlel i mel chaʼan miʼ ticʼlañetob o miʼ contrajiñetob chaʼan maʼ cʌy Jehová. Tajol lamital a cʌñʌyoʼ bʌ, mi caj i wen michʼañob cheʼ woli a chajpan jini Biblia. Yañoʼ bʌ tajol mi caj i wajleñetob. Pero ¿majqui tsiʼ yʌqʼueyet a cuxtʌlel? Satanás yom jach i bʌcʼtesañet chaʼan maʼ cʌy a ñop Jehová. Mach a cʌy chaʼan miʼ mʌlbeñet (Mateo 10:34-39; 1 Pedro 5:8, 9). Cheʼ maʼ lʌtʼ chuqui miʼ melbeñet jini Diablo, mi mejlel a tijicñesʌben i pusicʼal Jehová i maʼ pʌs chaʼan wolʌch a coltan I yumʌntel (Proverbios 27:11).
[Dibujo yaʼ ti iyopol 9]
Jini mach bʌ isujmic ñopbalʌl, yicʼot i pejcʌntel jini espíritujob yicʼot tiʼ bajñel cʼuxbintel jini tejclum tac miʼ lotin winicob xʼixicob
[Dibujo yaʼ ti iyopol 9]
Chʌn ñopo majlel jini Jehová cheʼ jini mi caj a lʌtʼ chuqui miʼ melbeñet jini Satanás