Cʌntesʌntel 5
¿Chuqui mi caj i mel Dios ila ti Pañimil?
¿Chucoch tsiʼ mele Jehová jini Pañimil? (1, 2)
¿Chucoch wʌle jini Pañimil mach paraísojic? (3)
¿Chuqui mi caj i chaʼleñob jini xjontolilob? (4)
¿Chuqui mi caj i mel Jesús ti tal to bʌ qʼuin tiʼ tojlelob jini cʼamoʼ bʌ?, ¿yicʼot tsaʼix bʌ ñoxʼayob?, ¿yicʼot xchʌmeñoʼ bʌ? (5, 6)
¿Chuqui yom maʼ mel chaʼan maʼ taj bendición tac ti tal to bʌ qʼuin? (7)
1. Jehová tsiʼ mele ili Pañimil chaʼan tijicña miʼ chumtʌlob winicob xʼixicob ti pejtelel ora tsiʼ lon alʌ. Jin yom tsiʼ lon alʌ cheʼ chʌn chumul winicob xʼixicob tojoʼ bʌ yicʼot tijicñayob (Salmo 115:16; Isaías 45:18). Jini Pañimil maʼanic baʼ ora mi caj i jisʌntel; mi caj i yajñel ti pejtelel ora (Salmo 104:5; Eclesiastés 1:4).
2. Cheʼ bʌ maxto i mele jini winic, Dios tsiʼ yajca cheʼ joytʌl jini Pañimil, tsiʼ sujtesa ti wen i tʼojol jax bʌ paraíso i tsiʼ yotsabe i cʼabaʼ «pʌcʼʌbʌl jini Edén». Yaʼ tsiʼ yʌcʼʌ jini ñaxan bʌ winic yicʼot ñaxan bʌ xʼixic: Adán yicʼot Eva. Dios tsiʼ yʌlʌ mi mejlel i yʌcʼo i yalobil chaʼan miʼ butʼob jini Pañimil. Cheʼiqui cʼunteʼ cʼunteʼ tsiʼ sujtesayob tiʼ petol ili Pañimil ti jumpʼejl paraíso (Génesis 1:28; 2:8, 15).
3. Adán yicʼot Eva tsiʼ chaʼleyob mulil come tsiʼ ñusʌbeyob i mandar Dios, anquese yujilob chaʼan mach wenic. Chaʼan tiʼ caj i mulob, Jehová tsiʼ choco loqʼuel yaʼ ti pʌcʼʌbʌl, jini chaʼan paraíso tsaʼ sajti (Génesis 3:1-6, 23). Pero Jehová, maʼanic ñajʌyem i chaʼan chuqui mi caj i mel ila ti Pañimil. Miʼ wʌn al chaʼan mi caj i chaʼ sujtesan, ti jumpʼejl paraíso baqui miʼ chumtʌl winicob xʼixicob ti pejtelel ora. ¿Bajcheʼ mi caj i mel? (Salmo 37:29.)
4. Cheʼ maxto paraísojic ili Pañimil, yom miʼ ñaxan jilel jini xjontolilob (Salmo 37:38). Iliyi miʼ cajel ti ujtel ti Armagedón, jiñʌch i guerra jini Dios chaʼan miʼ jisan jini jontolil. Cheʼ jini, Satanás miʼ cajel ti ñujpʼel mil jab, muʼ bʌ i yʌqʼueñonla lac chʼʌmben isujm, chaʼan maʼanic miʼ cajel ti cʌlel mi juntiquilic xjontolil chaʼan miʼ yʌsin jini Pañimil. Cojach miʼ cajel ti cʌlel jini i tejclum Dios (Apocalipsis 16:14, 16; 20:1-3).
5. Cheʼ jini Jesucristo miʼ cajel ti yumʌntel mil jabil tiʼ tojlel añoʼ bʌ ila ti Pañimil (Apocalipsis 20:6) i cʼunteʼ cʼunteʼ mi caj i jisan jini mulil ti lac ñaʼtʌbal yicʼot ti lac bʌcʼtal. Mach chʌn anix lac mul, mi caj la cajñel cheʼ bajcheʼ Adán yicʼot Eva ti ñaxan, cheʼ maxto i chaʼleyob mulil. Cheʼ jini maʼanix miʼ chʌn cajel cʼamʌjel, ñoxʼajel mi jinic to chʌmel. Jini xcʼamʌjelob mi caj i lajmelob yicʼot jini ñoxobix bʌ miʼ cajelob tiʼ chaʼ sujtel tiʼ chʼitonlel (Job 33:25; Isaías 33:24; Apocalipsis 21:3, 4).
6. Cheʼ woli ti Yumʌntel Jesús Mil jabil, jini winicob xʼixicob xucʼuloʼ bʌ miʼ cajelob ti eʼtel, chaʼan miʼ sutqʼuiñob tiʼ petol ili Pañimil ti jumpʼejl paraíso (Mateo 5:5). Yicʼot jaʼel, wen yonlel chʌmeñoʼ bʌ miʼ cajel i chaʼ tejchelob chʼojyel yicʼot miʼ cajelob ti chaʼ chumtʌl ila ti Pañimil (Hechos 24:15). Mi mucʼʌch i melob chuqui miʼ cʼajtin Dios tiʼ tojlelob, miʼ cajelob ti chumtʌl ti pejtelel ora ila ti Pañimil. Pero mi mach cheʼiqui, mi caj i jisʌntelob ti pejtelel ora (Juan 5:28, 29; Apocalipsis 20:11-15).
7. Cheʼʌch miʼ cajel ti tsʼʌctiyel chuqui tsiʼ ñaʼta i mel Dios ila ti Pañimil tiʼ tejchibal. ¿Muʼ ba a mulan a taj bendición tac ti ili tal to bʌ qʼuin? Mi cheʼʌchi, yom maʼ chʌn chaʼlen wersa chaʼan maʼ chʌn cʌn majlel jini Jehová yicʼot chaʼan maʼ chʌn jacʼben i mandar. Muʼ bʌ caj mejlel i coltañet tiʼ melol jini, jiñʌch cheʼ maʼ majlel yaʼ ti tempa bʌ muʼ bʌ i yujtel yaʼ ti Yotlel Tempa bʌ i chaʼan i Testigojob Jehová yaʼ ti a lumal (Isaías 11:9; Hebreos 10:24, 25).
[Dibujo yaʼ ti iyopol 10]
Jini paraíso sajtem bʌ
[Dibujo yaʼ ti iyopol 11]
Cheʼ miʼ ñumel jini Armagedón, jini Pañimil miʼ caj i sujtel ti jumpʼejl paraíso